Jirimías
Israera tsanirmari̱
3 Nuwa̱ ajapamu waketki̱ niniurtukua nu ataksha ní áishri̱ni̱ṉ waketkiti ¿tíminkiait? ¿Nu mátsatkamusha takamtsuk mui̱jmiai̱ ajatsuk? Núnisam ámeka kayá yus tikishmátraitme túmakum nuwa̱ untsurí áishmaṉja̱i̱ tsanirma núnisam tsanirmaitme. Túmayatmekek ¿Amiini̱ṉ waketkittiaj túrutam? túramui Uunt Yus. 2 Paṉkaim náintiaani̱ íimsakiá. Ámiji̱a̱i̱sha ¿tui̱ tepescharuit? Arapianmaya̱ aents kampuntin atsú nuṉkanam urukainia núnisam jintiasha aents nákakaruitme. Ame tsanirmakum tura yajauch túrakum nuṉkasha mui̱jmiai̱ amajkaruitme. 3 Ame nu tura asakmin yumi yutukcharuiti tura nu arant arakan tsakatmaktincha yutukcharuiti. Túmaitiatmek tsanirma nuwa̱ natsantaincha urukainia núnismek amesha peṉké natsa̱a̱rchaitme. 4 Tura yamaikia ‘Winia Aparu’ núja̱i̱ṉchuka ‘Nátsauyaj nuya̱ṉ Ámeka winia amikruitme’ ¿túruttsumek? 5 ¿Túkek kajertuká? ¿Peṉké kajinmattsukek pujustata? turuteame. Túrasha ¿urutmá yajauchia túratin jeam? tímiatrusmek túraitme” turutmiai.
Nuwa̱ kai̱ji̱a̱i̱ áujmatma
6 Uunt akupin Jusías pujumia nui̱ Uunt Yus chichartak “Yusan enentáimtichu Israer túruinia nu ¿wáiniamek? Ashí naint tura ashí numi ukat ukatin ainia nui̱ wéar tsanirmawaruiti. 7 Núja̱i̱ṉkia nuna iisan aun aitkia ashí umik ataksha waketki̱ tátatui timiajai túrasha táchamai. Ántsaṉ ni kai̱sha ántichu Jutasha nuna wainkiamai. 8 Yusan enentáimtichu Israernaka tí tsanirma asamtai ájapma papin najatan susan akupkámjai. Tura ni kai̱sha ántichu Jutasha sapijmiatsuk we nisha núnisaṉ tsanirmamai. 9 Kame ni tsanirmamuri̱ṉkia tiikia núkapchaiti tu enentáimias nu arantcha niṉkia kayaja̱i̱ tura numiji̱a̱i̱sha tsanirmamai túrak nuṉkancha peṉké mui̱jmiai̱ awajkámai. 10 Nuna túrayat ni kai̱ṉkia ántichu Jutaka ené enentáimia ajas wakettsuk antsu waitruá waketki̱ tamai” tawai Uunt Yus. 11 Nu arantcha Uunt Yus chichartak “Túrasha ántichu Jutá enentái̱ji̱a̱i̱ apatkamka Yusan enentáimtichu Israerá enentái̱ timiá peṉkeraiti. 12 Weme winia chichamur étserkum arakaani̱ íimsam chichaakum ‘Yusan enentáimtichu Israerá Wini̱i̱ṉ waketkitia. Túramka waitnenkartin asamtai Winia kajetái̱rka wáinkiashtatme. Ántsanak kajeknásha túkeka pujuschattajai. 13 Antsu áyatik ame yajauch túramuram “nekasaiti” titiá. Warí Uunt Yus ame Yúsrum kajerkam umirkachuitme. Túrakum ashí numi ukat ukatin írunmanum nékashtai̱ yus áiniana nu shiir enentáimtusaruitme. Túmakum Winia chichampruka peṉké anturtukchaitme túramui’ titiá” tímiayi Uunt Yus Jirimíasan.
