Istir

Istir úunt akupniui̱ wéamu

5 Nuya̱ṉka menaintiú tsawant naṉkaamasmatai Istirka nuwa̱ akupin entsatái̱ pushin entsar úunt akupniu je̱e̱n ajapéri̱n waya̱miayi. Úunt akupniuka wáitiniam naka ni pujutái̱ri̱n pujumiayi. 2 Tura Istir wajan wainiak úunt akupin waitnentar shiir enentáimtusmiayi. Túrak akupkur takutai̱ kuriji̱a̱i̱ najanamun iwiaintiukmiayi. Nuya̱ṉka iwiaintiukam Istirka wéanak nuna tsakari̱n antiṉmiayi. 3 Nui̱ waya̱mtai úunt akupin chicharuk “Nuwa̱ akupin Istirá ¿warí aa tura warí seattinia wakeram? ¡Tákumni̱ṉkia wi akupeamu jímiapetek sunastatme!” tímiayi. 4 Tutai Istir úunt akupniun chicharuk “Ámiji̱a̱i̱ péṉkeraitkiuiṉkia yamái tí peṉker yurumtai̱ namperan wi iwiarturjame. Nui̱ ame Amanja̱i̱ winitiá” tímiayi. 5 Nuya̱ṉka úunt akupin chichaak “Wárikmasrum Aman untsuktarum. Istir tana nu túrami” tímiayi. Tura úunt akupin Amanja̱i̱ Istir yurumak iwiaramunam támiayi. 6 Úunt akupin wíniun umúu pujus chichaak “¿Ame wakeramusha tuit? Núnaka amastatjai. Tura ¿warí seattiaj tame? Kame wi akupeamu jímiapetek sunastatme” tímiayi. 7 Tutai Istir áimiuk “Jú̱chiniak wakerajna nuna seajme. 8 Úunt akupniuja̱i̱ iisam péṉkeraitkiuiṉkia tura wi seajme nusha núnisaṉ tájamna nusha túramniaitkiumka wi ataksha tí peṉker núkap yurumátniun iwiarattajna nui̱ Amanja̱i̱ winitiá tusan wakerajai. Tákumni̱ṉkia kashin ame támena núnisnak túrattajai” tímiayi.

Aman Martukíun mátaj timia

9 Nu táman antuk Amanka tí waras jiinkimiayi. Túmayat Martukíu úunt akupniu je̱e̱ wáitiri̱n pujá wainkiamsha ashamacham tura wajáttásha wajatkicham Aman Martukíun suíran ka̱e̱ kaje̱ntukmiayi. 10 Amanka tímianu kajekiataṉ katsuntas páchitsuk je̱e̱n waketkimiayi. Túruna taa ni amikri̱ armia nuna tura ni nuwé̱ Séresnasha untsukarmiayi. 11 Tura Amanka imiá naṉkaamas kuítriniuya nuna núnisaṉ uchirí̱sha tí untsurí armia nunasha tura itiurá úunt akupin uunt awajsámia áitkiasaṉ úunt akupin chíkich úuntri̱ji̱a̱i̱ nuyá̱ chíkich takarniúri̱ji̱a̱i̱sha naṉkamantu awajsámia nuna áujmatmiayi. 12 Amancha nu arant chichaak “Tí peṉker yurumátniun iwiarainia nui̱ nuwa̱ akupin Istir úunt akupniui̱ wétinian chikichnaka ipiatsuk kashincha winiak ipiatáyi. 13 Túrasha tímianaitiatnaksha Martukíun úunt akupniu wáitiri̱n pujan wáinkiun peṉké antra núnis nekapmameajai” tímiayi. 14 Nuna takui̱ ni nuwe̱ Séres núnisaṉ ni amikrí̱sha chicharainiak “Tákumka kajemtikra maatai̱ yakiri̱ seṉkuintia kuntu jeá najanmamtikiawarta. Túram kashin káshik úunt akupin chicharkum Martukíu nui̱ nenatarum titiá. Nu túram tí peṉker yurumtai̱ nampernum úunt akupniuja̱i̱ warasam waya̱ta.” Tuinia nuna Aman antuk nekas péṉkeraiti tu enentáimias kajemtikrar “maatai̱ najanatarum” tímiayi.