2 Akupin
Jutá nuṉka Senakirípai̱ya̱ aṉkant ajasma
19 Tura úunt akupin Esekías nu chichaman antuk pushiri̱ ja̱a̱k kúntuts pujakur entsatái̱ pushin entsar Uunt Yusa Je̱e̱n waya̱miayi. 2 Tura ni yáintri̱n Iriakímian tura papí ain Sépnan núnisaṉ Yúsnan takarniúri̱ uuntri̱ pujuarmia nui̱ Amusa uchirí̱ Isayas iyutarum tutai wénak kúntuts pujakur entsatai̱ pushin entsarar weriarmiayi. 3 Tura chichainiak “Esekías jú̱nis chichaak ‘Ju̱ tsawantka ti kúntuts enentáimprar natsa̱a̱rar asutniátin tsawant asamtai nuwa̱ uchin takustaj tukamá tujintiak pimpir jeakcha ajana núnisar matsatainiaji. 4 Asiria úunt akupin iwiaaku Yusan yajauch chicharkat tusa Rapsasesan akupka asamtai ashí ni chichame̱n ame Uunt Yusrum antukchiash. Tuma asa nin chicharak asutiáshtimpiash. Nu asamtai ishichik juákaru ájinia nu yaintmakarti tusa ii Uunt Yusri̱ áujsati’ túramui” tiármiayi. 5 Kame úunt akupniu Esekíasa takarniúri̱ Isayasan weriarmatai 6 Isayas nin akatar akupénak chicharainiak “Atumí úunt akupniuri̱ ju̱ chicham ujaktarum. Uunt Yus chichaak ‘Asiria nuṉka úunt akupniu takarniúri̱ taar winia náarun wishikiainia anturkamna nuka ashamkaip. 7 Tura ni enentái̱n enentáimmian eṉketán pachimpruktatjai. Túram winiayat meset chichaman antuk ataksha nuṉke̱n waketkimtai máwartatui’ Uunt Yus tawai titiarum” tinia akatar awakeararmiayi.
Senakiríp papí akuptúkam Esekías túramu
8 Asirianmaya̱ úunt akupniuka Rákisnumia̱ jiinkiyi táman Rapsases antuk waketas úunt akupin Rípnaja̱i̱mnumaani̱ mániak pujan wainkiamiayi. 9 Nuyá̱ Itiupíanmaya̱ úunt akupin Tíraka ámiji̱a̱i̱ mániktaj tusa jiinkiyi úunt akupin Sarmanasár nu táman antuk chichaman Esekías ju̱ní̱ titiarum tusa akatar akupkámai. 10 “Jutanmaya̱ úunt akupin Esekías jú̱nisam chicharkum ‘Ame Yúsrum enentáimtamna nu chichartamuk “Jerusaréṉka Asirianmaya̱ úunt akupin nupetkat tusa tsaṉkatnakchattawai” túramkuṉka ámin anaṉkramawa̱i̱ṉ. 11 Nekaata, Asirianmaya̱ úunt akupin núṉke̱ntuk emesak amuku tama antukuitmena nu ¿ameash imiá uwempratam? 12 Uunt matsatkamu Kusan tura Arancha Resepsha nuyá̱ Eten aents Terasárnum pujuarmia nuna winia apar emeskarmia ¿nu aentsu ántar yusri̱ya̱sh aṉkant awajsarmakia? 13 Amatnumia̱ úunt akupin tura Arjata úunt akupniuri̱sha nuyá̱ Separwáim núnisaṉ Ena nuyá̱ Ipia péprunmaya̱ úunt akupniuri̱sha yamaisha ¿tui̱ṉ pujuinia?’ tu ujaktarum” tímiayi úunt akupin Sarmanasár.
14 Tura akupkámu aents Esekíasan tariar papí áarman súsarmiayi. Nuyá̱ áujas umik Uunt Yusa Je̱e̱n wayá̱ Uunt Yus íimmianum papin awa̱smiayi. 15 Tura nui̱ Uunt Yusan seak “Uunt Yusru, Israera Yúsri̱nme, kirupín téntakma ajapén Ame akuptai̱ pujutái̱ram pujamna nuitme. Núnisaṉ Amek ashí nuṉkanmaya̱ akupeamu ainia nuna Úuntri̱nme. Kame nayaimpisha nuṉkasha najankaitme. 16 Tura ju̱ chicham péṉker antukta Uuntá, Ámin iwiaaku Úunt Yusaitmena nuna yajauch áujmatramas Senakiríp chichaman akuptúrka ju̱sha nekas enentáimprata. 17 Uunt Yusa, Asirianmaya̱ akupin ashí nuṉkan tura núṉke̱ntuk emeskamu ainia nuka nékaskete. 18 Tura ní yusri̱ncha numiji̱a̱i̱ kayaja̱i̱ áishmaṉ najankaru ásarmatai nekas yuscha áiniakui ashí jinium aperáwar emestukarmai. 19 Tura yamaikia ii Uunt Yusri̱, ju̱ nuṉkanam ashí matsatkamu irunainia nu Amek, Uunt Yusa, nekas Yúsaitmena nuna nekaawarti tusa Asiria úunt akupniuri̱ kakarmari̱ya̱ uwemtikkiarturta” tu Esekías Yusan áujsamiayi. 20 Nuyá̱ Isayas Amusa uchirí̱ Esekíasan chichaman akuptak “Uunt Yus Israera Yusri̱ jú̱nis chichartamuk ‘Asiria nuṉka úunt akupniuri̱ Senakiríp túramu áujtusmam núnaka anturkaitjiai’ túramui. 21 Uunt Yus Asirianmaya̱ úunt akupniun timia nuka ju̱i̱ti.
