2 Akupin

Jeú Israer nuṉka úunt akupniuri̱ anaikiamu

9 Nuyá̱ Yúsnan etserin Iriséu Yúsnan etserin unuimia armia nuyá̱ chikichkiniak untsukmiayi tura chicharuk “Iwiarnaram ju̱ asuiti jukim Karaat Ramutnum wetá. 2 Tura nui̱ jeam Nimsi tiraṉki̱ Jeú Jusapáta uchirí̱ wainkiattame. Nui̱ waya̱m ni ai̱ pujuiniamunmaṉ untsukta. Túram je̱á̱ awayá̱ta. 3 Nuya̱ṉka asuiti mutinium uwamua nu achikiam muuknum ukatkum ‘Uunt Yus chichaak “Wi ju̱ asuitiji̱a̱i̱ Israernumia̱ úunt akupin awajsájai” túramui’ titiá. Tura ikiuakum waiti uraim jíinkiumek pisarta. ¡Nákasaip!” tímiayi. 4 Nu natsa Yúsnan etserin unuimiamia nu Karaat Ramuta nui̱ wémiayi. 5 Nui̱ jeá wayá̱ suntara úuntri̱sha pujuiniai̱ṉ chichaak “Uuntá ame ujaktinian chichaman takakjai” tímiayi. Jeúsha chichaak “¿Ashí íiniukait?” tutai aya̱k “Uuntá, nekaska áminiuiti” tímiayi. 6 Tura Jeúsha nu chichamaik wajaki̱ je̱á̱ waya̱miayi. Túrunamtai Yúsnan etserin asuitiji̱a̱i̱ muuknum ukatak chicharuk “Israer nuṉka Uunt Yusri̱ jú̱nis tawai ‘Wi ju̱ asuitiji̱a̱i̱ Uunt Yusa aentsri̱ Israera úunt akupniuri̱ awajeajme. 7 Tura ame úuntrumin Akaapa shuari̱ṉkia ashí amukártatme. Winia takarniúr Yúsnan etserniun núnisaṉ Uunt Yusa takarniúri̱ numpe̱n Jisawír ukakmánum yapajmiatrakum túrattame. 8 Núnisnak Israer nuṉkanam Akaap aentsnaka, áishmaṉnasha takarniúri̱ncha aṉkant pujuiniancha ashí amuktatjai. 9 Tura Nawata uchirí̱ Jirupuáman nuya̱sha Ajíasa uchirí̱ Páasan itiurkamaj nútiksanak Akaapa shuari̱ncha amuktatjai. 10 Nuyá̱ Jisawírnaka Jisriir nuṉkanam iwiarsachman ya̱wá̱ yuáwar amukártatui’ tawai” tímiayi. Tura nuna etserak ikiuak wáitin urái jiinkí̱ pisarmiayi.

11 Tura Jeú ni uuntri̱ suntari̱ji̱a̱i̱ iruntrarmia nui̱ waketki̱ jeamtai chicharainiak “¿Warimpiait? ¿Au wáurkasha warinia tarin?” tuíniakui Jeú chicharainiak “Ni chichakainia núja̱i̱ṉ atumek nekamniaitrume” tímiayi. 12 Nu arant chicharainiak “¡Wáitratsmek paant etserkata!” tuíniakui Jeú ujainiak “Uunt Yus jú̱nis túramui tusa ujatuk ‘Wi ámin Israera úunt akupniuri̱ anaiyajme túramui’ túrutui” tu etserkamiayi. 13 Nu tutai ní awaṉkémpri̱niak áikiar je̱a̱ya̱ jíinkir akatainiam tarimiátniuri̱n aeprurar kachun umpuiniak “Yamaikia Jeúka ii úunt akupniuri̱ ajasái” kakantar ujakármiayi.

