Istir

Istir Israer shuaraitjiai tusa étserma

7 Kame úunt akupniuka Amanja̱i̱ nuwa̱ akupin Istirja̱i̱ yurumátaj tusar wéarmiayi. 2 Tura nu tsawantincha úunt akupin wíniun umúu pujus Istiran chicharuk “¿Ame wakeramusha tuit? Núnaka amastatjai. Tura ¿warí seattiaj tame? Kame wi akupeamu jímiapetek sunastatme” tímiayi. 3 Nuya̱ṉka tutai Istir chichaak “Úunt akupniuja̱i̱ iisam péṉkeraitkiuiṉkia tura wi seajme nusha núnisaṉ tájamna nusha ámiji̱a̱i̱sha túramniaitkiuiṉkia wi wakeramuka wi iwiaaku átinian núnisnak wi seatjam tájana nuka wí shuarsha iwiaaku árat tusan seajme. 4 Warí, wikia winia shuaruja̱i̱ emesnakar kajeṉkar amunkatin surukmaitji. Antsu emetamu iniatai̱ ártí tusar surukmaitkiurkia nuiṉkia pachimiascharaintji. Núnisaṉ ii túrunawarmasha úunt akupniunka kuit akikma naṉkaamas peṉké yajauch awajsainti” tímiayi. 5 Tutai úunt akupin Asueru Istiran chicharuk “Nuna túratniun enentáimna nusha ¿yait tura tui̱ pujá?” tímiayi. 6 Tutai Istir áimiuk “Ii nemasri̱ netse peṉké yajauchia nuka ju̱ Aman eketna ju̱i̱ti” tutai Amanka úunt akupniusha tura Istirsha pujuiniamunmaṉ sapijmiak jaka enentáimiá ekemiayi.

Aman mantamnamtai Martukíu awakmakma

7 Nuya̱ṉka úunt akupin nuna nekáa ti kajek péṉker yurumtainmaya̱ ajapa ikiuak kuku̱j aja úunt akupniu je̱e̱n amia nui̱ wémiayi. Antsu Amanka úunt akupin Amanka mantamnati títinian nekaama nuwa̱ akupin Istirai̱ jáka̱i̱j antsu iwiaakmarun chichampruktaj tusa nuiṉ wajas juákmiayi. 8 Nuya̱ṉka úunt akupin kuku̱j ajanmaya̱ waketki̱ péṉker yurumtainiam nui̱ ataksha támiayi. Tura pujutai̱niam Istir pujamunam Aman iniant awaṉtun tarimiayi. Kame úunt akupin nuna wainiak chicharuk “Winia je̱a̱rui̱ wisha pujai̱ṉkik ¿Istirsha yajauch awajsattam?” úunt akupin nuna takui̱ Amana yapi̱n nukurkarmiayi. 9 Túrawarmatai úunt akupniu takarniúri̱ nuatcha áishmaṉ Arpuna chichaak “Martukíu kajemtikratin yakiri̱nkia seṉkuintia kuntu jeá Aman ni je̱e̱n najanamu awai” takui̱ úunt akupin chichaak “Nui̱ nenaatarum” tímiayi. 10 Martukíu kajemtikra mátniun imia niṉki Aman najanamia nui̱ níniak nenawarmiayi. Túrawarmatai úunt akupin suir kaje̱ntkamun mikirmiayi.