2 Akupin

Esekías jatai̱ suṉkuran achikma

20 Kame nu tsawant Esekías jatai̱ suṉkuran achimiak jaa ajasmiayi. Nuya̱ṉka Yúsnan etserin Amusa uchirí̱ Isayas nin iyutaj tusa wémiayi tura chichaak “Uunt Yus jú̱nis túramui ‘Ame shuarum ainia nu péṉker iwiarkam matsakiarta, ámeka jakattame iwiaaku pujushtatme’ túramui” tímiayi. 2 Nuyá̱ nuní̱ tutai tanishnumaani̱ ayantármiayi tura Uunt Yusan seak 3 “Maa, Uunt Yusá waitneasam enentáimtursata. Ámin nekas naka tura tuke enentáiji̱a̱i̱ wekasan Ame íimmianumsha péṉkeran túraitjiai” tímiayi. Esekías nuna ti, tí utmiayi. 4 Isayas a̱a̱ ajapéri̱n jíintsa̱i̱ṉ Uunt Yusa chichame̱ támiayi tura jú̱nis chichaak 5 “Waketkitia tura Esekías winia shuaru úuntri̱ya nu chicharkum Uunt Yus jú̱nis túramui titiá. Ame apá Tawitian Yúsri̱njiai. Ame seatmena nuna anturkajme tura ame nea̱jkirmincha wainkiajai. Nekaata tsuártatjame nuyá̱ menaintiú tsawant átatna nuiṉkia Uunt Yusa Je̱e̱n wakattame. 6 Nuyá̱ ame tsawantrumniaka kinse uwí éketkattajme. Nú arantcha Asiria úunt akupniuri̱ya̱sha amincha tura ju̱ pépruncha aṉkant awajsattajrume. Winia aneṉkrattairja̱i̱ṉ tura winia takartin Tawitian anea asan ju̱ péprun ayamprúktatjai” tímiayi Uunt Yus. 7 Nuyá̱ Isayas tímiayi “Ikiu nere achiktarum” tutai achikiar ni kuímiari̱ ikiursam pujus chimiamiayi. 8 Tura Esekías Isayasan chicharuk “Menaintiú tsawant Uunt Yusa Je̱e̱n wakattame támena nu nekas túrunatta nuna niisháa túrunamun wáinmamkan ¿nuja̱i̱ nekaataj nu tuit?” tusa inintrúsmiayi. 9 Tutai Isayas aya̱k “Nekanattamna nuka Uunt Yus iniakturmastatui. Étsa̱ka ejetari̱ji̱a̱i̱ ura nekapmarmanum nu arant ¿tias nekapmarmanum wétin wakeramek nuíchuka ataksha tias waketkitin wakeramek?” tu iniasmiayi. 10 Nuyá̱ Esekías ái̱kmiayi “Tias akaatia ímianai jeatin ejetaka yúpichuchiti, antsu tias ejeta nuya̱ṉka úkumprua nuni̱ṉkia waketkichminiaiti” tímiayi. 11 Yúsnan etserin Isayas Uunt Yusan untsukmatai Akaasa nanturi̱ nekapmatai̱niam ejetari̱ tias tesamu úkumur awaiṉkimiayi Uunt Yus.

Esekías iyutarum tusa Papirúnianmaya̱ akuprámun awayá̱warma

12 Kame nu tsawantin Paratána uchirí̱ Mirutakparatán, Papirúnia nuṉka uuntri̱ Esekías jaawai táman antuk chichama etserniuja̱i̱ papin áarman tura ántrar súsatniuncha akuptúrmiayi. 13 Nuyá̱ Esekías ni je̱e̱n awayá̱war ashí ni wariri̱ shíirmach ainia nu émamkesar ú̱kar ikiutai̱niam awayá̱war kuítniasha, kurincha, kuṉkuinniasha, tsuámatai asuitincha núnisaṉ mesetnum mánitiai ikiutai̱ncha tura niniu ashí armia núnaka ashí iniá iniaktusmiayi. Chikichkinkesha iniaktutskeka iniaisachmiayi. 14 Tura Yúsnan etserin Isayas úunt akupniun Esekíasan werí anintrak “¿Tuyá̱ shuara káunkara tura amincha warintramainiawa?” Tutai Esekías áimiuk “Papirúnia yajá nuṉká ímiania taarai” tímiayi. 15 Nuyá̱ Isayas ataksha inintrak “¿Warinia ame je̱e̱mincha iisara?” Tutai Esekías aya̱k “Ashí irunainia nuna iniaktusarjai tura chikichkisha iniaktuschamuka juákchayi.” 16 Tura Isayassha Esekíasan chicharuk “Yusa chichame̱ antukta. 17 Nuyá̱ Uunt Yus chichartamuk ‘Nu tsawant átatna nuiṉkia ame je̱e̱min írunna nuna núnisaṉ ame we̱a̱trumi wariri̱ ikiurtámkiarma ainia nunasha Papirúnianam ashí yarutramkartatui. Túrutmawarmatai ámeka aya jú̱nik juáktatme túramui. 18 Tura núnisaṉ ame shuarumin Papirúnianam ni yarummanka yaruakartatui. Túrawar uchin yajutmachu awajsar peṉkeri̱nkia júrar Papirúnianmaya̱ akupniu takarniúri̱ awajsártatui’” tímiayi. 19 Tura nuyá̱ Esekíassha akupin pujuttana nuiṉkia ashí aṉkant áchatpiash tu enentáimias Isayasan chicharuk “Yusa chichame̱ ujatkámna nuka péṉkeraiti” tímiayi.

Esekías jakamu

20 Nuyá̱ Esekíasa túramuri̱sha takatrí̱sha nuṉka táurar entsa pujá awajsar jintiarar ashí péprunmaya̱ aents súsarmanka Jutá nuṉka Akupniúnam Túrunamu Aatai̱ papinium ¿áarchamukait? 21 Tura Esekías ni aparí̱ ayamuwearmia nui̱ṉ nisha ayampramtai ni uchirí̱ Manasés úunt akupin ajasmiayi.