Israera akupniúri̱ Juraman Jeú amukma

14 9:​14-15 (Kame Juramka Karaat Ramutan ashí Israer suntarja̱i̱ Sírianmaya̱ úunt akupin Jasaérja̱i̱ mániniamun ayamprutaj tusa wémiayi. Túrasha úunt akupin Juramka mesetnum Jasaérja̱i̱ maani̱ pujus aya̱shnium ijiurma asa nuna tsuámartaj tusa Jisriirnum wémiayi.) Nuní̱ Nimsi tiraṉki̱ Jeú Jusapáta uchirí̱ Juraman mátaj tusa chichaman jurusmiayi. Nuiṉkia Jeú chichaak “Átum wakeramuitkiuiṉkia ju̱i̱ uunt péprunam matsatainia nuka Jisriirnum chichaman etserkataj tuíniakuisha peṉké tsaṉkatkairap” tímiayi. 16 Jisriir péprunam Juram peaknum tepakui Ukuséas Jutá úunt akupniuri̱sha Juraman iyutaj tusa wémiayi. Nui̱ṉkia mesetnum mánitiai káruri̱n Jeú eṉkemák Jesreernum wémiayi.

17 Nui̱ Jisriirnum kumpin je̱a̱nam jintia iistá tusar awajsamu Jeú shuari̱ irunar wininian wainiak chichaak “Aents irunar wininian wainjiai” takui̱ Juram chichaak “Kawái achikiam weme iṉkiuṉkam inintrakum ‘¿Nawamnaikiar shiir pujustin áwak?’ titiá” tímiayi. 18 Tutai kawainium ekemak werí chicharuk “Úunt akupin chichaak ‘¿Shiir pujustin áwak?’ túramui” tímiayi. Tutai Jeú aya̱k “¿Amincha shiir pujustincha warí itiurtamawa? Wiji̱a̱i̱ métek wetái.” Nuiṉkia jintiá iistá tusar awajsamu chichaak “Chichaman etserniua nu ni pujamunam jeariat wákettsui” tímiayi. 19 Nuya̱ṉka ataksha chikichan kawainium ekemta unuimiátran akupkámiayi. Tura nui̱ jearí chicharuk “Úunt akupin chichaak ‘¿Shiir pujustin áwak?’ tawai” tímiayi. Tura Jeú aya̱k “¿Ámiji̱a̱i̱sha shiir pujustincha warí itiurtama? Íiji̱a̱i̱ṉ wetái” tímiayi. 20 Ataksha jintiá iin étseruk “Wenia nuka niin jearní̱ túrasha taatsui. Ewekámna nuka Nimsi uchirí̱ Jeúwash inimiainia ajawai. Warí waurka núnis ewekámui” tímiayi. 21 Nui̱ṉkia Juram chichaak “Wi mesetnum mánitiai karu iwiarturatarum” takui̱ kárun iwiaram Israera úunt akupniuri̱ Juram tura Jutanmaya̱ úunt akupin Ukuséasja̱i̱ aṉkant aṉkant ni káruri̱ni̱ṉ Jeú iṉkiuṉtai tusar jíinkiarmiayi. Kame Nawuta nuṉké̱ tura Jisriira pakarí̱ ana nui̱ iṉkiunaikiarmiayi.

22 Tura Juram Jeún wainiak inintrak “¿Nawamnaikiar shiir pujustin áwak?” Tutai nisha aya̱k “Nawamnaikiar shiir matsamsatniuka ¿itiurak ati, ame nuku Jisawír tsanirmaki̱ tura uwishniumaki̱ weai̱sha itiurak shiir matsamsatniusha átiṉ?” tímiayi. 23 Nuya̱ṉka Juram ni káruri̱n ayantár wáketeak pisak Ukuséasan chicharuk “¡Ukuséasa ánaṉkaiti!” tímiayi. 24 Túrasha Jeú naṉkin tíshimkiuja̱i̱ eketak Juraman suntunam ijium naṉki enentáiniam pana jíimiayi, túram ni káruri̱n jaka inianmiayi. 25 Nuyá̱ Jeú suntara uuntri̱ Pitkiaran chicharuk “Jukim Nawuta nuṉké̱ Jisriira pakarí̱ya̱ nui̱ ajapata” tímiayi. Enentáimsakia ámiji̱a̱i̱ kárunam ni aparí̱ Akaapa ukunmari̱ eṉkempra wéarin Uunt Yus ju̱ túrunatniun tíniuiti 26 “Ti nekas Nawuta numpe̱n tura ni uchirí̱ numpe̱ncha ya̱u̱ wainkiamjai. Núnisnak ju̱ nuṉkanmaṉ yapajmiátkattajai” tawai Uunt Yus. “Tuma asamtai yamaikia jukirum Uunt Yus timia nuja̱i̱ métek nú nuṉkanam ajapatarum” tímiayi.