14 Uunt Yus chichaak “Umichu uchi kajentírmesha Wikia atumí Uuntri̱ asamtai Wini̱i̱ṉ waketratarum tawai Uunt Yus. Kame péprunmaya̱ṉka chikichkiniak tura nuamtak shuarnumia̱nka jímiarchiniak júkiaran Seúnnum itiartatjai. 15 Tura murikiun wáinniuncha Winia enentái̱run nékaan amastatjarme. Túram tí peṉker nékainia ásar niṉkia tí shiir waitmaktatrume. 16 Nu nuṉkanam pujusrum núkap pampaakrum ti untsurí ajasrumsha ‘Uunt Yus Aentsja̱i̱ Chícham Najanamu Eṉketai̱’ tíchattarme tawai Uunt Yus. Kame Yusna Eṉketáiṉkia atsumnachu asamtai atakka awaiṉkirmeka peṉké najanashtatrume. Tura ukunmasha nuka peṉké enentáimtuschattarme. 17 Nu tsawantinkia Jerusaréṉnaka Uunt Yus Akupkur Pujutái̱ri̱ tu anaikiartatui. Tura ashí nuṉkanmaya̱ aentska Uunt Yusa náari̱n pachikiar Jerusaréṉnum iruntrartatui. Nuya̱ṉka ni enentái̱ kátsuram ásarmatai yajauch túriarmia núnisarka túrachartatui. 18 Nu tsawantinkia Jutanmaya̱sha Israernumia̱ja̱i̱ métek wekasartatui. Túmainiak arakaani̱ matsatainia nuka ni aparí̱ nuṉkan nérentin ajasármia nú nuṉkanam tsaníakuk káunkartatui.
Israerka waketkit tusa Uunt Yuska wakerawai
19 Wikia chichaakun ‘Maa, aneakun Winia uchirua tímiatrusan apujsatniun tura uunt nuṉka mátsatkamu nuṉké̱ ti shíirmach wakerújamaiya̱ nunasha amastinian urutmatsuk wakeraj túrasha ¿itiurak túratjam?’ timiajai. Tura Wí chichasnak ‘Winia Aparu turuttiatrume nuya̱ṉka peṉké kanakchattarme Wini̱ya̱ṉka’ timiajai. 20 Túrasha nuwa̱ tsaníakmari̱n anaṉka ajapa ikiua nútiksarum Israerá Wíniaka anaṉkruarum ajapa ikiurkiniaitrume, tawai Uunt Yus.
21 Naintia chichamu ántuwawai. Nuka Yus yaintkiat tusa seainiak Israer shuar útainiamuiti. Warí yajauchin túruiniak Uunt Yusnaka ni Yusri̱nkia kajinmatkiaruiti. 22 Ántichu kajen uchí Wini̱i̱n waketratarum. Túrawakrumni̱ṉkia kajen ántichuitrumna nuya̱ṉka péṉker awajsattajrume. Pai, yamaikia Ámeka Uunt Yus ii Yusri̱ asakmin Aminí̱ wininiaji. 23 Murasha tura naint antukchamnia ajainia nuka anaṉkartin áiniawai. Nekaska Uunt Yus ii Yusri̱i̱n Israer shuar uwempratniuka awai” tawai Uunt Yus. 24 Ii aparí̱ tí kakaram takasar wáinkiarmia núnaka, muriknasha waakancha uchirí̱ncha tura nawantri̱ncha, iikia najankamu yus natsanmai̱ áiniana nu wakerakur natsanmaya̱ juárkimiuk amuturmaki̱ winitrámainiaji. 25 Ii natsantí̱ni̱ṉ tepenaji tura ii yajauchiri̱ṉ mash amutmakji. Warí iisha tura ii aparí̱sha nátsauyajnia nuyá̱ juárkimiuk yamaiya̱ ju̱i̱sha Uunt Yus ii Yusri̱ncha yajauch túrawaruitji. Warí ii Yusri̱ Uunt Yusa chichame̱sha anturkacharuitji.