2 Akupin
Jutá nuṉkanam Manasés akupin ajasma
21 Manasés akuptan naṉkamamia nuiṉkia tuse uwí takaku asa Jerusaréṉnum seṉkuintiséṉku uwí akupin ajasmiayi. Ni nukurí̱ náari̱ṉkia Ipsipia náartiniuyayi. 2 Túrasha Israer shuar iimiainiamunam chíkich nuṉkanmaya̱ aents mui̱jmiainian túruiniakui Uunt Yus ji̱i̱r akuprámia nuna túrutairi̱ji̱a̱i̱ métek Uunt Yus íimmianum Manaséska peṉké yajauchin túramiayi.
3 21:3-15 Kame Jutanmaya̱ úunt akupin Manaséska chíkich akupin tura aents nui̱ matsamin áinian Uunt Yus emeskamia núja̱i̱sha naṉkaamas yajauchin túramiayi. Túmak ni aparí̱ Esekías emeskamia nuna najankamu yus Paar tura Asera* áestutai̱ncha núnisaṉ yaa enentáimtutai̱ncha ataksha iwiarak najankamiayi. Nuna túrak nu ántar yusan enentáimtak imia ni uchirí̱ncha jinium áestuamiayi. Núnisaṉ najankamu yus áestutai̱ncha Uunt Yusa Je̱e̱n ikiusármiayi. Nuna túrakui Uunt Yuska Manasésan tura ní shuari̱ncha takamtsuk amuktinian enentáimturmiayi.
16 Manasés yajauchin túramtai Jutancha Uunt Yus íimmianum tunaan túrat tusa túrumtikiamiayi. Tura nu arantcha aents tunaamkachu numpe̱n ti uputur Jerusaréṉ yantam á̱a̱wini̱ náṉkatkana ímianai numpan tí piákmiayi. 17 Nuyá̱ Manasés túramuka tura ni yajauch túramia nusha Jutá nuṉka Úunt Akupin Túrunamu Aatai̱ papinium áarchamukait. 18 Nuyá̱ Manasés ni aparí̱ ayamuwearmia nui̱ṉ nisha ayampramtai ni je̱e̱n Usa ajanam shíirmach kuku̱j arakmauya nui̱ iwiarsarmiayi. Túrunamtai ni uchirí̱ Amun úunt akupin ajasmiayi.
Jutá nuṉkanmaya̱ úunt akupin Amun túramu
19 Amun akuptan naṉkamamia nuiṉkia paintitús uwí takakuyayi, tura Jerusaréṉnum jimiará uwí akupmiayi. Ni nukurí̱ náari̱nkia Meserimit náartiniuyayi tura Jutpanmaya̱ Arusa nawantri̱yayi. 20 Túrasha Uunt Yus iisam Amuncha peṉké yajauchin túrak ni aparí̱ Manasés túramia nútiksaṉ túramiayi. 21 Ni aparí̱ wekainiuya nui̱ṉ nisha wekaimiayi, ni aparí̱ najanamu yusan tikishmátainiak enentáimtimiayi tura ántar yusan tikishmátniuyayi. 22 Ni aparí̱ Yusri̱nkia Úunt Yusnaka ikiukmiayi. Tura Uunt Yusa jinti̱nkia wekaichmiayi.
23 Tura Amunnaka ni takarniúri̱ chichaman u̱u̱k najatawar ni je̱e̱ni̱ṉ máwarmiayi. 24 Nuṉká matsamármia nu aents úunt akupin Amunan maatai tiarmia nú aentsnaka ashí máwar nuya̱ṉka ni uchirí̱ Jusíasan úunt akupin awajsarmiayi. 25 Nu naṉkaamas Amuna túramuri̱sha tura ni túramia nusha Jutanmaya̱ Úunt Akupin Túrunamu Aatai̱ papinium áarchamukait.
26 Túrunawarmatai ikiuntsatin timianumaṉ Usa ajanam shíirmach kuku̱j arakmauya nui̱ iwiarsarmiayi. Nuyá̱ ni uchirí̱ Jusías akupin ajasmiayi.