Muisais Ujakma
11 Muisais chichaak “Atumí Uunt Yusri̱ aneatarum núnisrumek ashí tsawant ni jintíamuri̱sha tura akupkámu umiktin chichamsha péṉker enentáimtusrum umirkatarum.
2 11:2-7 Tuma asamtai Ejiptunam Ni kakarmari̱ iniakmamu wáinkiaitrume. Núnisaṉ úunt akupin Parauṉkan iniaktusmia nusha wainkia asarum Uunt Yus enentáimtustiniaitrume. Antsu atumí uchirí̱sha núnaka nekaacharu tura Úunt Yusnasha wáinkiacharuiti. Tura átumka Ejiptunmaya̱ suntarnasha kawairi̱ntiuk tura kárurtiuk atumín apapétmainian Kapantin Nayantsanam itiurkampa amukármia nusha wáinkiaitrume. Kame kampuntin atsunumsha Uunt Yus atumín túrutmawarmia nusha wáinkiaitrume. Ántsaṉ Ruwinia tiraṉki̱ Iriasára uchirí̱n Tataanja̱i̱ Apiráman shuári̱ntiuk tura warirí̱ntiuk ashí átum íimmianum nuṉka nakaatuk ku̱jararmia nusha wainkiamiarme. Warí ashí Uunt Yus túramun imia atumí jí̱ji̱a̱i̱ṉ wáinkiaitrume.
8 11:8-9 Tuma asamtai ashí akupkámu chichaman ujakmajrumna nuka peṉké kajinmattsuk tí peṉker enentáimtusrum umirkatarum. Nu umíakrum kakaram ajastarum. Túmakrumka atumí shuari̱n jú̱ nuṉkan súsartiniaitjiai. Uunt Yus atumí úuntri̱n tiarmia nu nuṉkanam waya̱ttarme. Túrarum nú nuṉkaka tí peṉker nuṉka ashí arak tsapáu asamtai muntsu míshkiji̱a̱i̱ entsa núnis akamunmasha nérentin ajasrum untsurí uwí nui̱ pujustatrume.
Péṉker nuṉka Israer susamu
10 11:10-12 Kame nérentin ajastaj tusarum wéarmena nú nuṉkaka Ejiptunmaya̱ jiinkí̱ winiakrum ikiukmiarumna núninchaiti. Nú nuṉkaka naintiar naintiar tepétúmin áiniawai. Tura nú nuṉkaka uwí náṉkammanumia̱ṉ juarki̱ uwí amuumam Uunt Yus tí peṉker wáinniuiti. Túramu asa nu nuṉkanmaṉka yumisha ti shiir yútiniaiti.
13 11:13-15 Uunt Yusan aneenak takamtsuk enentái̱ji̱a̱i̱ tura wakantiuk enentáimtusrum umíakrumni̱ṉkia warirmeksha tátramsachartatui. Tura yumisha núnisaṉ tí peṉker yuturtamiartatui. Túmakui̱ yurumkarmesha péṉker nerenakui núkap taramkarum núnisaṉ sá̱a̱krumsha péṉker tsapainiakui ti shiir matsamsattarme.
16 11:16-17 Ju̱ enentáimtutsuk kajinmátkirum najankamu yus enentáimtakrum tikishmáteakrumni̱ṉkia Uunt Yuska kajertamkartatui. Tura yumincha yútumtikchakui núnisaṉ araknasha tsapamtikchakui péṉker nuṉkanam pujayatrumek amuukattarme.
18 11:18-21 Túrunawa̱i̱j tusarum akupkámu chicham tí peṉker unuimiátratarum. Túrarum atumí enentái̱n tura atumí wakaní̱ji̱a̱i̱sha péṉker nekaarum umirkatarum. Tura nu chichamak áarum uwejmíncha núnisaṉ nijia̱i̱mincha kajinmatki̱j tusar jiṉkiamatarum. Tura tui̱ pujuttarum nui̱sha atumí uchirí̱ṉkia kánuiniakuisha tura nantainiakuisha nu chichamka jintintiatarum. Ántsaṉ atumí je̱e̱n pauri̱ncha tura pepru wáitiri̱ncha nu chichamak áarum anujkatarum. Nu túrakrumni̱ṉkia atumsha tura atumí uchirí̱sha untsurí uwí nú nuṉkanmaṉka pujusártatui.
22 11:22-25 Tura akupkámu umiktin chicham umíakrum Uunt Yus atumí Yusri̱ ti shiir enentáimtusrum aneakrumni̱ṉkia Uunt Yusak nu nuṉkanmaya̱ aentsnaka ji̱i̱rtamprartatui. Núnisaṉ nú nuṉkanmaya̱ aents ti untsurí tura uunt pepru áiniakuisha ashí ji̱i̱rartatui. Túrawar ni nuṉke̱nka atsú nuṉkanmaya̱ juarki̱ Ríwianua tímianai tura Yúpratis entsa nuyá̱ juarki̱ etsa̱ akatainmaani̱ nayants ana tímianai átatui.
Péṉker yumiṉ tura yajauch yumiṉnumia̱ aneartin
26 11:26-28 Núnisaṉ Uunt Yus atumí Yusri̱ akupkámuri̱ péṉker umíakrumka péṉkernum yumiṉnartatrume. Antsu nu umitsuk najanamu yus tikishmáteakrumka yajauchiniam yumiṉnartatrume.
29 11:29-30 Uunt Yus nuṉkan amasuítrumna nui̱ waya̱wakrumin péṉkernum yumiṉkramprartiṉkia Jeresém nainnium pujusártatui. Tura yajauchiniam yumiṉkramprartiṉkia Epar nainnium pujusártatui. Nuka Kanaan aents Arapánam pujuinia nuna nuṉke̱n Jurtan entsa amaini̱ Jirkarnum íṉkiuasmak ensena numi Murainium wajana nuí̱yaiti.
31 11:31-32 Nekas Jurtanka katitrarum Uunt Yus nuṉkan amasuítrumna nu nuṉka ata̱a̱rum nérentin ajasrum pujustatrume. Túrarmeka ashí akupkámu shiir enentáimtusrum umiktiniaitrume.