Kwestiyan We Piipl Aks
Likl fram dis, a wa Jeuova a-go put iina di aat a di govament dem so dat dem du “we im waahn dem fi du?”
Revilieshan 17:16, 17 tel wi wa a-go apm roun di taim wen di wos sofarieshan a-go staat. It se: “Di wail animal an di ten aan dem we yu did si a-go iet di uor. Dem a-go mash ar op an lef ar niekid. Dem a-go nyam ar flesh an tek faiya bon ar op. Kaaz Gad put iina dem aat we im waahn dem fi du. Im mek dem mek op dem main fi gi di wail animal dem powa fi ruul.” Iina wi buk an pamplet dem wi yuus tu se dat Jeuova a-go put iina di aat a di govament dem fi du “we im waahn dem fi du,” an dat a fi dem mash op aal a di faalz rilijan dem.
Bot nou wi niid fi chienj wa wi did se. Kaa wi get fi si se wa Jeuova a-go put iina di aat a di govament dem so dat dem du “we im waahn dem fi du,” a no fi dem mash op di faalz rilijan dem, bot a fi aal a di govament dem “gi di wail animal dem powa fi ruul.” Fi mek wi andastan ou dis a-go apm, mek wi luk pan dem kwestiyan ya.
A uu an uu da skripcha ya a taak bout? “Di uor” a “Powaful Babilan.” Powaful Babilan a aal a di rilijan dem we naa worship Gad di rait wie. Di “red red wail animal” a di Liig a Nieshan we did kom bout iina 1919, we dem did set op fi mek aal a di konchri dem liv iina piis wid dem wan aneda. Bot nowadiez, dem kaal di Liig a Nieshan di Yuunaitid Nieshan. (Rev. 17:3-5) “Di ten aan dem” a aal di govament dem we a bak di wail animal.
A wa di uor av fi du wid di red red wail animal? Di uor a “sidong pan” di red red wail animal. An dat miin se shi a sopuot di wail animal an aal a chrai fi kanchuol it tu.
A wa a-go apm tu di uor? Di wail animal an di ten aan dem we a sopuot it, “a-go iet di uor.” An dat miin se dem a-go tek we evriting we shi uon an shuo evribadi ou wikid shi bi. Afta dat, dem a-go don ar, jos laik wa Jeuova did se a-go apm tu ar. (Rev. 17:1; 18:8) Wen dat apm, aal a di faalz rilijan dem a-go gaan fi gud. Bot bifuor dis apm, Jeuova a-go mek di govament dem du sitn we no govament eva du fram di worl mek til nou.
A wa Jeuova a-go mek di govament dem du? Jeuova a-go put it iina di aat a di ten aan dem fi dem du “we im waahn dem fi du.” Dat miin se a im a-go mek di ten aan dem “gi di [red red] wail animal dem powa fi ruul.” An yu memba a uu a di red red wail animal? Dat a di Yuunaitid Nieshan. (Rev. 17:13) So wi niid fi andastan se a no di govament dem a-go dis mek op dem main pan dem uon an gi dem powa tu di wail animal. Kaa di Baibl mek wi nuo se a Jeuova a-go mek dem du dat. (Pr. 21:1; Luk pan Aizaiya 44:28.) Bot dis a no sitn we di govament dem a-go du likl bai likl. A sitn we dem a-go du aal av a sodn! An den afta dat, di wail animal a-go yuuz di powa we it get fram di ten aan dem fi don aal a di faalz rilijan dem wans an faraal.
So wa wi kyan ekspek fi apm likl fram dis? Wi no fi fiil se likl bai likl di govament dem a-go sopuot di Yuunaitid Nieshan muor an muor. Bot wa wi ekspek fi apm a dat, aal av a sodn Jeuova a-go put it iina di aat a di govament dem fi dem gi dem powa tu di wail animal. An wen dat apm, it a-go mek wi nuo se di wos sofarieshan bout fi staat. Bot miinwail, “mek wi kip wi yai waid uopm an wi ed skruu aan gud” kaa suun suun tingz a-go chienj op kwik an faas!—1 Tes. 5:6.