1 Akupin

Yusa Uunt Je̱e̱ je̱a̱mmia

6 Israer shuar Ejiptunmaya̱ jíintramuka kuatrusiántu uchaintia uwí naṉkaamasu ai̱ Saramúṉ kuatru uwí Israernum úunt akupin ajas pujus Sep nantutin Uunt Yusa Je̱e̱n je̱a̱mtinian naṉkamamiayi. Sep támaka chikichik uwitin émka nantuka naṉkaamas nuyá̱ nantua nuiti. 2 Úunt akupin Saramúṉ Yusa Je̱e̱n je̱a̱mmia nuna esantí̱ṉkia sasaintia kuntu tura waṉkantí̱sha painti kuntu núnisaṉ yakiri̱ṉkia traintia kuntu ármiayi. 3 Tura Uunt Yusa Je̱e̱n wa̱i̱ti̱a̱i̱ Shiir Tesamunam náka amia nuna esantí̱ṉkia painti kuntu je̱a̱ waṉkantíni̱ tura je̱a̱ nákari̱ṉkia tias kuntu nekapkauyayi. 4 Núnisaṉ tanishnium áṉkamu initiaani̱ṉkia waṉkarman tura á̱a̱ni̱ṉkia uchichin najatkamiayi. 5 Yusa Je̱e̱n Shiir Tesamu tura Ti Shiir Tesamua nuja̱i̱ métek tanishnium a̱a̱ni̱ ikiáa je̱a̱mak tesar téntakmiayi. 6 Emka tesamu amia nuna waṉkantí̱ṉkia seṉku kuntuyayi. Nuyá̱ tesamuya nuka sais kuntuyayi. Nuna yakiini̱ tesamu waṉkantí̱ṉkia siati kuntuyayi. Tura tesakur tanish uyu̱mnáwa̱i̱ tusar tanishnium a̱a̱ni̱ numi awa̱a̱mpratniuka najatkamu ármiayi.

7 Tura Yusa Je̱e̱n je̱a̱mainiakka kaya takamcha káya jutainmaṉ iwiarkamuja̱i̱ je̱a̱miarmiayi. Tuma asa je̱a̱mainiamunmaṉka ajintramuksha núnisaṉ jachaja̱i̱ ántsaṉ chíkich jiru takakmatai̱ ainia nuja̱i̱ awatmasha peṉké antuichamiayi. 8 Nuṉkaani̱ tesamu amia nui̱ wá̱i̱ti̱a̱i̱ṉkia untsuurnumaani̱ ámiayi. Nuya̱ṉka ajapén tesamunam waka nuyá̱ tesamunam wákkuṉka péper watai̱ya̱ nuní̱ wátai̱yayi.

9 Kame Yusa Uunt Je̱e̱n Saramúṉ je̱a̱m amuk nuyá̱ numin wiyar sétur numi nakarmán anujramiayi. 10 Yusa Uunt Je̱e̱ tanishri̱n je̱a̱m ikiáa tesar téntakmiayi. Nu tesakarma yakiri̱ṉkia seṉku kuntu ármiayi. Nuka sétur numi nakarmája̱i̱ wiyantrukar tanishnium achimtikramu ármiayi.

11 Nuyá̱ Uunt Yus Saramúṉkan chicharuk 12 “Ju̱ Yusa Uunt Je̱e̱ je̱a̱mmena ju̱i̱ péṉker túrakminkia núnisaṉ Wi ujajmena nu ashí takaakum Winia akupkámurja̱i̱ métek tuke umíakminkia ame apan Tawitian tímiajna nuna ámiji̱a̱i̱ ashí umiktatjai. 13 Núnisnak Wikia Israer shuarnum tuke pujuttajai. Tuma asan peṉké ikiukchartatjai” tímiayi Uunt Yus.

