Muisais Ujakma
Akupkámu Umiktin Chicham Yusna Eṉketáin eṉkeamu
10 10:1-2 Nuya̱ṉka Uunt Yus winia chichartak ‘Jimiará kaya pakamám iwiaram naint wakata. Tura numiji̱a̱i̱ eṉketai̱sha najanata. Nuyá̱ wakaakmin emka kayanam aarma ijiakramamna nú chichamnak ataksha awaiṉkin áarmatai nú eṉketai̱niam eṉkeawarta’ tímiayi.
3 10:3-5 Tutai eṉketáin akasia numiji̱a̱i̱ wi najanamiajai. Túran kayancha jímiaran pakamá iwiaran jukin naint wakamiajai. Túramtai emka kayanam aarmia nunak ataksha Tias Akupkámu Umiktin Chichaman Uunt Yuska áarmiayi. Nuyá̱ waketkin Uunt Yus turutmia nuja̱i̱ métek umirkamjai.
6 10:6-7 Nuya̱ṉka Pirutpiníjakannumia̱ṉka jíintrar Israer shuarka Museranmaani̱ wéarmiayi. Nui̱ Araun jakamtai nui̱ṉ iwiarsarmiayi tura ni uchirí̱ Iriasár Yúsnan pujurin námkamiayi. Túrawar Kutkutanmaani̱ wéar nuya̱ṉka Jutpatánmaani̱ wéarmiayi.
8 10:8-9 Nu tsawantai̱ Yus Aentsja̱i̱ Chícham Najanamu Eṉketai̱run júkiarat tura Winia takartin armi núnisaraṉ yamaiya̱ tímiaja̱i̱sha Winia náarun pachisar shiir awajtiarat tusa Riwí shuarnaka Uunt Yus akankámiayi. Tuma ásar Riwí shuarka nuṉke̱ncha áiniawai. Warí ni yachi̱ sunasarmia núnaka súsacharmiayi antsu Uunt Yus timia núnisaṉ Riwí shuari̱n sunastin iwiaramuka aya Úunt Yuskete.
10 10:10-11 Yaunchu urukamiaj núnisnak kuaraintia tsawant tsawai̱sha tura káshisha naint pujusmiajai. Túrasha Uunt Yuska itiurchat awajtutsuk áyatik anturtukmiayi. Nuyá̱ Uunt Yus chichartak ‘Israer shuar wénamunam eem wetá túram yaunchu ni úuntri̱n ju̱ nuṉkan amastiniaitjiarme tiármiaj nui̱ waya̱rum nuṉka nérentin ajasrum pujustarum tusan akupeajme’ tímiayi.
Yus ju̱ umikta timia
12 Wats yamaikia Israer shuartiram, atumí Uunt Yusri̱ ¿warinia seatmarum? Jú̱chakait. Nekas ashamakrum Ni wakera nuja̱i̱ métek wekasatniun tura Uunt Yus átum nekas enentái̱ji̱a̱i̱ tura atumí wakaní̱ji̱a̱i̱sha aneakrum umirkatniun 13 nútiksarmek átum péṉker matsamsatniun akupkámu umiktin chichaman yamái ujajrumna nuna nekas umiktinian Uunt Yus seatmarmena nuka jú̱chikiti. 14 Wats ju̱ nekaatarum nayaimpir nayaimpir tura nuṉkasha nuyá̱ nui̱ mash irunainia nusha atumí Úunt Yusri̱niuiti. 15 Túmaitiat Uunt Yuska chíkich nuṉkanam pujuinia núnaka iniais antsu atumí úuntri̱n péṉker enentáimtus aneawarmiayi. Tura ni uchirí̱n nuyá̱ tiraṉki̱n eteṉma juurma yamaiya̱ ímiaja̱i̱sha pujarmena nuka átumetrume. 16 Tuma asamtai yamaikia kátsuram enentáikia iniaisarum nekas enentáiji̱a̱i̱ umirkuram Úunt Yusnaitrumna nu paant iniakmamsatarum. 17 Kame atumí Úunt Yusri̱ṉkia ashí najankamu ainia nú yusja̱i̱ Niṉki imiá nekas Yúsaiti núnisaṉ ashí uunt ainia núja̱i̱sha imiá nekas Úuntaiti. Ashí naṉkamantu Tujintkiachu Yus asa tí tsuumainti. Núnisaṉ aentsnasha métekrak enentáimtiniaiti tura ántrar susamua nuja̱i̱ sumakchamniaiti. 18 Núnisaṉ Uunt Yus mitiaikiancha waje̱ncha nekasa nuja̱i̱ métek túrin asa shiir wáinniuiti. Tura yajaya̱ aents atumín pujuinia nunasha aneak yurumkancha entsatáincha súwiti. 19 Tura atumsha yajaya̱ aents wekainia nusha aneatarum. Warí atumsha Ejiptu nuṉkanam yajaya̱ aents pujuchmakarum. 20 Tuma asamtai atumí Uunt Yusri̱ ashamakrum tikishmátratarum. Tura Niṉki umirkatarum. Núnisrumek Niṉki shiir enentáimtusrum wekasatarum. Tura ti nekas tajai tákurmesha aya ni náari̱ṉ pachisrum titiarum.* 21 Tura Níyaiti nekas enentáimtusam kantampruátniuitmena nuka, atumí Yusri̱ túramun tura najankamu uunt ainia nu tí tsuumainian íijat iniakturmakui wainkiamarumna nuka nekaska Níṉkiti. 22 Kame atumí uuntri̱ Ejiptu nuṉkanam taarmia nui̱ṉkia aya sataintiachik ármiayi. Antsu yamaikia atumí Uunt Yusri̱ tí ipiampátmar nayaimpiniam yaa tsaparua tímiatrus awajtámsaitrume” tímiayi Muisais.