Jeú Ukuséasan maamu

27 Ukuséas Jutá úunt akupniuri̱sha nuna túrawarmatai wainiak aja je̱e̱ni̱ pisarmiayi. Tura Jeú pataatuki̱ werus chichaak “Ausha mátarum” tímiayi. Túrasha Ukuséas Ipriam péprunam jeattsa Kur nainnium káruri̱n eṉkemár wáakun íjiuarmiayi. Túram nisha pisar Mikitiunam jeá jakamiayi. 28 Nui̱ jakamtai ni yaintri̱ armia nu kárunam eṉkerar Jerusaréṉnum júkiarmiayi tura ni aparí̱ iwiarsamunmaṉ Tawitia pépruri̱n wa̱a̱ ámanum iwiarsarmiayi. 29 Akaapa uchirí̱ Juram úunt akupin ajasma uwí áunsetin Ukuséaska Jutá nuṉkanam úunt akupin ajasmiayi.

Jeú Jisawíran maamu

30 Nuyá̱ Jeú Jisriirai̱ wémiayi. Jisawírsha nuna antuk usumamiayi tura intiashí̱ncha iwiaramiayi. Nuyá̱ je̱á̱ áṉkamunam imiá awaṉkemiayi. 31 Tura Jeú pepru wáitiri̱n waya̱kuinkia Jisawír chicharuk “Ni úuntri̱niak main Sempria, ¿péṉkerak pujam?”* 32 Tutai Jeú je̱á̱ áṉkamuri̱ni̱ yakiini̱ íimias chichaak “¿Ya winia nuní̱ túruta?” takui̱ takarin jímiar tura menaint armia nu yakiya̱ iisar wajasármatai 33 Jeú chicharainiak “Núwa̱ka nuṉká akaki̱ aju̱a̱tarum” tímiayi. Takui̱ nuṉká akaki̱ aju̱a̱warmiayi túram ni númpe̱nka wenuknasha tura kawaincha númpak awajsarmiayi. Túramtai kawaisha nin najararmiayi. 34 Nuyá̱ Jeú je̱á̱ wayá̱ yurumá umar umik chicharainiak “Yajauch nuwa̱chia ju̱na yáakesh iwiaras ikiutí, warí ju̱sha úunt akupniu nawantri̱nti” tímiayi. 35 Iwiaras ikiutái tusar wésar ni aya̱shí̱nkia wáitkiacharmiayi antsu aya muuké̱ ukunchi̱niak nawe̱ncha nuyá̱ uwejé̱ pakarí̱ya̱ núchiniak wáinkiarmiayi. 36 Tura waketki̱ etserainiak “Jú̱nachunak Uunt Yus ni takarniúri̱ Tíspinmaya̱ Iríasai̱ni chicharuk ‘Jisriir nuṉka pakari̱n Jisawíran aya̱shí̱nkia ya̱wá̱ yuáwartatui. 37 Tura Jisawíra aya̱shí̱ṉkia nuṉká ijia tepana núniktatui. Tuma asamtai Jisriira nuṉke̱nka ni aya̱shi̱ṉkia ju̱i̱ ikiusmaiti tunashtatui’ tú timiayi” tiármiayi.