1 Akupin

Saramúṉ Yusna Eṉketáin Yusa Je̱e̱n jukimiu

8 Nuya̱ṉka Saramúṉ Israer shuara úuntri̱ncha tura ashí wea uuntri̱ armia nunasha Jerusaréṉnum irurarmiayi. Nusha Yus Aentsja̱i̱ Chícham Najanamu Eṉketai̱ Tawitia Pépruri̱ya̱ Seúnnumia̱ itiatai tusar túrawarmiayi. 2 Nuyá̱ úunt akupin Saramúṉsha Itianím nantutin, siati nantu taka ai̱, ashí Israer shuar áishmaṉ iruntrarmatai namperan najanamiayi. 3 8:3-4 Kame nui̱ Israera úuntri̱sha tura Yúsnan pujurin armia nusha nuyá̱ Riwí shuari̱ji̱a̱i̱ Yus Aentsja̱i̱ Chícham Najanamu Eṉketáincha núnisaṉ Yus Shiir Awajtai̱ Je̱e̱n tura Yúsnan takarkur takatai̱ nui̱ irunmia núurtiuk irunturar júkiarmiayi. 5 Úunt akupin Saramúṉ tura ashí Israera shuari̱ji̱a̱i̱ Yus Aentsja̱i̱ Chícham Najanamu Eṉketáin irunturarmia nu murikniasha, waakancha Yusan áestuiniak nekapmarchamnia mantuawarmiayi. 6 Yúsnan pujurin nu Eṉketáin Yusa Je̱e̱n Imiá Shiir Tesamunam, Yusa suntari̱ uuntri̱ nakumkamu mai̱ nanape̱ antiniais wajainiamunam weak apujsarmiayi. 7 Nui̱ Yusa suntari̱ uuntri̱ nakumkamu wajarmia nu Yusna Eṉketai̱ pujamunka nanape̱ja̱i̱ nukuakuyayi. Núnisaṉ yanaktintri̱n weakmari̱ncha nanape̱ja̱i̱ naṉkakauyayi. 8 Yusna Eṉketai̱ wearkamuri̱ ti esaram ásar jú̱ nekatka Shiir Tesamunmaya̱ Yusa Uunt Je̱e̱ya̱n wainkiamniauyayi, antsu á̱a̱ya̱ṉka wáinkiachminiauyayi. Kame yamaiya̱ ju̱i̱sha nuka nui̱ṉ juákuiti. 9 Nú Eṉketáiniam aya jimiará kaya eṉkemniuyi. Kame Israera shuari̱ Ejiptunmaya̱ jíinkiar tura Urep nainnium jeawarmatai Uunt Yus Israera shuari̱ji̱a̱i̱ chichaman najanamun Muisais nu jimiará kayanam nu chichaman áarmiayi. Tura tuke Urep nainnium pujus Muisais nu kayan Yusna Eṉketáiniam eṉkeamiayi. 10 Tura Yúsnan pujurin ainia nu Imiá Shiir Tesamunmaya̱ jíinkiarmatai Uunt Yusa Je̱e̱n yuraṉkim piákmiayi. 11 Nuyá̱ Yúsnan pujurin armia nusha yuraṉkim je̱á̱ piákmatai takakmastinian tujintkiarmiayi. Warí Uunt Yusa winchari̱ Uunt Yusa Je̱e̱n piákmiayi. 12 Nuyá̱ Saramúṉ chichaak “Uunt Yus nekas kiritniunam pujuwitjiai tíniuiti. 13 Túrasha yamaikia peṉkeri̱ pujutai̱niam tuke pujusai tusan jearmiajme” tímiayi.

