Riwiitikia

Yusa namperi̱ ainia nuna akupkámuri̱

23 Uunt Yus Muisaisan áujuk chicharuk 2 “Israer shuar áujsarta tura chicharainiakum ‘Uunt Yusa namperi̱ ainia nu ti arantúkmaja̱i̱ nájaneakrum ti shiir iruntrarum najanattarmena nuka Winia ti arantúkma namperuka jú̱ áiniawai.

Ayamtai̱ tsawant

3 Aya sais tsawantchik takakmastatme tura tsawant siátikia ayampratin tsawant átatui antsu nui̱ṉkia ti shiir iruntramu najanattarme. Nu tsawantinkia Uunt Yus akantúkma ayampratin tsawant asamtai tui̱ pujuttam nui̱sha warí takatkesha peṉké takaschattarme.

Paskua namper

4 Uunt Yusa namperi̱ ti arantúkmaka ti shiir iruntratin tsawant tesamuja̱i̱ métek untsumkattarmena nuka ju̱ áiniawai 5 Emka nantu tsawant katurse kí̱amunmaṉka Uunt Yusa Paskua namperi̱nti. 6 Nú nantutini̱ṉ tsawantka kínsetinkia paṉ karin eṉketáchma yutai̱ namper Uunt Yus najatattarme. Nuiṉkia paṉ karin eṉketáchma siati tsawant yuáttarme. 7 Yama naṉkamma tsawantinkia ti shiir iruntramu najanattarme tura warí takatkesha peṉké takaschattarme. 8 Siati tsawant Uunt Yus áestusa pujustatrume. Antsu tsawant siátitinkia ti shiir iruntramu najanattarme tura warí takatkesha peṉké takaschattarme’ titiá” tímiayi.

Emka nereku juutai̱ akupkámu

9 Uunt Yus Muisaisan áujuk chicharuk 10 “Israer shuar áujsarta tura chicharainiakum ‘Wi nuṉkan atumín amasuítjiarmena nui̱ waya̱rmeka árak arakmakrum juukrumka jiṉkiarum árak emka juukma Yus súakrum Yúsnan pujurin pujamunam itiatniuitrume. 11 Núnaka péṉker ati Yúsnan pujurin takuí̱ pe̱a̱ktiniaiti Uunt Yus íimmianum. Yúsnan pujurniuka ayamtai̱n íniaṉkasaṉ kashin takuí̱ pe̱a̱ktinaiti. 12 Nu árak jiṉkiamu susattarmena nu tsawantini̱ṉ takamtsuk áestuatin murik áishmaṉ tunamárcha chikichkí uwiniak takaku súsatniuitrume. 13 Árak súamuja̱i̱ kuatru ritru jea trikiu tí peṉker nekeṉma achikiam asuitiji̱a̱i̱ pachimpra nanerma susattame. Nuka tí peṉker kuṉkuin Uunt Yus áestuar sútainti. Tura Yusai̱ ukatratin winiu rítruka jeastatuk átiniaiti. 14 Tura atumí Yusri̱ sútatrumna nu tsawantinkia paṉsha tura nere unuikmasha núnisaṉ sameksha eem juukma emka Yus sútsuk peṉké yúashtiniaitrume. Atumí shuari̱ weanmaya̱ ukunam matsamártatna nú tui̱ pujuarta nui̱sha ju̱ akupkámunka tuke umikiartin najanamuiti.

Pintikiustís namper

15 Tura neré juukma jiṉkiamu takuir pe̱a̱tkatin Yus susattarmena nú ayamtai̱ íniaṉkasrumek kashin naṉkamarum siati semana takamtsuk nekapmartarum. 16 Siati ayamtai̱ tsawant naṉkaamasmatai nuyá̱ tsawa̱rtatna nuja̱i̱ seṉkuintia tsawant átatui. Nui̱ṉkia árak takuir pe̱a̱tkatin ataksha Uunt Yus súsatniuitrume. 17 Tui̱ pujuttarum nuyá̱ winiakrum trikiu emka juukma tí peṉker nekeṉma kuatru ritru jeaja̱i̱ jimiará paṉ najanar karin eṉketar iniarkámu takuí̱ pe̱a̱tkatin Uunt Yus itiatniuitrume. 18 Tura paṉja̱i̱ irumprarum siati murik tunamárcha chikichik uwiniak takaku tura chikichik waaka áishmaṉ yamatskam nuyá̱ jimiará chipiu súsatniutrume. Nuka árak tura umutai̱ susamua nuja̱i̱ métek takamtsuk Uunt Yus áestutniuiti. Nuka tí péṉker kuṉkuin Uunt Yus áestuatniuiti. 19 Ántsarmek tunáa túramunam chikichik chipiu áishmaṉ tura aṉkant pujustinniumsha jimiará murik chikichik uwiniak takaku áestuatniuitrume. 20 Yúsnan pujurin Uunt Yus íimmianum takuí pe̱a̱tkatniuiti. Tura paṉja̱i̱ tsaníasaṉ jimiará murikkia Uunt Yusna akantúkmaiti tuma ásar Yúsnan pujurniunu áiniawai. 21 Nú tsawantini̱ṉ ti shiir iruntramu ati tusarum untsumkatniuitrume tura warí takatkesha peṉké takaschatniuitrume. Atumí shuari̱ weanmaya̱ ukunam matsamártatna nú tui̱ pujuarta nui̱sha ju̱ akupkámunka tuke umikiartin najanamuiti. 22 Atumí nuṉke̱n árak juwakrumsha tsukiṉtiá tímianaiṉkia júu juusairap. Tura juuka umikiátam ataksha waketrukim júu juuka awajsashtiniaitrume. Nuka aents kuítrincha tura írar yajaya̱ áiniana nu ikiurkiarta. Warí, Witjiai Uunt Yus atumí Yusri̱’ tawai titiá” tímiayi.

