1 Akupin

Akupin Saramúṉka yaintri̱

4 4:1-6 Úunt akupin Saramúṉ ashí Israernum akupin ajasmia nui̱ yáintri̱ṉkia ju̱ ármiayi. Yúsnan takarniuka Satuka uchirí̱ Asaríasauyayi. Papí ainkia Sesá uchirí̱ Irijurépja̱i̱ Ajíasauyayi. Akupin túramun papí áatniuka Ajirúta uchirí̱ Jusapátauyayi. Suntara úuntri̱ṉkia Juyata uchirí̱ Piniayásauyayi. Satukka Awiatárja̱i̱ Yúsnan takarin ármiayi. Natana uchirí̱ Asaríaska nuṉka tesarmánum akupin armia nuna úuntri̱yayi. Natana uchirí̱ Sawutka Yúsnan takarniuyayi tura úunt akupniu amikri̱yayi. Úunt akupniu je̱e̱n wáinniuka Ajisarauyi. Tura takatan takaras úunt akupniun akin armia nuna úuntri̱ṉkia Apta uchirí̱ Atuníramauyayi.

Nuṉka tesarmánum Saramúṉka yaintri̱ anaikiamu

7 4:7-19 Saramúṉka úunt akupin ajas pujus Israer nuṉkan tesar tuse úuntri̱n anair nui̱ apujsarmiayi. Nu yaintri̱ armia nuka tuke uwitin chikichik nantu úunt akupin atsumamun súsatin ármiayi. Tura ni náari̱ṉkia ju̱ ármiayi, Pinjiur, Pintikiár, Pinjisét, Piniaminatáp Saramúṉka nawantri̱n Tajatan nuatkauyayi, Ajirúta uchirí̱ Wanáa, Pinjipír, Itiu uchirí̱ Ajiniatáp, Ajimiás nisha Saramúṉka nawantri̱n Pasemátan nuatkamiayi, Usái uchirí̱ Wanáa, Jusapát Parúa uchirí̱, Erá uchirí̱ Semái, tura Urí uchirí̱ Jipir nisha aṉkant aṉkant ní nuṉke̱ni̱ṉ akupiármiayi. Ashí Jutá nuṉkanam chikichík akupin anaikiamuyayi.

Saramúṉ naṉkamantu ajasma

20 Israer shuar ti untsurí ásar nayantsa náikmiri̱ja̱i̱ métek nekapmarchamnia ármiayi. Ántsaṉ taramkaru ásar yurumáiniak úmuiniak ti shiir warasar matsamármiayi. 21 Tura Saramúṉka Yúpratis entsanmaya̱ juarki̱ Jiristíu aentsu nuṉke̱n Ejiptuja̱i̱ nakarnáiya tímianai ashí úunt akupin pujuarmia nuna akupmiayi. Tura uunt akiktin kuítian ikiaatkar suármiayi. Kame Saramúṉ iwiaaku pujumia nui̱ṉkia tuke turu wéarmiayi. 22 Nuyá̱ Saramúṉ ashí tsawant ni iniatairi̱ji̱a̱i̱ yuarmia nuka jú̱ ármiayi. Trikiu peṉkeri̱ ti péṉker nekeṉma sais mir saisiantu ritru nekapmamu nuyá̱ peṉké trikiu nekeṉma traise mir tusiantu ritru ármiayi. 23 Nu arant japanka nuyá̱ su japancha tura nanamtin yutai̱ nuéram armia nu yúamunka nekapmatsuk antsu tí peṉker waaka turu unueramun tiásan tura sa̱a̱kji̱a̱i̱ tsakatmainiamu painti waakan tura sian murikiun péṉker iwiarkamun yurumiarmiayi. 24 Warí Saramúṉka etsa̱ akatainmaani̱ Yúpratis entsanmaya̱ juarki̱ Típsanmaya̱ Kaasa nuṉká tímianai ashí úunt akupin armia núja̱i̱sha naṉkamantu ajasmiayi. Tuma asamtai niin ayaam matsamármia nu nuṉkanmaṉka ashí aṉkant ámiayi. 25 Tura Saramúṉ iwiaaku pujumia nui̱ṉkia Israer nuṉkasha núnisaṉ Jutá nuṉkanmasha áintsaṉ Tan nuṉkanmaya̱ juarki̱ Pirshiwia nuṉka tímianaiya̱ aentssha aṉkant pujuarmiayi. Tuma asamtai uwa ajancha tura ikiu numi arakma ajancha aṉkant aṉkant takaku ármiayi. 26 Nuna naṉkaamas ni káruri̱n japin kawái matsamtairi̱ṉkia kuatru míran takaruyayi. Nuyá̱ kawainium ekemkatniun unuimiátka armia nunasha tuse míran takaruyayi. 27 Tura Saramúṉnaka nuyá̱ niji̱a̱i̱ métek yurumiarmia nunasha ishichiksha táttsashti tusa uuntri̱ armia nu chikichkimsar ashí nantutin yurumkan táamtiktsuk suármiayi. 28 Núnisaṉ ni kawairi̱ncha ántsaṉ umpururi̱ kijin aentstai̱ armia nunasha tsawant tesamunam súsartin anairamu armia tímiatrusaṉ nu taṉku matsamármia nui̱ weriar sewata nuyá̱ sa̱a̱kniasha ikiatkar ayurtiarmiayi.

Saramúṉ tí neka asa naṉkamantu ajasma

29 Tura Yus Saramúṉnaka tí neka tura ti péṉker enentáimkia awajsámiayi. Tuma asa nayantsa náikmiri̱ írunna ímiatrus nisha tí neka ajasmiayi. 30 Tura Ejiptunmaya̱ núnisaṉ etsa̱ tatainmaya̱ áentsja̱i̱sha naṉkaamas tí nekauyayi. 31 Nu arant Istra shuar Etan núnisaṉ Majura uchirí̱ Iman, Kárkur, Tartasha kame ashí neka aents armia núja̱i̱sha naṉkaamas nékauyayi. Tuma asamtai ashí nuṉkanmaya̱ niin ayaam pujuarmia nuka Saramúṉkan nekaawarmiayi.

32 Núnisaṉ Saramúṉ nekatai̱ jintinkratma chichaman menaintiú mir aar tura kantanka mir seṉku áarmiayi. 33 Núnisaṉ ashí nuṉká tsapáu írunna nunasha unuimiátramiayi. Kame Ríwianunmaya̱ sétrun unuimiáttan juarki̱ tura niṉki ántar tsapáu ainia ímianai̱ ejekamiayi. Núnisaṉ yajasmancha nanamtinniasha japinias wekain ainia nunasha tura namaknasha mash unuimiátramiayi.

34 Tura Saramúṉ ti nékawai táman antukar ashí aents núnisaṉ chíkich nuṉkanmaya̱ úunt akupin armia nusha imiá péṉker neka asamtai anturkatai tusar káutiarmiayi.