Istir

Aman Israer shuaran amuktin chicham najatamu

3 Nu naṉkaamasu ai̱ úunt akupin Asueru Ametáta uchirí̱ Amanan Akaak aentsnumia̱n uuntri̱ awajsámiayi. Tura ashí nui̱ chichaman iwiarin unuimiákaru armia núnaka iniaṉkas Amannaka uunt awajsámiayi. 2 Túrunamtai nui̱ úunt akupniu takarniúri̱ pujuarmia nuka Amanan úunt akupin túratarum timia ásar ashí tsuntsumpruáwar tikishmátiarmiayi. Túrasha Martukíuka tikishmátratniuncha tura shiir awajsatniuncha peṉké nakitrámiayi. 3 Tura úunt akupniu takarniúri̱ akupin pujutai̱ wáitinian pujuarmia nu Martukíun chicharainiak “¿Urukamtai ámeka úunt akupniu chichame̱sha umíatsum?” tiármiayi. 4 Kame tuke tsawant tu chicharmasha Martukíuka peṉké páchichmiayi. Túmak Martukíuka Israer áentsuitjiai tau asamtai ni chichame̱n tímiatruskeash umikiat tusar Amanan ujatkarmiayi. 5 Amanka Martukíu tikishmar shiir awajeacham peṉké nakitiam ti kajekmiayi. 6 Kame Martukíu Israer shuaraitjiai tiniu asamtai aya niṉki asutiámka máakchaiti tu enentáimsamiayi. Asueru akupeamuri̱i̱n Israer shuar pujuarmia nuna Amanka mash amuktaj tu enentáimpramiayi.

7 Asueru úunt akupin ajas tuse uwí pujái̱ Nisan nantutin uwí juármanum pur tutain Aman nakurúsmiayi. Núnaka warí tsawantini̱ṉ^ki tura warí nantutini̱ṉ^ki túramniait tusa túramiayi. Tura tuse nantutin Atar nantu tuinia nui̱ jeamiayi. 8 Nuyá̱ Aman úunt akupniun chicharuk “Ashí nuṉka tesarma ame akupeamunam aents tsakiṉmakaru ámin umirtamainiachu tura ni akupeamuri̱sha nusháa ainia nui̱ pujuiniawai. Nuka pujuiniaksha úunt akupniunka warinmaṉsha yáiniatsui. Tuma ásarmatai ánis pujusárti tusar iniaisacharminiaiti. 9 Tuma asamtai ámiji̱a̱i̱ péṉkeraitkiuiṉkia nu aentska ashí amuukarti tu chicham najanata. Túrawakmin akupniu kuitri̱ ikiutai̱niam ikiusarti tusan tias mir tarentu jeá kuítian, wi kuitia wáinin ainia nuna súsartatjai.” 10 Nuna takui̱ úunt akupin uwejnum awetai̱n uwejnumia̱n ukuiniak Amanan Akaak shuar Ametáta uchirí̱n Israer shuara nemasri̱n susamiayi. 11 Nu tutai úunt akupin Amanan chicharuk “Kuit támena nuka áminiuk atí. Tura nu aentssha ame wakeramna núnisaṉ túrunawarti.” 12 Nuya̱ṉka emka nantutin tsawantka tráisetin úunt akupniu papiri̱n ain armia nuna untsukarmiayi. Túrawar Aman timia núnaka ashí áatrarmiayi. Úunt akupniu sátrapari̱ncha núnisaṉ nuṉka tesarmánum anairamuncha ántsaṉ kapitián armia nunasha tura péprunam uuntri̱ aṉkant aṉkant nuṉka tesarmánum pujuarmia nunasha ni áatai̱ri̱ji̱a̱i̱ṉ núnisaṉ pépruncha ni chichame̱ja̱i̱ṉ úunt akupin Asueru náari̱ji̱a̱i̱ áatkar ni aniyuri̱ji̱a̱i̱ apujtua asakamiayi. 13 Tsawant traise ámanum nantu tuse Atar nantutin ashí nuṉka tesarmánum Israer shuar pujuiniana nu ashí uunt ainia nusha uchisha nuwa̱sha natsa ainia nusha chikichik tsawantini̱ṉ mantamna mash amuukarti. Túrunawarmatai ni warirí̱sha jurunkiarti tu chícham najanamu úunt akupin áakman ashí nuṉkanam akuprarmiayi. 14 Nu tsawant jeakui iwiarnakar matsamsarat tusar ashí nuṉka tesarma ainia nuiṉkia nu papí áakar akuprarmanka akupkámu umiktin chicham awajsar ashí péprunam etserkartin ármiayi. 15 Úunt akupin akupeamu ásar papí juu armia nusha júkiar wárikmas wéar pepru uuntri̱ Súsanmaka etserarmiayi. Tura úunt akupniuka Amanja̱i̱ umartinian juárkiarmiayi. Túrasha nuna túmainiai̱ ashí Súsanmaya̱ṉka páchim enentáimprar pujuarmiayi.