Istir

Aman papí najanamun Istir nekaamu

4 Martukíu ashí nuna túramun nekáa pushiri̱n ja̱a̱r útkur entsatái̱ pushin entsar yuṉkunmiji̱a̱i̱ muuknum yukumimiayi. Túruna péprunam jiinkí̱ wekas tí kuntuts enentáimiar kakantar untsumak útkiní̱ wekaimiayi. 2 Nuna túmaki̱ úunt akupniu wáitiri̱n jeamiayi. Nu ajakmárar entsatái̱ pushí entsarikia úunt akupniu wáitiri̱ṉkia naṉkaamaktin tsaṉkamkachmauyayi. 3 Ashí nuṉka tesarmánum pujuarmia nuka úunt akupin papí najana akuprámu jeariármaka nuiṉkia Israer shuarka kúntuts enentáimprar útainiak chíkichkia ijiarmáwar nuyá̱ útainiasha núnisaṉ útkur entsatái̱ pushin entsarusha nuyá̱ muuknum yuṉkunmin ukatmamusha ármiayi. Kame untsurí Israer shuarsha útkur entsatái̱ pushin áintkiar yuṉkunminiam tepashaa ármiayi.

4 Nuwa̱ natsach tura áishmaṉ nuatcha Istiran yain armia nu tariar Martukíu tuma nuna ujakármiayi. Nu ujakam nuwa̱ akupin Istir ti kúntuts enentáimpramiayi. Tura Martukíu útkur entsatái̱ pushin entsarna núnaka ai̱k ajapa ju̱na entsarti tusa pushin akuptúkmiayi. Túrasha Martukíuka achiktinian nakitrámiayi. 5 Nuya̱ṉka nuatcha áishmaṉ Istiran wainkiat tusa úunt akupin apujtusmia nú Jatakan Istir untsukmiayi. Tura Martukíusha urukamtai núnisaṉ warí akui tuma tusa nekaattsa Jatakan akuptúkmiayi. 6 Tura akupkam Jataksha úunt akupniu wáitiri̱n íṉkiuasmak á̱a̱ri̱n Martukíu pujumia nui̱ wémiayi. 7 Nuya̱ṉka túrunamia nuna Martukíu ashí ujakmiayi. Núnisaṉ Israer shuar emesnakar amuukarti tusa úunt akupniu kuitri̱ ikiutai̱niam urutmá kuitnia ikiustatjai timia nunasha ujakmiayi. 8 Núnisaṉ Israer shuarka amukati tusar Súsanam chicham najanamun Istiran iniaktusat tusa papí áarman chikichkiniak jusa susamiayi. Kame nuna nekáa Istirka úunt akupniun werí waitnenkarturta tusa seam ní aentsri̱n chichamprukat tusa túramiayi.

9 Nuya̱ṉka Jatakka waketki̱ Martukíu timia nuna Istiran ashí ujakmiayi. 10 Nuya̱sha Istir Jatakan chicharuk “Martukíu jú̱nisam titiá. 11 Ashí úunt akupniu takarniúri̱ ainia nu núnisaṉ ashí nuṉka tesarmánum úunt akupniu aentsri̱ ainia nusha nékainiawai. Náṉkamas aents áishmaṉkesha nuwa̱ksha úunt akupniu je̱e̱n init á̱a̱ri̱n untsukchamaitiat waya̱ka chikichik akupkámuk awai. Nuka jákatniukete. Antsu áyatik úunt akupin akupkur takutai̱ kúriji̱a̱i̱ṉ najanamu iwiaintiukmaka antsu nuiṉkia iwiaaku áminiaiti. Túrasha ju̱ traintia tsawant naṉkaamasai̱ ju̱i̱ úunt akupin pujamunam peṉké untsukchamuitjiai” tímiayi. 12 Tura Istira chichame̱n Martukíun ujakármiayi.

13 Nuya̱ṉka Martukíu Istiran chichaman akuptak “Wikia úunt akupniu je̱e̱n pujá asan Israer shuarnumia̱ṉka aya wiki uwemprattajai tu enentáimsaip. 14 Ame yamái chichachkumni̱ṉkia Israer shuar aṉkant ajastinkia núnisaṉ uwempratniusha chikichnumia̱ táartatui. Túrasha ámeka tura ame apá shuari̱sha amuukartatui. Kame ya neka yamái jú̱niniakui ame shuarum yáiṉtin náamkachuashitiam” tímiayi. 15 Tura Istirsha Martukíun chichaman akuptak 16 “Israer shuarka Súsanam matsatainia nu ashí irurarta. Túrarum menaintiú tsawant tura menaintiú kashi winia enentáimtursarum ijiarmátarum. Tura menaintiú tsawant tsawai̱sha káshisha yurumtsuk tura umutcha umutsuk pujustarum. Wisha núnisnak winia yáintin ju̱i̱ pujuinia nuja̱i̱ ijiarmáttaji. Kame nuna túran úunt akupniun waintiattajai. Kame nuka akupkámunmaṉka tsaṉkamkachma ai̱ṉ^k núnaka túrattajai. Tuma asamtai jáknasha jakatjai” tímiayi. 17 Kame Martukíu nuyá̱ waketki̱ Istir timia nútiksaṉ ashí túramiayi.