14 Nuyá̱ úunt akupin ashí Israer shuar irunar wajarmia nuní̱ ayantár shiir awajsarmiayi. 15 Nuya̱ṉka chichaak “Uunt Yus Israer shuara Yusri̱ shiir awajnásti. Warí winia Aparun Tawitian nekas túratniuitjiai tusa jú̱nis tíchamkia 16 ‘Israera shuari̱n Ejiptu nuṉkanmaya̱n jí̱i̱rmiaj nú tsawantai̱ya̱sha ashí Israer weanmaya̱ tu péprunmaya̱ṉkesha winia Naar shiir awajsatin je̱a̱ je̱a̱mtinniasha anaikiachmiajai. Antsu Tawitniaka Israer shuara uuntri̱ atí tusan anaikiamiajai.’ 17 Kame winia apar Tawitcha Uunt Yus Israer shuara Yusri̱ naari̱ naṉkamantu awajtak je̱a̱ je̱a̱mtinian ti enentáimtusmiayi. 18 Túrasha Uunt Yus winia aparun Tawitian chicharuk ‘Ame Winia naar naṉkamantu awajsataj tusam je̱a̱ je̱a̱mtin wakerukuitiam nusha nekas péṉker enentáimsaitme. 19 Túrasha ámeka je̱a̱rtishtatme antsu ame uchiram akiiniattana nu Winia naar naṉkamantu awajsatin je̱a̱nka je̱a̱rtámtiatui’ tímiayi Yus. 20 Tura Uunt Yus nekas túrattajai timia nu uminkia asamtai winia apar Tawit pujutai̱niam Israer shuara akupniúri̱ ajasan pujusjai. Tuma asan Israer shuara Uunt Yusri̱ naari̱ naṉkamantu awajtai̱ je̱a̱n je̱a̱rjiai. 21 Yaunchu Ejiptu nuṉkanmaya̱ ii we̱a̱trí̱n ji̱i̱r Yus Aentsja̱i̱ Chícham Najanamu Eṉketáiniam chumpiru apujsatniun iwiarturjai” tímiayi.

Saramúṉ Yusa Je̱e̱n takakmatan juáruk seamu

22 Nuya̱ṉka Saramúṉ Uunt Yus áestutai̱niam ayan wajas Israer shuar pujuiniamunam ni uwejé̱n nayaimpinmaani̱ takuí wajas 23 Yusan áujeak “Maa, Uunt Yus Israer shuara Yusri̱ya nayaimpinmasha tura nuṉkasha Ámiji̱a̱i̱ métek chíkichkia peṉké atsawai. Tura Ámin takartámin nekas enentáiji̱a̱i̱ Ámin umirtamainia nu shuar Ame chícham najanamu ímiatrusam umíakum waitnenniuitme. 24 Winia apar Tawit Ámin takartámin nekas túrattajai tímiam nuka tímiatrusmek yamái ii wáinjinia ju̱ja̱i̱ umikiume. 25 Yamaikia Uunt Yus Israera Yusri̱ya, winia apar Tawit Ámin takartámin nekas túrattajai tusam chicharkum ‘Ame winia umirtamna ímiatrusaṉ ame uchirmesha umirtuiniakui̱ṉkia amé weanmaya̱ṉ Israer shuarnum úunt akupin peṉké táaschattawai’ tímiame. 26 Maa, Israer shuara Yusri̱ya winia apar Tawit Ámin takartámin tímiamna nuka yamaisha tímiatrusaṉ atí.

27 Warí Ámeka nayaimpir nayaimpir pujakmesha náṉkatkachuitme. Tímianaitiatmesha wi ju̱ nuṉkanam je̱a̱mjana ju̱i̱sha ¿itiurak pujustam? 28 Maa, Uunt Yusa winia Yusru, yamái Ámin takartámin seatmana nu anturkata. 29 Ju̱ Je̱a̱ ‘Winia náarun apujsattajai’ tiniu asakmin ju̱ Je̱a̱nam iimsan tsawai̱sha káshisha Ámin takartámin seatmana nu anturkata. 30 Tura Ámin takarniuitjiamna ju̱ núnisaṉ Amé aentssha Yusa Je̱e̱ni̱ iimsar seatmainia nu anturkarta. Nayaimpiniam pujutái̱rmin pujamna nuya̱ṉ seatmainia nu anturkaram tsaṉkurarta.

31 Shuar ni írutkamuriin tunaan túrayat étserchakuiṉkia ni írutkamuri̱ Uunt Yusa Je̱e̱n Yus áestutai̱niam jukim chichaak ‘Yus iirui peṉké túrachjai’ tákuiṉkia 32 Ámeka nayaimpinmaya̱n anturkam ní turamuja̱i̱ métek túrawarta. Péṉkera nu shuar waitnentrata tura tunaan tura nuka sumamtikiata.

33 Amé shuar Amiin tunaan túrawaru ásar ni nemasri̱ nupetkaram ataksha Amiin enentáimturmarar Ame náarmin shiir awajénak tura ju̱ Je̱a̱nam áujtamsar seatmainia nu 34 Ámeka nayaimpinmaya̱n ame shuarum anturkaram Israera tunaarí̱ tsaṉkuraram ni we̱a̱tri̱ nuṉká súsarmiamna nui̱ṉ awakeararta.

