1 Akupin

Saramúṉka chíkich je̱e̱ armia nu

7 7:​1-5 Nuya̱ṉka Saramúṉ ni je̱e̱n je̱a̱muk traise uwí pujusmiayi. Nunisaṉ Ríwianunmaya̱ Kampunniu Je̱e̱ táman esantí̱ṉkia sian tura waṉkantí̱ṉkia seṉkuintia nuyá̱ yakiri̱ṉkia traintia kuntu jean sétruja̱i̱ je̱a̱mmiayi.

Áṉkamuri̱ṉkia menaintiú pekakma ju̱í̱ni̱sha tura á̱a̱wini̱sha nútiksarik íṉkiuasmak íṉkiuasmak pekakma ármiayi.

6 Núnisaṉ nu je̱a̱nam waya̱tniuncha Páunmaṉ Wa̱i̱ti̱a̱i̱ tutai esantí̱ṉkia seṉkuintia tura waṉkantí̱ṉkia traintia kuntu jean najanamiayi. Tura nuna nákari̱n chíkich wa̱i̱ti̱a̱i̱ páurtinian eem té̱a̱mun najanamiayi.

7 7:​7-8 Ántsaṉ Pujusar Sumamtiktai̱ je̱a̱ncha sétur nakarmája̱i̱ anujturmiayi. Tura ni pujumia nusha núnisaṉ ni nuwé̱ Parauṉka nawantri̱ je̱e̱sha nútiksarik je̱a̱mkamu ármiayi.

9 7:​9-12 Kame nu je̱a̱ armia nuka á̱a̱ri̱sha tura initri̱sha aeprukmari̱ya̱ juarki̱ yakiri̱sha kaya tí kuit ainia nu tsupirar iwiarkarma chíkichkia tias nuyá̱ chíkichkia uchu kuntu jea áiniaja̱i̱ je̱a̱mkamu ármiayi. Nuyá̱ a̱a̱ri̱ wenuke̱nka kaya menaintiú pekakar tura sétur nakarman winia̱rar Uunt Yusa Je̱e̱n je̱a̱miarmia tímiatrusar najankarmiayi.

Yaṉkú jiruja̱i̱ ukurkamu

13 7:​13-14 Tura úunt akupin Saramúṉka Neptarí shuarnumia̱ wajé̱ uchirí̱ Jiraman yaṉkú jiruja̱i̱ takakmastinian tí neka asamtai untsuk itiamiayi. Aparí̱ṉkia Tírunmaya̱ shuarauyayi. Jiramka yaṉkú jiruja̱i̱ tuke takakma asa tí neka tura énentaimsaṉsha ní wakeramun najanin asa úunt akupin timia núnaka tímiatrusaṉ najankamiayi.

15 7:​15-20 Jiramka jimiará paun yaṉkú jiruja̱i̱ mai̱ najanamiayi. Tura nuna esantí̱ṉkia tiasiúchu nuyá̱ kampuntíṉkia tuse kuntu jeá ármiayi. Tura ekenkatniuncha jímiaran yaṉkú jiru unuikmaja̱i̱ seṉku kuntu jean tura siati nayamun mai̱ najanamiayi. Nuya̱ṉka nuna nukukat tusa tusiantu munchi nakumkar najankamun jimiará pekak ekeempratniun najankamia nuna téntakmiayi. Wá̱i̱ti̱a̱i̱niam ekeempratin najatamuya nui̱ṉkia ririu kuku̱jia núnin kuatru kuntu jeá najankamuyayi.

21 7:​21-22 Nuya̱ṉka Uunt Yusa Je̱e̱n wá̱i̱ti̱a̱i̱niam paun ekeniarmiayi. Nuṉkaani̱ ekenmianka Jakin tura arakaani̱ ekenmianka Puas* anaikiamiayi. Núnisaṉ nuna ekeni̱ umíak páunam yakiini̱ ririu kuku̱j najankamu ikiursarmiayi.

Entsa yaratai̱ uunt yaṉkú jiruja̱i̱ najanamu

23 7:​23-26 Nuya̱ṉka entsa yaratai̱ úuntan tenteen yaṉkú jiru unuikmaja̱i̱ wa̱a̱ri̱ waṉkantí̱ṉkia tias tura yakiri̱ṉkia seṉku nuyá̱ téntakmari̱ṉkia traintia kuntu jean najanamiayi. Tura chikichik kuntu nekapmamunam tias tias tsapa nakumprar téntakmauyayi. Túrasha nui̱ṉ áchitra asa chikichkíyayi. Nuka tuse waaka áishmaṉ nakumprar najankamunam ekemiayi. Nú waakasha menaint nuṉkaani̱ tura menaint arakaani̱ nuyá̱ menaint etsa̱ tatainmaani̱ ántsaṉ menaint etsa̱ akatainmaani̱ íimiak ármiayi. Tura nupa̱nti̱ṉkia chikichik uwej jeá nuyá̱ éntsaka kuaraintia kuatru mir ritru piákminian najanawarmiayi.

Entsa yaratai̱ uchich ekentsar téter jutai̱ tias najankamu

27 7:​27-29 Núnisaṉ ekentsar téter jutai̱n yaṉkú jiruja̱i̱ kuatru nawe̱nniun tiásan najankamiayi. Nuna waṉkantí̱ṉkia kuatru tura esantí̱sha kuatru nuyá̱ yakiiri̱ṉkia menaintiú kuntu jeá ármiayi. Núnisrik ekentsatniuri̱sha tura winiaṉkesha najatkamu ármiayi. Nu winiaṉkenka úunt ya̱wa̱ tura waaka áishmaṉ nuyá̱ kirupín nakumkar najankamu ármiayi. Tura nuna nuṉkaani̱sha kuku̱j nakumprar najankamuyayi.

