1 Akupin

Paasa Israernumia̱ úunt akupin

16 Nuyá̱ Paasa asutniátin Anani uchirí̱ Jeúwai̱ni̱ Úunt Yusai̱ya̱ chícham jú̱nis támiayi 2 “Wi péejchach aentsnumia̱ Israer shuara uuntri̱ atá tusan apujsamjame. Túramaitiatam ámeka Jirupuámja̱i̱ métek Israer shuar Winia ainia nu tunáa túrumtikiawarume. Túram ame yajauch túramurmiji̱a̱i̱ṉ^k akajtukume. 3 Tuma asamtai Páasanka yamaikia shuári̱ntiuk amuktatjai. Túran Nawata uchirí̱ Jirupuáman itiurkamaj nútikiattajai” tímiayi. 4 Paasa aents péprunam jákarmatai̱ṉkia ya̱wá̱ yuáwartatui tura kampunniunam jákarmatai̱ṉkia chuaṉ yuáwartatui.

5 16:​5-6 Tura Paasa jakamtai ni uchirí̱ Ira Israernum úunt akupin ajasmiayi.

7 Kame Yúsnan etserin Jeúwai̱ni̱ Páasancha tura ní shuari̱miak ni yajauchiri̱n sumamtikiatin chichaman Yus akuptúkmiayi.

8 16:​8-10 Ira Paasa uchirí̱ jimiará uwí akupin ajas pujái̱ akupniu káruri̱ wainniu uuntri̱ Sempri Íran mantuamiayi. Kame Asa Jutanmaya̱ úunt akupin paintisiáti uwí akupuk pujái̱ Ira mantamnamiayi. Nuyá̱ Israernum Sempri úunt akupin ajasmiayi.

11 16:​11-14 Yus Jeún ujakmia imiatrusaṉ Paasa yajauch turutai̱ji̱a̱i̱ tura Israer shuaran yajauch túrumtikiamunam Sémprikia Páasan shuári̱ntiuk apartiuk tura amikri̱ntiuk máwarmiayi.

15 16:​15-20 Sémprikia Tírsanam siati tsawant akupin ajasmiayi túrasha Israer shuar armia nu ni anaṉkartamun anturkarmiayi. Tura suntara uuntri̱ Umpri úunt akupin atí tiármiayi. Nuyá̱ Tirsa péprunka Israera suntari̱ téntakarun nekáa Sémprikia akupniu je̱e̱n wayá̱ ekemak esáa jakamiayi. Yus íimmianum ti yajauch túrin asa ní yajauchiri̱ji̱a̱i̱ṉ asutniá jakamiayi.

Umpri Israernumia̱ úunt akupin

21 Nuyá̱ Israernumia̱ jímiar nakaakarmiayi. Tura emka nakaakamuka Jiniata uchirí̱ Típnin úunt akupin awajsatai tiármiayi. Tura chíkich nakaakaruka Úmprin úunt akupin awajsatai tusar wakeriarmiayi. 22 Túrasha Umpri nemariarmia nu aents Jiniata uchirí̱ Típnin nemariarmia núnaka nupetmakarmiayi. Típnikia jakamtai nuya̱ṉka Umpri úunt akupin ajasmiayi. 23 Tura úunt akupin Asa Jutanam akupin ajas traintiúnu uwí pujái̱ Umpri Israernum akupin ajasmiayi. Nuyá̱ Tírsanmasha sais uwí akupkámiayi. Tura ashí irurmaka tuse uwí akupin ajas pujusmiayi. 24 Tura Úmprikia kuit jimiará tarentuja̱i̱ náintian Semeran sumarkamiayi. Tura nú nainnium uunt pepru awajsámiayi. Tura náintniaka Semeran sumarka asa nú peprunka Samaria anaikiamiayi.

25 Kame Úmprikia Uunt Yus iismasha yajauchin túrak yaunchu akupin armia núja̱i̱sha naṉkaamas ti yajauchin túramiayi. 26 Jirupuám Nawata uchirí̱ túramia núnisaṉ nisha nu yajauchiniak túrak Israer shuarnasha tunaan túrumtikiawarmiayi. Kame ántar yusan tikishmátainiak nuja̱i̱ Israer shuara Yusri̱n Uunt Yusan akajiarmiayi. 27 Kame Umpri túramuri̱ ainia nusha tura ni takatrí̱sha núnisaṉ ni kakarmari̱ji̱a̱i̱ túramu ainia nuka Úunt Akupin Túrawarma Aatai̱ papinium ¿áakchamuk ainia? 28 Tura Úmprisha ni aparí̱ ayamprarmia nui̱ṉ ayamumiayi. Túrunamtai Samaria nuṉkanam iwiarsarmiayi. Nuya̱ṉka ni uchirí̱ Akaap akupin ajasmiayi.

Akaap Israernumia̱ úunt akupin

29 Asa traintiúchu uwí Jutanam akupin ajas pujái̱ Umpri uchirí̱ Akaap Israernum akupin ajasmiayi. 30 Kame Umpri uchirí̱ Akaap Israernum akupin ajas Samaria péprunam paintitús uwí pujusmiayi.

Túrasha Uunt Yus iisam yaunchu akupin pujuarmia núja̱i̱sha naṉkaamas Umpri uchirí̱ Akaap ti yajauchin túramiayi. 31 Tura Nawata uchirí̱ Jirupuám túramun túraksha yajauchichua núnis enentáimta asa Úmprikia nu arant Setunnumia̱ úunt akupniu Itpaara nawantri̱n Jisawíran nuatkamiayi. Túruna Páaran enentáimtak tikishmátmiayi. 32 Tuma asa Samaria nuṉkanam Paar enentáimtutai̱ je̱a̱n je̱a̱mmia nui̱ áestutai̱ncha najatamiayi. 33 Kame Akaapsha enentáimtakur tikishmáttai̱ atí tusa numiji̱a̱i̱ ántar yus Asera enentáimtutai̱n najanamiayi. Nuna túrak Akaap yaunchu akupin Israernum pujusár túrawarmia nuna naṉkaamas yajauchin túrak Uunt Yusan Israer shuara Yusri̱n akajkamiayi.

34 Tura Pitirnumia̱ Jiar pujumia nú tsawantin nisha Jirikiún ataksha je̱a̱mkamiayi. Kame Uunt Yus Nuuna uchirí̱ Jusuiji̱a̱i̱ tímiania tímiatrusaṉ ni uchirí̱ iwiá̱i̱ Apiráman iwiaakmari̱n akikmak tépakmari̱nkia aeprurmiayi. Núnisaṉ amúamu uchirí̱ Sekupa iwiaakmari̱n akikmak wáitiri̱nkia ikiusármiayi.*