1 Akupin
Yusa Uunt Je̱e̱ je̱a̱mtin iwiartukma
5 Nuya̱ṉka aparí̱ jakamtai Saramúṉ úunt akupin awajsamuiti táman Jiram Tírunmaya̱ úunt akupin antukmiayi. Tura Jiramka Tawitniaka tuke shiir awajin asa ni takarniúri̱n Saramúṉkan akuptúrmiayi. 2 Nui̱ṉkia Saramúṉ Jiraman chichaman akuptak 3 “Winia apar Tawitkia ni nemasri̱ji̱a̱i̱ mánikiar nupetmaktinian Uunt Yus yáiṉkiam aṉkant ajaamam ni Uunt Yusri̱ náari̱ji̱a̱i̱ je̱a̱n je̱a̱mprichmia nu ámeka nékame. 4 Tura Uunt Yus winia Yusur ashí nuṉkanam aṉkant awajtúsuiti. Tuma asamtai yamaikia ii nemasri̱sha nuyá̱ itiurchat pujakur wáitsatniusha atsawai. 5 Wats, nekaata. Yamaikia winia Yúsrun Uunt Yusa náari̱ji̱a̱i̱ je̱a̱n je̱a̱rtiaj tajai. Warí Uunt Yus chichaak ‘Ame uchirmin akupin awajsan ame pujutái̱rmin ekentsattaj nu Winia je̱a̱rnaka je̱a̱rtitiawai’ winia aparun Tawitian timia nútiksanak túrattajai. 6 Tuma asamtai yamaikia sétur numin Ríwianunmaya̱n tsupirturarat akuptúrkarta. Tura winia takartin ainia nunasha ame takartámniuja̱i̱ iruntrar takasarat tusan akuprartatjai. Ámin takartámin ainia núnaka ame urutmá akikiárta turuttiatam nuja̱i̱ métek akikiártatjai. Núnisaṉ amek nékame, Setunnumia̱ aentsja̱i̱ métek numi tsupiktinian unuimiátraruka wini̱ṉkia atsuiniawai” tímiayi.
7 Tura Saramúṉka chichame̱n antuk Jiramka ti warasmiayi. Tura chichaak “Warí ju̱ aentska ti untsurí áiniawai. Tuma ai̱ṉ Uunt Yuska Tawitian ju̱ aents akupkatniun uchin tí nekaan súsaiti. Tuma asamtai Uunt Yusa naari̱ ti shiir naṉkamantu awajsamu atí” tímiayi. 8 Nuyá̱ Jiram Saramúṉkan chichaman akuptak “Ame chícham akuptúrkamna nuna antukjai. Tura támena núnaka ímiatrusnak sétur numincha tura sepris numincha amastatjai. 9 Winia takartin ainia nuka Ríwianunmaya̱ jíinkiar nayantsanam jeartatui. Tura wikia papaṉman nayantsanmaani̱ ame turuttiatmena ímianai̱ ejeeturan atiran matsatkittiajme. Túramtai ámeka yarurmakta. Tura winia je̱a̱rui̱ aents irunainia nu ayuratin surustiniaitmena nusha ímiatrusmek surakum umirtukta” tu akuptúkmiayi.
10 Tura úunt akupin Jiramsha sétur tura sepris numincha ashí ni seamia nuna tímiatrusaṉ Saramúṉkan akuptúrmiayi. 11 Nuya̱ṉka Saramúṉ Jiraman ni yurumáwartinian 200.000 chaṉkin trikiu eṉkeá tura 440.000 ritru péṉkeri̱ asuitin susamiayi. Jú̱naka Saramúṉ Jiraman uwir uwir susamiayi. 12 Uunt Yus Saramúṉkan ni timia nuja̱i̱ métek nekatai̱n susamiayi. Kame Jiramja̱i̱ Saramúṉ péṉker pujuinia ásar métek chichaman najanawarmiayi.
13 Nuyá̱ akupin Saramúṉ akupniun akiktinia núnis takatja̱i̱ akikmakarat tusa 30.000 áishmaṉkan ashí Israernumia̱ṉ irurmiayi. 14 Tura chikichik nantutin takakmasarat tusa Ríwianunam 10.000 aentsun akupkar akupkar awajmiayi. Núnaka chikichik nantu Ríwianunam tura jimiará nantu ni je̱e̱n pujusárat tusa túrimiayi. Nu aents akupin akiktinian takakmainia nuna íistinniaka Atuníraman anaitiukmiayi. 15 Nuya̱sha Saramúṉka naintiar naintiar nuṉkanam kayá iwiarniunka 80.000 tura entsakár yarumniunka 70.000 míran takaruyayi. 16 Nu arantcha Saramúṉka 3.300 áishmaṉkan aya takatan iniamniunak anaikiarmiayi. Kame takakmainianka nú aents akupiármiayi. 17 Nuya̱ṉka úunt akupin chichaak “Kaya uunt ti kuit áiniana nu ukuintratarum iwiarkar Yusa Uunt Je̱e̱ je̱a̱mkur apujtuar ekentratin” tímiayi. 18 Nuya̱ṉka je̱a̱ je̱a̱min Saramúṉnasha tura Jiramnasha núnisaṉ Kipirnumia̱sha* Yusa Uunt Je̱e̱ je̱a̱mtinian numin nuyá̱ kayan péṉker iwiartukarmiayi.