A Taim Nou Fi Mi Tap Jraiv?

YU A jraiv fi wol iip a ier nou. Yu av yu uona kyaar, an yu lov se yu kyan jraiv go eniwe yu waahn fi go, an yu no afi aks nobadi fi kya yu. Bot yu fambili an fren dem mait-a tel yu se dem fiil se a taim fi yu tap jraiv nou, kaa dem no waahn notn bad fi apm tu yu. Bot yu kyaahn andastan wa mek dem fiil so.

A dis a gwaan wid yu ya nou? Ef a so, wa kyan elp yu fi mek op yu main fi nuo ef a taim fi yu tap jraiv?

Iina som konchri, wen sumadi we jraiv riich sortn iej, dem afi go a dakta fi get wan chek op fi si ef dem kyan get bak dem laisn fi jraiv. Di breda an sista dem we liv iina dem konchri de du wa di laa dem se dem fi du. (Ruo. 13:1) Bot iivn ef dem no av dem laa de iina fi yu konchri, yu av som sitn we yu kyan riizn pan fi elp yu fi nuo ef a taim fi yu tap jraiv.

OU YU KYAN NUO EF A TAIM FI YU TAP JRAIV?

Wan aaganaizieshan we set op fi piipl we op iina iej se di wan dem we op iina iej kyan aks demself dem kwestiyan ya:

Wen mi a jraiv, mi fain it aad fi riid di sain dem we de pan di ruod, ar fi si a nait taim?
Mi a fain it aad fi ton mi ed fi luk iina di miro dem an fi luk fi si di plies dem we mi kyaahn si iina di miro?
Mi fain it aad fi muuv mi fut kwik, laik wen mi afi tep pan di brieks?
Mi a uol op chrafik kaaz a ou sluo mi a jraiv?
Yu av som taim wen mi nieli krash, ar mi kyaar dent op dent op an skrach op skrach op kaaz mi aalwiez a lik op iina tingz?
Poliis eva tap mi yet kaaz a ou mi a jraiv?
Mi eva jrap a sliip wen mi a jraiv?
Mi a tek no pil an dem sitn de we kuda tap mi fram jraiv gud?
Mi fambili an fren dem eva tel mi se dem a wori bout di wie ou mi a jraiv?

Ef yu ansa yes tu wan ar tuu a dem kwestiyan de, a mait-a taim fi mek som likl chienj. Laik yu mait-a afi kot dong pan di mount a jraivin we yu du a nait taim. Tek di taim fi si ef yu a jraiv gud, an chrai fi du dis aafn. Laik miebi yu kuda aks sumadi iina yu fambili, ar wan a yu fren dem fi tel yu wa dem tingk bout ou yu jraiv. An miebi yu kuda tek som jraivin lesn fi elp yu fi jraiv beta. Bot ef yu ansa yes tu muor dan tuu a di kwestiyan dem, den a mait-a taim fi yu tap jraiv.a

OU DI BAIBL KYAN ELP YU FI MEK OP YU MAIN

It mait-a no iizi fi si se yu naa jraiv gud laik wan taim. An fi ier se yu mait-a afi tap jraiv a sitn we yu mait-a fain aad fi tingk ar taak bout. So ou di Baibl kyan elp yu fi mek op yu main bout wa yu fi du? Si tuu tingz ya we yu kyan riizn pan.

Nuo we yu kyan du fram wa yu kyaahn du. (Pr. 11:2) Di uolda wi get, wi naa go kyan si an ier gud laik wan taim, an wi badi a-go get wiika an wiika. An a das wai nof piipl tap plie sortn an sortn spuot wen dem a get op iina iej, kaa it iiziya fi dem get ort.A siem ting kyan gwaan wid sumadi we op iina iej an stil a jraiv. Da sumadi de mait-a mek op im main fi tap jraiv kaa it no sief agen. (Pr. 22:3) Sumadi we nuo wa dem kyan du fram wa dem kyaahn du a-go lisn wen ada piipl taak tu dem bout ou dem a jraiv.—Luk pan 2 Samwel 21:15-17.

Wi no waahn siek-a wi sumadi ded. (Dyuu. 22:8) Ef sumadi naa jraiv iina wan sief wie, im kyan en op ort ar kil piipl. So sumadi we stil a jraiv iivn duo im kyaahn jraiv so gud agen, kuda en op kil imself ar kil sumadi els tu. An ef im en op kil sumadi els, dat wuda mek im gilti kaa im sin gens Jeuova.

Ef yu a tingk bout ef yu fi tap jraiv, no bada tingk se nobadi naa go rispek yu agen ef a dat yu mek op yu main fi du. Jeuova lov yu an im api wen im si se yu nuo wa yu kyan du fram wa yu kyaahn du. An im si se yu ombl an dat yu aalwiez a tingk bout ou fi kip ada piipl sief. Im pramis se im a-go aalwiez tek kier a yu an osh yu wen yu fiil sad. (Aiz. 46:4) Im naa go lef yu pan yu uon. So aks im fi elp yu fi yuuz di sitn dem iina di Baibl fi nuo ef yu fi tap jraiv.

Ou Yu Kyan Elp

Di fambili fi di wan dem we op iina iej a naamali di bes wan dem fi taak tu dem wan de bout di wie ou dem a jraiv. Ar miebi yu an di sumadi we op iina iej a fren, an yu ier ada piipl a se im naa jraiv so gud agen. Wen yu ier dem sitn de, no bada tel yuself se yu naa pie dat no main. Lisn tu wa dem a se. Yu mait-a mek op yu main fi go jraiv wid im fi fain out ef wa dem a se a chuu. An ef yu si se im naa jraiv so gud fi chuu, taak tu im bout it. An wen yu a du dat, tingk bout ou yu wuda fiil ef sumadi did a taak tu yu bout di siem ting. Taak tu im iina wan kain wie, bot tel im di chuut. Memba se yu di de fi taak bout di wie ou im a jraiv, so no jos tingk bout im iej. Wen yu a taak tu im, se sopm laik,“Mi waahn mek shuor se wen yu a jraiv, notn no apm tu yu,” insted-a fi se “Yu kyaahn jraiv gud agen.” Elp im fi memba di sitn dem iina di Baibl we im lov, an mek im nuo se yu nuo se im waahn fi du wa rait.

Aal a wi kyan shuo se wi fiil it fi di wan dem we op iina iej wen dem afi tap jraiv. Dem mait-a fiil laik se dem kyaahn du wa dem waahn du agen, an dem afi dipen pan piipl. Wa u kyan du fi elp dem wan ya? Du tingz fi elp dem, an chriit dem iina wan kain wie. (Pr. 17:17) No wiet fi im fi aks yu fi wan jraiv, kaa im mait-a fiil se a bada im a bada yu. Miebi yu kuda plan out ou yu kuda elp im fi go a di difrant difrant plies dem we im afi go. Laik fi go a di miitn dem, fi go out iina fiil sorvis, fi go bai op tingz, an fi go a dakta. Mek im nuo se yu waahn fi elp im out wid dem sitn ya, an fi spen taim wid im.—Ruo. 1:11, 12.

a Fi lorn muor bout dis, luk iina di paat we niem “Automobile Accidents—Are You Safe?” we de iina di Awake! fi Aagos 22, 2002.