14 Nuya̱ṉka Saramúṉ Yusa Uunt Je̱e̱n je̱a̱m amukmiayi. 15 Tura kayaja̱i̱ je̱a̱mmia asamtai tanishnum initiaani̱ṉkia nuṉkaya̱ juárkin wiyaṉkeya̱ tímianai sétur numi nakarmán anú anujtú awajsámiayi. Nuyá̱ tépakmari̱ncha sepris numi nakarmán anujturmiayi. 16 Núnisaṉ Yusa Je̱e̱n initiaani̱ painti kuntu nekapma sétur numi nakarmája̱i̱ nuṉkaya̱ juárkin yakisha anú anujtú awajsámiayi. Nuka Ti Shiir Tesamuiti. 17 Tura Yusa Je̱e̱n Shiir Tesamua nuna esantí̱ṉkia kuaraintia kuntuyayi. 18 Ántsaṉ tanishri̱ṉkia initiaani̱ sétur numiji̱a̱i̱ apakiarma asa kayarí̱ṉkia páantchauyi. Túrar nui̱ yuwí núnisaṉ kuku̱j takiṉkiáru nakumkar najankamuyi. 19 Núnisaṉ Ti Shiir Tesamu initri̱n Uunt Yus Aentsja̱i̱ Chícham Najanamu Eṉketai̱ apujsatniuncha ti shiir iwiarturmiayi. 20 Nuyá̱ Ti Shiir Tesamu initri̱ nekapmarmaka esantí̱sha waṉkantí̱sha tura yakiri̱sha painti kuntu mash métek ármiayi. Nunasha aya péṉker kúriji̱a̱i̱ṉ^k eṉkekmiayi. Ántsaṉ Yus áestutai̱ncha sétur numiji̱a̱i̱ eṉkekmiayi. 21 Nuya̱ṉka Saramúṉ Yusa Je̱e̱n initiaani̱ṉkia kuriji̱a̱i̱ iwiarak aya kúrik awajsámiayi. Núnisaṉ Imiá Shiir Tesamunmaṉka naka kuri íkiarman nenak iniaisámiayi. 22 Túrak Yusa Je̱e̱n initiaani̱ṉkia takamtsuk kurimiak núnisaṉ Ti Shiir Tesamunam Yus áestutai̱ eem apujsamuya nunasha kurimpramiayi.

23 Núnisaṉ Imiá Shiir Tesamua nui̱ init, uriwiu numiji̱a̱i̱, Yusa suntari̱ uuntri̱ kirupíṉkian jímiaran nakumak najanamiayi. Tura nuna náyari̱ṉkia tias kuntu ármiayi. 24 Tura chikichik kirupíṉkia nanape̱nka seṉku kuntu núnisaṉ chíkich nanape̱sha métekeyayi. Tuma asa mai̱ nanape̱ nekapmatamka tias kuntu ármiayi. 25 Núnisaṉ chíkich kirupíṉsha tias kuntu asa íimtintri̱sha métek asar mai̱ núniniak najanamu ármiayi. 26 Tura náyari̱sha tias kuntu ármiayi. 27 Saramúṉsha nuna najanak Imiá Shiir Tesamunam nui̱ ajapén awajsarmiayi. Tura ayapá̱rar najanamu asar chikichik nanape̱ tsakari̱ji̱a̱i̱ métek antiniaisar wajarmiayi tura chíkich nanape̱ja̱i̱ṉkia tanishan antiyarmiayi. 28 Núna tura nayaimpinmaya̱ suntarnasha mai̱ kurimkiamiayi. 29 Tura Yusa Je̱e̱ tanishri̱n á̱a̱ni̱sha initiaani̱sha kuchamkar Yusa suntari̱ úuntri̱n núnisaṉ kuṉkukin nuyá̱ kuku̱jniasha nakumkar péṉker iwiarkarmiayi. 30 Nékatka Shiir Tesamu tura Imiá Shiir Tesamu pakari̱nkia mash kurimkiamiayi. 31 Núnisaṉ Imiá Shiir Tesamu wá̱i̱ti̱a̱i̱ri̱ pauri̱ṉkia seṉku yantamtinian tura wáitiri̱nkia uriwiu numiji̱a̱i̱ najatkamiayi. 32 Tura jimiará wáitinkia uriwiu numiji̱a̱i̱ najatamiayi. Nui̱ kuchamak Yusa suntari̱ úuntri̱n kuṉkukniasha tura kuku̱j taki̱a̱run nakumar kurimkiamiayi. 33 Nútiksaṉ Yus Je̱a̱ wá̱i̱ti̱a̱i̱ri̱ pauri̱ncha kuatru yantamtinian uriwiu numiji̱a̱i̱ najatamiayi. 34 Antsu waiti jímiar iṉkiumtikiar najanamua nuka ákantsarik tesar sepris numiji̱a̱i̱ najatamuyi. Tuma asa kuatrua nuka aṉkant aṉkant ayantármin najatamuyi. 35 Tura nú waitinmasha Yusa suntari̱ úuntri̱n nuyá̱ kuṉkukin tura kuku̱j taki̱a̱run nakumak kuchamar najana kuri péṉker iwiaramuja̱i̱ kurimkiamiayi. 36 Nuyá̱ initia á̱a̱ri̱ṉkia kaya pakamár iwiaramuja̱i̱ menaintiú pekak apujramiayi. Tura sétur numija̱i̱ṉkia chikichkí pekakmiayi.

37 Saramúṉ náamak kuatru uwí pujus Sep nantutin Uunt Yusa Je̱e̱n je̱a̱mtinian náṉkamuk tépakmari̱n kayan aeprurmiayi. 38 Tura Saramúṉ úunt akupin ajas aunse uwí nuyá̱ Pur nantutin Yusa Je̱e̱n itiur je̱a̱mtiniuya nuna tímiatrusaṉ je̱a̱mmiayi. Pur támaka uchu nantu taka tamaiti. Tura Saramúṉsha Yusa Je̱e̱n siati uwitin je̱a̱m amukmiayi.