Istir

Aman Martukíuwai̱ péejchach ajamu

6 Nu káshikia úunt akupin kanartinian tujintkiamiayi. Túruna chichaak “Ashí túrunama nuna winia papirui̱ áarman itiarti” tímiayi. Nuna takui̱ úunt akupniui̱ áujnasmiayi. 2 Nuya̱ṉka áujas ju̱ áarman wáinkiarmiayi. Yaunchu Wiktanja̱i̱ Téres jimiará áishmaṉ nuwá̱ nuatcha úunt akupniu wáitiri̱n wajatin armia nu úunt akupin Asuerun maatai tusa wakeruinian Martukíu etserkamiayi. 3 Nuya̱ṉka úunt akupin chichaak “Martukíusha nuna etserkasha ¿warí péṉkerna wáinkiait?” takui̱ ni yaintri̱ pujuarmia nu úunt akupniun chicharainiak “Niṉkia wariṉkish itiurkachmaiti” tiármiayi. 4 Nuya̱ṉka úunt akupin chichaak “¿Ya a̱a̱ wajá?” támaja̱i̱ métek Aman akupniu je̱e̱n á̱a̱ri̱n taa Martukíun kajemtikra mátin iwiaramu ana ai̱ úunt akupin nenamtikiati títiaj tusa úunt akupniun wajatmiayi. 5 Tura úunt akupniu yaintri̱ chichainiak “A̱a̱ṉka Aman wajawai” tuíniakui úunt akupin chichaak “Waya̱ti” tímiayi. 6 Takui̱ Aman waya̱miayi. Túrunamtai úunt akupin inintrak “Úunt akupniun yana shiir awajsattsa wakera nuna ¿úunt akupin warinia túratta?” takui̱ Amanka ní enentáimsaṉ wiji̱a̱i̱ naṉkaamassha ¿yanak úunt akupin shiir awajsatniuncha wakera? tu enentáimsamiayi. 7 Nuya̱ṉka Aman úunt akupniun aya̱k “Nu áishmaṉnaka úunt akupin shiir awajsattsa wakerana nui̱ti. 8 Tuma asamtai núnaka pushí úunt akupin entsatái̱ tura kawaisha úunt akupin ekeemtai̱ itiartiarum tura úunt akupin etseṉkrutai̱ etseṉkrumtikiatarum. 9 Tura pushinkia núnisaṉ kawaincha úunt akupniu takarniúri̱ nekas peṉkeri̱ya̱ nu susati. Núnisaṉ úunt akupin yana shiir awajsattsa wakera núnaka nú pushin áentsrar kawainium ekenak pepru init á̱a̱ri̱n ewekámas kakantar untsumainiak ‘Úunt akupin yana shiir awajsataj tusa wakera nuka jú̱tikiatniuiti’ tu untsumkarti” tímiayi. 10 Nuya̱ṉka úunt akupin Amanan chicharuk “Wats wárikmasam ame tímiamna nútiksamek pushisha tura kawaisha jukim Israer shuar Martukíu wáitiniam pujana nu túrata, ame tímiamna nu peṉké umitsuk iniaisaip.” 11 Tutai Aman pushin achik áentsar kawainium ekenak Martukíun pepru áṉkamuri̱ ámanum jukimiayi. Nui̱ ewekámas kakantar untsumuk “Úunt akupin áishmaṉkan shiir awajsattsa wakera nuka jú̱tikiatniuiti” tu untsummiayi.

12 Nu turasu̱a̱ umikiam Martukíuka ataksha úunt akupniu je̱e̱n wáitiri̱n pujuumiayi. Túrasha Amanka tí kuntuts enentáimiar muuke̱n nukuk wárikmas je̱e̱n waketkimiayi. 13 Aman je̱e̱n jea ni nua̱ri̱n Séresan tura amikrí̱ncha túrunamia nuna mash ujakármiayi. Túram chicharainiak “Nú Martukíu Israer shuaraitkiuiṉkia ámeka peṉké nupetkashtatme antsu nekas yajauch awajmámsattame” tiármiayi. 14 Nuna tu chicháa matsatainiai̱ṉ úunt akupniu takarniúri̱ nuatcha armia nu Istir tí peṉker yurumtai̱ nampernum Amanan jukitiai tusar wárikmas tariarmiayi.