30 7:​30-33 Tura ekentsar téter jutai̱ tias najankamu armia núnaka kuatru nawe̱ téter jutai̱n aya jírunak najatkarmiayi. Nuka karu nawe̱a núnin ásar yakiiri̱ṉkia chikichik kuntu nuyá̱ ajapén ármiayi.

34 7:​34-37 Kame kuatru yantamén nawe̱ armia nuka nui̱ṉ áchitrauyayi. Núnisaṉ ekeemtai̱ najatamunmasha kirupín tura úunt ya̱wa̱ nuyá̱ kuṉkukin najankarmiayi. Ashí jú̱naka jiru unuikmaja̱i̱ núninniak tura nú nekapkanak najankarmiayi.

38 7:​38-39 Nuya̱ṉka entsa yaratai̱ uchichin tiásan uchusiántu uchaintia ritru tura tenterí̱ṉkia kuatru kuntu jean yaṉkú jiruja̱i̱ najankamiayi. Tura ekentsar téter jutai̱n tiásan najanamia nui̱ ekentrámiayi. Nuya̱ṉka seṉku nuṉkaani̱ tura seṉku arakaani̱ apujsarmiayi. Núnisaṉ entsa yaratai̱ úuntan najanamia núnaka nuṉkaani̱ etsa̱ tatainmaani̱ apujsamiayi.

Uunt Yusa Je̱e̱n takatai̱ yaṉkú jiruja̱i̱ najankatin

40 Núnisaṉ Jiramsha ichiṉnan shikikiá ajaptai̱n nuyá̱ amamkun najankamai. Núnaka úunt akupin Saramúṉnan tura Uunt Yusa Je̱e̱n takakmastin armia nuna Jiram ashí najanak umikmai. 41 Nuyá̱ jimiará páunam yakiini̱ ákantsaṉ pau náṉkatkamuri̱n jimiará tenten najana tura neka núninian najata éṉkekmai. 42 Kame munchí kuatrusiántun wear najankamia núnaka chikichik pauri̱n yakiini̱ tenté nekaja̱i̱ eṉkekmauya nui̱ emka tusiantuja̱i̱ téntak nuyá̱ ataksha tusiantuja̱i̱ téntakmai. Tura chíkich pauri̱ncha nútiksaṉ túramai. 43 Tura tias awa̱tai̱ kaṉketái̱rtinian nuyá̱ entsa yaraktinniasha tiásan yaṉkú jiruja̱i̱ṉ najankamai. 44 Núnisaṉ tuse waaka nakumak najanak nuna tuntupén ekeni̱ entsa pajamtai tí uuntan najanamai. 45 Nuyá̱ Jiram ichiṉnancha shikikiar ajaptai̱ncha amamkuncha najankamai. Tura Uunt Yusa Je̱e̱n Saramúṉnan najankama nuka yaṉkú jiru péṉkeri̱ji̱a̱i̱ najankamai. 46 Tura úunt akupin Jurtanka pakarí̱n nai náikmirmatauya nui̱ Sukut tura Saretán yantam yaṉkú jirunka unuik iminiak péṉker iwiartukarmai. 47 Yaṉkú jiruja̱i̱ Yusa Uunt Je̱e̱n takakmastinian najankama núnaka nekapmachmin asamtai Saramúṉka yaṉkú jiru kijintri̱nkia nekapmachmai.

Nékatka Shiir Tesamunam takatai̱ kuriji̱a̱i̱ najankamu

48 Nuiṉkia Saramúṉsha Yusa Je̱e̱n init Yúsnan takarkur takatai̱n najankamai. Yus áestutai̱n tura paṉ najankar awa̱tai̱ncha kúriji̱a̱i̱ṉ najankamai. 49 Nútiksaṉ asuiti yarar ekemákar ekentai̱n untsuurnumaani̱ seṉku tura menanmaani̱sha seṉku aya kúriji̱a̱i̱ṉ najankamai. Nuyá̱ Imiá Shiir Tesamu nákari̱n ekemátaincha kuku̱jrar najanamun tura áesir jutai̱ncha ashí aya kúriji̱a̱i̱ṉ najankamai. 50 Nu arantcha piniṉnasha tura ekemátai̱ri̱ncha, amamkuncha, uṉkushpincha kuṉkuin eṉkea áestutai̱ncha aya kúriji̱a̱i̱ṉ najankamai. Núnisaṉ Yusa Je̱e̱n nékatka wáitiri̱ nuyá̱ Shiir Tesamu tura Imiá Shiir Tesamu wáitiri̱ armia nunasha urantái̱ri̱ perkamuri̱ncha kuriji̱a̱i̱ najankamai. 51 Nuní̱ Saramúṉ Yusa Je̱e̱n Yúsnan takarkur takakmatai̱n najanak umirmai. Tura úunt akupin Saramúṉsha ni aparí̱ Tawit Yus súsatniun akantúkuya nuna kurincha kuítniasha ántsaṉ ashí Yúsnan takarkur takakmatai̱n ikianak Uunt Yusna kuít eṉketai̱niam ikiusmai.