1 Akupin

Saramúṉ Parauṉka nawantri̱n nuatkamia nu

3 Kame Saramúṉ ni je̱e̱ncha nuyá̱ Yusa Je̱e̱ncha tura Jerusaréṉ mátsatkamu wenuke̱ncha najanak amuutek Ejiptu nuṉka akupniúri̱n Parauṉkan ni shuari̱miamiayi. Tura nawantri̱n nuatruk nu nuwa̱n Tawit Péprunam itiamiayi. 2 Kame Uunt Yus je̱a̱ je̱a̱rchamu asamtai nu tsawantiṉkia ashí aents naint wákar Yusan áestin ármiayi.

Saramúṉ Uunt Yusan nekatai̱n seamia nu

3 Saramúṉ Uunt Yusan anea asa ni aparí̱ Tawit akupkámu chichaman umikmia nuja̱i̱ métek nisha túramiayi. Tuma asa aya náinniunmaṉ taṉkuncha núnisaṉ kuṉkuinniasha áestimiayi. 4 Tura akupniúsha Kapaunnum mura páantin aa asamtai wémiayi. Nui̱ Saramúṉ mir taṉkun takamtsuk nu áestutai̱niam Yusan áestuamiayi. 5 Saramúṉ Kapaunnum pujan kashi mesekranam Uunt Yus chicharuk “Ashí surusat tusam wakeram nu seattiá” tímiayi. 6 Tutai Saramúṉ aya̱k “Winia apar Tawit Ámin takartámin nekas ímiatrus Amiya̱ kanatsuk péṉker enentáimias nekasa nuja̱i̱ métek túramiayi. Nú arantcha Ámin enentáimturmas ti shiir wekasamiayi. Tuma asamtai ame waitnenkartutairmiji̱a̱i̱ winia apar ti shiir awajsam ni uchirí̱ akupin ajas ni pujutái̱ri̱n pujusti tusam yamái naṉkaamana ju̱ja̱i̱ métek súsaitme. 7 Túrasha winia Uunt Yusru, yamaikia uchi ai̱ṉ ame takartámniuka winia apar Tawit jaka asamtai akupin awajsáme. Tuma asan ¿itiur akupkáttaj? nunasha nékatsjai. 8 Ame takartámniuka Wi shuar ártí tusam anaikiaitmena nui̱ pujawai. Nu shuarsha ti untsurí ásar nekapmátásh nekapmarchamnia áiniawai. 9 Tuma asamtai Yusru, yajauch tura péṉkersha nekaatin núnisaṉ péṉker akupkatniusha Ame jintintruata. Warí imiá untsurí aents akupkatniuncha ¿yaki jeawaint?” tímiayi.

10 Tura Saramúṉ seammia nuna Uunt Yus péṉker enentáimtusmiayi. 11 Nuyá̱ Uunt Yus chicharuk “Núkap tsawant pujustin tura kuítriniatniusha núnismek ame nemasrum nupetkatniusha seatchame. Nuka seattsuk neka átin tura péṉker akupin átaj tusam núchik seatniume. 12 Wats iistá, ame seatmena núnaka tímiatrusnak túrattajai. Nekaata, neka átinniasha tura péṉker enentáimsam túratniuncha amastatjai. Tuma asamtai yáunchusha ámiji̱a̱i̱ métekka atsumiayi tura ukunmasha peṉké atsuttawai. 13 Tura kuítrintin ajastinniasha nuyá̱ naṉkamantu páantin átinniasha seatcha ámini̱ṉ amastatjai. Tuma asamtai ame pujuttamna nui̱ṉkia chíkich úunt akupin ámiji̱a̱i̱ métekka peṉké atsuttawai. 14 Ame apa Tawit Wi wakeramun núnisaṉ Wi akupkámun umikchamkia núnismek amesha umíakminkia núkap tsawant pujustinian amastatjai” mesekranam Uunt Yus Saramúṉkan tímiayi.

15 Nuyá̱ Saramúṉ shintiar mesekranmapitia tu enentáimsamiayi. Tura Jerusaréṉnum wémiayi. Nui̱ Yus Aentsja̱i̱ Chícham Najanamu Eṉketáiniam naka wajasmiayi. Tura Uunt Yusan takamtsuk aestua núnisaṉ shiir awajeaksha áestuamiayi. Nuna tura umik peṉkeri̱ yurumtain iwiarak ni takarniúri̱n ayurawarmiayi.

Úunt akupin Saramúṉ ti neka ajasma

16 Tura nu tsawantai̱ aya̱shi̱n kuitji̱a̱i̱ tsaṉkama nuwa̱ jímiar Saramúṉkan tariarmiayi. 17 Nui̱ taar chikichik nuwa̱ chichaak “Maa uuntru, wi ju̱ nuwa̱ja̱i̱ nú je̱a̱nmaṉ jímiarchik pujaji. Nui̱ pujusár emka wi uchin takusmajai. 18 Tura wi uchi takusmaka menaintiú tsawant naṉkaamasu ai̱ nisha takusmai. Nui̱ṉkia chíkich aentska peṉké atsawai. Antsu jímiarchik pujaji. 19 Túmarin ju̱ nuwa̱ ni uchirí̱n kashi teperak mamai. 20 Nuna tura kashi ajapéṉ ai̱ nantaki̱ wi ame takarniuitjiamna jú̱naka kanaran tepái̱ winia uchirun jurutuk níniun jakaan winia peakruí̱ aeprutkimiai. 21 Túramun tsawa̱a̱munam nantakin uchirun amuntsataj tusan iikman jakaan wainkiamjai. Túran tsawa̱rmatai émamkesan iikman winia uchirchan nekamjai” tímiayi.

22 Takui̱ chíkich nuwa̱sha chichaak “Wáitrame, ame uchirmeka jaka nuiti. Antsu winia uchirka iwiaakna ju̱i̱ti” takui̱ chíkich nuwa̱ chichaak “Atsá. Áminiuka jaka ju̱i̱ti antsu wíniaka iwiaakna nuiti” tusar úunt akupin pujamunam mai̱ tunai ajarmiayi.

23 Nuyá̱ úunt akupin chicharainiak “Winia uchirka iwiaakna ju̱i̱ti. Tura jaka ju̱ka áminiuiti” mai̱ tunai ajatsrumek tusa 24 nu arantcha úunt akupin Saramúṉ chichaak “Puyá̱ itiartitiarum” takui̱ puya̱n itiarmatai 25 “Uchi iwiaakuk jímiapetek nakakrum ákantsarmek susatarum” tímiayi.

26 Tura uchí iwiaaku nukurí̱ nuna antuk tí kuntuts enentáimiar úunt akupin Saramúṉkan chicharuk “Maaj uuntru, waitneasam úchikia máwaip. Antsu máatsuk nú nuwa̱ susata.” Takui̱ chíkich nuwa̱sha chichaak “Úchikia wíniaksha núja̱i̱nchuka áminiuksha áchati. Páchitsuk nakaktarum” tímiayi.

27 Nuna takui̱ úunt akupin chichaak “Nekas nukurí̱ṉkia ju̱i̱ti. Úchikia íwiaakuk susatarum” tímiayi.

28 Nu túramun ashí Israer shuar nekaawar ashamkar “Úunt akupniun Yus nekatai̱n súsaiti nekas métek sumamtikiatniun” tiármiayi.