2 Akupin
Jusías Jutá nuṉkanam úunt akupin ajasma
22 Jusíassha uchu uwí takaku úunt akupin ajas Jerusaréṉnum traintiúnu uwí akupin pujusmiayi. Ni nukurí̱ náari̱sha Jititiauyayi. Nisha Puskat nuṉkanmaya̱ Atayása nawantri̱yayi. 2 Tura Jusíaska Uunt Yus iismasha ti péṉker túramiayi. Ni uuntri̱ Tawit túramia tímiatrusaṉ untsurnumaani̱sha tura menanmaani̱ṉsha wétsuk Yusai̱ naka wekasamiayi.
3 22:3-7 Uunt akupin Jusíaska ni papiri̱n áatniun Sapanan Uunt Yusa Je̱e̱n akupkámiayi. Akupeak Yúsnan pujurniu uuntri̱ Irkías chicharkum “Waiti wáinin ainia kuit aents ikiuiniamun júukarua nuna iwiarsati. Tura Uunt Yusa Je̱e̱n iwiarainiak takakmainia nuna súsarti. Núnisaraṉ numincha nuyá̱ kaya iwiarkamuncha sumakarti. Túrasha kuit ájapmanka papiniumka áakcharti warí kasamkatin enentái̱ji̱a̱i̱ṉkia takakmainiatsui tiartá” tímiayi.
8 22:8-10 Tutai Irkías Sapanan chicharuk “Papin Umiktin Chicham Akupkámu áarman wainkiajai” tímiayi. Takui̱ Sapan papin achik áujsamiayi. Tura Sapan úunt akupniun chichaak “Ame takarniúrmeka Uunt Yusa Je̱e̱n iwiarainian kuítniaka súsaruiti” tímiayi. Tura Irkías papin surusai tusa úunt akupin ántamunam áujsamiayi.
Umiktin chicham aarma wainkiamu
11 Tura úunt akupniusha akupkámu chicham áarmauya nuna áujsarmatai antuk pushiri̱n já̱a̱rmiayi. 12 Nuyá̱ wárichik úunt akupin Irkíasan, Sapana uchirí̱ Ajikiaman, Mikiayása uchirí̱ Ákpuran, papí ain Sapanan tura akupniu yaintri̱ Asayásan jú̱nis tiármiayi, 13 “Uunt Yusai̱ werum nekautarum. Winiasha péprunusha tura ashí Jutá nuṉkanusha ju̱ chicham aarma wainniakainia ju̱nasha ¿warintiuak? Warí Yusa kajetáiri̱ṉkia úuntaiti. Iin ti kajertamkashtajiash. Ju̱ akupeamun ii uuntri̱ armia nusha umikcharuiti tura ii umiktinian áatrampramiaji nuja̱i̱ métek túracharuiti” tímiayi.
14 Nu tutai Yúsnan pujurin Irkías tura Ajikiam, Ákpur, Sapan nuyá̱ Asayás nuwa̱ Urta Yúsnan etserin pujamunam wéarmiayi. Nú nuwa̱ka Saruma nua̱ri̱nti. Nisha núnisaṉ Tikpa uchirí̱nti tura Jarjasa tiraṉki̱nti. Jarjassha Yusa Je̱e̱n iwiarmamtai pushí ikiutai̱ wáinin apujsamuyayi. Nu nuwa̱sha Jerusaréṉnum atak tesamunam pujan jeariar áujsarmiayi. 15 Tura nu nuwa̱sha akupkarman chicharainiak “Israera Yusri̱ Uunt Yus jú̱nis chichartamuk ‘Atumín winí̱ akuptámkarua nu jú̱tiksarum ujaktarum. 16 Uunt Yus jú̱nis chichaak “Ju̱i̱sha tura ashí aents tímiatai pujuinia tímianaisha ti itiurchat awajkartatjai. Jutá nuṉka akupniúri̱ áujsama tímiatrusnak Wisha umirkattajai. 17 Tura Winia initiusar najankamu yusan kuṉkuinian ekemátkar enentáimtuiniak ní najankamunak tikishmátainiak akajtukarai. Túrawarmatai Winia kajetái̱rka peṉké mikirchattawai” ujaktarum’ túramui. 18 Núnisaṉ Jutá nuṉka úunt akupniuri̱ winiasha Uunt Yus anintrúttsatarum turammarumna nusha ujaakrum ‘Akupeamu chicham péṉker antuku asakmin 19 ju̱ nuṉka mátsatkamua ju̱na kajerkan itiurchat awajkattajai. Nú chicham paant nekaam kúntuts enentáimsam pushiram já̱a̱ram útim umiktin enentáimsa asakmin Wisha nútiksanak anturkajme. 20 Tuma asamtai ámiṉkia ame we̱a̱trumji̱a̱i̱ aṉkant ayampratniun amastatjai. Tura ámeka ju̱ nuṉkan kajerkan wáitkiastatjana nuka wáinkiashtatme’ Uunt Yus tu túramui tusarum ujaktarum” tutai waketkiar úunt akupniun tímiatrusaṉ ujakármiayi.