35 Amiin tunaan túrawaru ásarmatai yumi yútumtikchakmin wáitiainiak Ame Náarmin shiir awajénak ni tunaari̱n iniaisar tura ju̱ Je̱a̱nmaani̱ iimsar seatmainiakui 36 Ámeka nayaimpinmaya̱n anturkaram Ámin takartámin ainia nuna tunaarí̱ tura Israer shuara tunaarí̱sha tsaṉkuraram péṉker túrin árat tusam jintintiáwarta. Túram nuṉka súsarmiamna nui̱ yumisha yútumtikiata.

37 Ju̱ nuṉkanam tsukasha, araka ikiajíncha, manchisha, maasha, ántsaṉ némas ii nuṉke̱n matsamprutmakakrin tura náṉkamas suṉkur tura emesma ainia nu akui 38 yaaksha núja̱i̱nchuka ashí Israer shuarsha ni tunaari̱n nekaamawar ju̱ Je̱a̱nmaani̱ uweje̱ takuí seatmamtai̱ṉkia 39 nayaimpiniam pujutái̱rmin pujamna nuya̱ṉ tsaṉkuram ni enentái̱n takasam ni túramuri̱ji̱a̱i̱ métek súsarta. Warí ¿amekchak ashí aentsu enentái̱ nékaitiam? 40 Nu túram tuke tsawant ii we̱a̱tri̱ ju̱ nuṉka súsarmiam ju̱i̱ pujuiniak Ámin ashampramkar matsamsarti.

41 8:41-42 Núnisaṉ Israer shuarcha yajá nuṉkanam pujá Ame Náaram naṉkamantua nuna antukar tura ame kunturam ti kakarma nu iwiaintiukam kakaram túramna nuna antuk nekaawar Ámin pachitmasar ju̱ Je̱a̱nam taar seatmainiakui, 43 Ame pujutái̱ram nayaimpiniam pujamna nuya̱ṉ ashí seatmainia nu anturkarta. Túram Israer shuar Ámin nekarmainia núnisaraṉ ashí nuṉkanmaya̱ aents ame Náarmin nekaawar ashampramkartatui. Núnisaṉ ju̱ Je̱a̱n je̱a̱rniuitjiamna ju̱i̱ aents Ame Náarmin pachis seatmainiakui Ame anturkartatme.

44 Amé shuar ni nemasri̱ji̱a̱i̱ mesetan najanat tusam akupkartatmena nui̱ wésar Uunt Yusan ame anaikiamu péprunam Jerusaréṉnum tura Je̱a̱n ame Náaram shiir atí tusan je̱a̱rniuitjiamna nuní̱ iimsar seatmainiakui 45 Ámin seatmainia nuka Ame nayaimpinmaya̱ anturkaram nekasa nuja̱i̱ métek ayamprúkarta.

46 Nisha Amiin tunaan túrawarmatai (kame aents tunáa túrichuka atsawai) Ame kajerkaram ni nemasri̱n surukaram yajaksha tura tíjiu̱chiksha ni nemasri̱ nuṉke̱n yaruakma nui̱ pujusár 47 ataksha ni enentái̱ji̱a̱i̱ṉ Ámin enentáimturmasar waketkiar seatmainiak ‘Nekas tunáa túraitji tura Yusan nékachu shuar túruinia núnisar mui̱jmiai̱ túraitji’ tiar 48 ni nemasri̱ nuṉke̱n yaruakma pujusár ataksha nekas enentáiji̱a̱i̱ tura wakaní̱ji̱a̱i̱ Ámin enentáimturmasar ni we̱a̱trí̱ nuṉke̱ susamiam nui̱ ame anaikiamu péprunam Je̱a̱n je̱a̱rniuitjiamna nuní̱ Ame Náarmin shiir awajsamu atí tusa seatmainiakui 49 Ámeka nayaimpiniam pujutái̱rmin pujamna nuya̱ṉ anturkarta. Tura Ámin seatmainia nuka nekasa nuja̱i̱ métek ayamprúkarta. 50 Amé shuar Amiin tunaan tura ashí yajauch túrawarmia nu tsaṉkurarta. Túram chíkich nuṉkanmaya̱ aents Israer shuaran achirar yaruakarmia nu waitnentrarat tusam wáitnenmai íimtikrarta. 51 Warí niṉkia Áminiu tura Ame anaikiamu áiniawai. Kame jiru imintiai̱ tsue̱ra ímianunam núnisrum ti wáitkiasma matsatainia Ejiptu nuṉkanmaya̱ ji̱i̱kiarmiame.