Seun pépruka nuwa̱ natsa núnis nakitramawai.
Jerusaréṉka nawantri̱ṉkia ame tuntupmin wajasar muuke̱n pe̱a̱tramas wishikramainiawai.
22 ¿Ya yajauch chicharkamea katsekaitiam?
¿Ya pachismea chichasuitiam túram ya kajekmesha íisuitiam?
Israera Yusri̱ tunaarincha nu, yajauch chicharkaitme.
23 Chichaman etserin ainia nuja̱i̱ Uunt Yusa naari̱ katsekaitme.
Tura chichaakum ‘Wi untsurí mánitiai karu takarjana ju̱ja̱i̱ naintia pakarí̱ya̱ ímianai wákaitjiai.
Ríwianu nuṉka ti jeashta ímianaisha jeawitjiai.
Nui̱sha sétur numiram ti yakí̱ armia nunasha tura sepris numí ti péṉker numi armia nunasha tsupirmajai.
Nu arant ame pujutái̱ram ti jeashta ímianai tura kampuntin ti uunt tépakmanum jeamjai.
24 Wiki táuran yajaya̱ entsan umarmajai
tura winia naweru pakarí̱ji̱a̱i̱ Ejiptunam entsa irunmia núnaka kukach najanaitjiai’ tíniuchukaitiam.
25 Nu túrunatniun Wi yaunchu iwiaraitiaj nu ¿antukchakaitiam?
Jú̱naka ti yaunchu iwiaraitiaj nuna yamaikia umikjiai.
Tuma asamtai ámeka uunt pepru wenuke̱ sá̱a̱rkiaram emestukaruitme.
26 Tura aents nui̱ pujuinia nusha warinkisha túrutsuk sapijmiainiak natsanmai̱ ajakar núpa̱ya núnikiar tura sa̱a̱k sameṉma núnikiarmai.
Tura nupa̱ je̱á̱ tuntupén tsapái̱ katsu̱u̱tsuk ja̱ja̱tna núnikiarmai.
27 Túrasha pujamurmin jíinmarmin tura támurmin wi nékajai
tura núnisnak winia kajertamuncha nékajai.
28 Urukamtai winiasha ti kajertukum tura waantu enentáimtumasam chichaakumna nuna antuku asan ame nuji̱min jiruja̱i̱ jí̱i̱rtiatjame núnisnak wene̱míncha jirun ápkatajme.
Túran támiam nú jintianmaṉ awaiṉkittiajme.
29 Maa Esekíasa ju̱ja̱i̱ nekaata. Ju̱ uwitinkia kakek tsapak nerettana nuyá̱ yurumtiatme tura jimiará uwitincha núnisaṉ kakek tsapak nerettana nuya̱ṉ yurumtiatme. Tura menaintiú uwitinkia arakmam júuktatme. Tura uwa arakmam nere̱ juukam yuáttame. 30 Tura Jutá shuari̱ juákaru pujuinia nuka áraka áintsar wakenmaani̱ kaṉkaprurartatui. Túrawar yakini̱ nerekartatui. 31 Jerusaréṉnum juákaru ainia nu tura Seun nainnium tuke pujuinia nusha pampaṉkartatui. Ashí Akupin Uunt Yus tí wakera asa nekas nuna túrattawai.
32 Tura Uunt Yus Asiria úuntri̱n jú̱nis tawai ‘Jerusaréṉ nuṉkanmaṉka waya̱chartatui, chikichkí naṉkiṉke̱sha eketkachartatui, tantarja̱i̱sha utúachartatui. Tura átum matsatkamu wenuke̱nkesha warukchartatui. 33 Antsu tama nú jintianmaṉ waketkittiawai. Nu péprunmaka peṉké waya̱shtatui.’ Wi Uunt Yus asan nekasan tajai. 34 Kame Winia aneṉkrattairja̱i̱ nuyá̱ winia takartin Tawitian shiir enentáimtakun, ju̱ péprun ayamprúkan uwemtikrattajai tawai Uunt Yus titiarum” tusa Isayas Yusa chichame̱n akatmamar Esekíasan akuptúkmiayi. 35 Tura Asirianmaya̱ suntar siantu uchaintiséṉku mir armia nuna nu kashi Uunt Yusa suntari̱ tarí mash mesetan matsamtúkarmia núnaka máwarmiayi. Tura chíkich armia nuka kashin káshik nantakiar íimiaj tukamá jaka tepetar ajainian wáinkiarmiayi. 36 Nuyá̱ Senakiríp Asiria nuṉka akupniúri̱ṉkia Níniwi nuṉkanam waketkimiayi. 37 Nuyá̱ chíkich tsawantin ni yusri̱ Nisruk enentáimtutai̱ je̱a̱nam enentáimtak pujan ní uchirí̱miak Atramirík nuyá̱ Saresérja̱i̱ tariar puya̱ja̱i̱ máwar ikiuiniak Ararát nuṉkanam pisarármiayi. Tu mantamnamtai ni uchirí̱n Esarjatún akupin ajas pujusmiayi.