Kachu umputai̱ namper

23 Uunt Yus Muisaisan áujuk chicharuk 24 “Israer shuar áujsarta tura chicharainiakum ‘Nantu siátitin emka tsawantin námper ayamtai̱ tsawantin najantaiya̱ nútiksarum najanattarme. Kame nampermakrumka kachu umpuakrum ántut awajchattarme. Túrarum ti shiir iruntramu najanattarme. 25 Nu tsawantinkia warí takatkesha peṉké takaschattarme núnisrumek Uunt Yussha áestuattarme’ tawai titiá” tímiayi.

Yajauch túramunam akikmaktin tsawant

26 Uunt Yus Muisaisan áujuk chicharuk 27 “Nu nantutini̱ṉ tsawantka tiástin yajauch túramunam akikmaktin tsawant átatui tura ti shiir iruntratin najanattarme. Átumka wariṉsha enentáimtutsuk nekaska aya Yúsnak enentáimtusrum ijiarmárum Uunt Yus áestuatniuka susattarme. 28 Nu tsawantinkia warí takatkesha peṉké takaschattarme. Warí nu tsawantka yajauch túramunam akikmaktin tsawantaiti. Kame yajauch túramunam atumí Yusri̱n Uunt Yusai̱ átum akikmaktin tsawantaiti. 29 Nekasan tajai yaaksha warinkisha enentáimtutsuk nekaska aya Yúsnak enentáimtus ijiarmachkuiṉkia nu tsawantini̱ṉ ni shuarnumia̱ṉka akankámu átatui. 30 Ashí aents warí takatnaksha takakmanka ní shuari̱ya̱ṉka nu tsawantini̱ṉ Wi emesrattajai. 31 Nu tsawantinkia warí takatkesha peṉké takaschattarme. Atumí shuari̱ weanmaya̱ ukunam matsamártatna nú tui̱ pujuarta nui̱sha ju̱ akupkámunka tuke umikiartin najanamuiti. 32 Átumka tí arantúkmaja̱i̱ ayampratin tsawantai̱ námper nájanearmena tímiatrusrum najanatniutrume. Túrarum tsawant nuiwi kí̱amunam naṉkamarum átumka wariṉsha enentáimtutsuk nekaska aya Yúsnak enentáimtusrum ijiarmátniuitrume. Kame ayampratniuka kí̱arai̱ naṉkama asarum ki̱i̱miam ayampratniuitrume” tímiayi.

Áakmakar nampermatai̱

33 Uunt Yus Muisaisan áujuk chicharuk 34 “Israer shuar áujsarta tura chicharainiakum nú nantutini̱ṉ siátitin tsawantka kínsetin áakmakar nampermatai̱ siati tsawant Uunt Yus najatattarme. 35 Emka tsawantinkia ti shiir írutramu najanattarme. Nu tsawantinkia warí takatkesha peṉké takaschattarme. 36 Siati tsawant Uunt Yus áestusa pujursattarme. Antsu tsawant úchutinkia ti shiir iruntramu najanattarme tura nútiksarmek Uunt Yus áestuattarme. Warí námper nájankuram iruntrume. Tuma asarum warí takatkesha peṉké takaschatniuitrume. 37 Uunt Yusa namperi̱ ti arantúkmaja̱i̱ nájatkur ti shiir iruntramu nájaneakrum Uunt Yus áestuatin tura takamtsuk áestuatniusha nuyá̱ árak súsatniusha núnisaṉ taṉku mantuatniusha tura umutai̱sha aṉkant aṉkant tu tsawantinia súsatniuit nui̱ súsatin áiniana nuka ju̱ áiniawai. 38 Kame ayamtai̱ tsawant Uunt Yusna akantúkarma tura átum súarmena nusha nuyá̱ átum wakerakrum ántrarmek súarmena núnisrumek átum wakerakrum ántrarmek ashí súarmena nuya̱sha námper anairajnia nusha iruniartatui.

39 Túrasha nántuka siátitini̱ṉ tsawantka kínsetin ashí árak juuka ikiusrum siati tsawant Uunt Yusa namperi̱ najantsa pujustatrume. Emka tsawantincha tura tsawant úchutincha ayampratin tsawantai̱ átatui. 40 Emka tsawantinkia numi tí peṉker áiniana nuna neré̱ júukrum tura kuṉkukí̱ nuke̱sha nuyá̱ numi ukat ukatin áiniana nuna kanawe̱sha núnisaṉ ashintsanmaya̱ sau nuke̱sha tsupirarum siati tsawant Uunt Yus atumí Yusri̱ íimmianum shiir warastarum. 41 Chikichik uwitin siati tsawant Uunt Yusa namperi̱ najantiatrume. Atumí shuari̱ weanmaya̱ ukunam matsamártatna nusha ju̱ akupkámunka tuke umikiartin najanamuiti. Namperka nantu siátitiin najantiniaitrume. 42 Aak áakmakrum siati tsawant áaknum matsamsattarme. Israer shuarnumia̱ṉka áaknum ashí pujusártatui. 43 Kame Ejiptunmaya̱ Israer shuaran Wi jí̱i̱rmiajna nui̱ áaknum matsasmiajrumna nuna átum wea nekaawarat tusarum nuka túratnuitrume. Witjiai Uunt Yus atumí Yusri̱” tímiayi. 44 Uunt Yusa namperi̱n ti arantúkmaja̱i̱ najanawartin armia núnaka tímiatrus Muisais Israer shuaran ujakármiayi.