52 Yamaikia iini̱ni̱ íimsam pujusam Ame takartámin tura Israer shuarumsha ashí seatmainia nusha tuke anturkaram yaiṉkiarta. 53 Maa, Uunt Yusru, ii we̱a̱tri̱ Ejiptu nuṉkanmaya̱ júsaram ame takartámin Muisais chichareakum tímiam nuja̱i̱ métek ashí nuṉkanmaya̱ja̱i̱sha naṉkaamas Israer shuarka winia árat tusam akankámiame” Saramúṉ Yusan áujtak tímiayi.

54 Tura Saramúṉ Uunt Yus taṉku maar áestutai̱niam naka tikishmar tsuntsumá nayaimpinmaani̱ uwejé̱n takuí Uunt Yusan áujeasua umik wajakmiayi. 55 Nuyá̱ wajaki̱ ashí Israer shuar irunar matsamármia nuna shiir awajás kakantar chicharainiak 56 “Israer shuaran péṉker pujustinian súsaru asamtai Uunt Yusa naari̱ shiir awajsamu atí. Yaunchu ni takarniúri̱ Muisaisai̱ni̱ ashí péṉkeran nekas túrattajai timia núnaka chikichkiṉkisha iniaitsuk tímiatrusaṉ umikiuiti. 57 Uunt Yus ii Yusri̱ ii we̱a̱trí̱n wáinkiarmia núnisaṉ iincha peṉké ikiurmatsuk waitmaktai. 58 Yaunchu ii we̱a̱trí̱n akupkámu umiktin chichaman timia nuja̱i̱ métek Niṉki ii enentái̱n pujurtamkurin Ni wakeramu umikiartai. 59 Wi Uunt Yusan ii Yusri̱n sean umikiajna ju̱na tuke enentáimtus winiasha tura ashí Israer shuartincha ashí tsawant atsumainiajnia nuna tsawai̱sha, káshisha wainiak nekas túratniua nuna umikti. 60 Kame umikmatai ashí nuṉkanmaya̱ aents nekaawar ‘Uunt Yus nekas Yúsaiti, tura chíkichkia peṉké atsawai’ tiártatui. 61 Ju̱ tsawantinkia Uunt Yus ii Yusri̱ nekas enentáiji̱a̱i̱ enentáimtakrum ni akupkámu chichamsha umirumna núnis nekas enentáiji̱a̱i̱ Yus tuke enentáimtakur núnisrik ni akupkámu chichame̱sha tuke umin átatji” tímiayi Saramúṉ.

Yusa Uunt Je̱e̱ je̱a̱mma námper najanamu

62 Nuyá̱ úunt akupniusha tura ashí Israer shuarsha Uunt Yus íimmianum taṉkun áestuawarmiayi. 63 Saramúṉ aṉkant ajastaj tusa Uunt Yusan painti tus mir waka áishmaṉkan tura siantu painti mir murikiun áestuamiayi. Nuní̱ tura úunt akupin tura ashí Israer shuarja̱i̱ Uunt Yusa Je̱e̱n namperan najatawarmiayi. 64 Yus áestutai̱ yaṉkú jiruja̱i̱ najanamu Uunt Yus íimmianum tí uchichiyayi tuma asa takamtsuk áestuatniusha tura araka nere̱ súsatniusha nuyá̱ aṉkant ajastaj tusa taṉku macharí̱sha áestuachminiuyayi. Tuma asamtai nu tsawantini̱ṉ úunt akupin Uunt Yusa Je̱e̱n íṉkiuasmak á̱a̱ri̱n imiatkincha awajsámiayi. Núnisaṉ takamtsuk áestuatniuncha tura araka nere̱ súsatniuncha nuyá̱ aṉkant ajastaj tusa taṉku macharí̱ncha áestuamiayi. 65 Kame nu tsawantin Saramúṉ ashí Israer shuaraim tura niji̱a̱i̱ ti untsurí iruntrar Repuamátnumia̱ naṉkama Ejiptu ashintsa ímianai ii Uunt Yusri̱ íimmianum nampernaka najanawarmiayi. Tura siati tsawant nuyá̱ chíkich siati tsawant máshikia katurse tsawant pujursarmiayi. 66 Tura uchu tsawantinkia akupniúsha Israera shuari̱n amikmá ikiuiniam Israer shuarka akupniun shiir pujutnum yumiṉkrarmiayi. Túrawar enentái̱ji̱a̱i̱ waras ashí Uunt Yus ni takarniúri̱ Tawitniasha tura ni shuari̱ Israer shuaran waitnentrarma ásar ni je̱e̱ni̱ṉ waras waketrarmiayi.