Muisais Ujakma

Yus Shiir Awajtai̱ Je̱a̱ jú̱kete

12 12:​1-12 Uunt Yus nuṉkan amasuítrumna nui̱ jearmeka nu nuṉkanmaya̱ aentsu yusri̱ tikishmáttai̱ṉkia ashí emeskatniuitrume. Ni yusri̱ áestutai̱sha tura enentáimtutai̱ kaya áiniasha tsái̱ktiniaitrume. Núnisaṉ Asera yusnasha tura nakumka najankamusha áeskarum ashí amuktiniaitrume. Antsu atumí Yusri̱ Uunt Yus enentáimtutai̱ ainia nuka túrashtiniaitrume. Túrasha matsamkamu áiniana nui̱ Uunt Yus pujustaj tusa tui̱ nuṉkan iniakmastata nui̱ ashinkiatniuitrume. Núnisrumek Uunt Yus súsatin ainia nusha nui̱ṉ ashí yaruaktiniaitrume. Tura ashí súsarma asarum nui̱ṉ iruntrarum Uunt Yus wararkuram yurumátniuitrume. Antsu Riwí shuarka núṉke̱ncha ásar nisha nui̱ pachinkiartiniaiti. Uunt Yus nuṉka suramsaitrumna nui̱ jeachu asarum aṉkant matsattsurme. Antsu Jurtan katitkirmeka nu nuṉkanam waya̱rum atumí nemasri̱ya̱ṉka aṉkant matsamsattarme.

13 12:​13-16 Núnisrumek náṉkamsarum Uunt Yuska takamtsuk áestuashtiniaitrume. Antsu Uunt Yus nuṉkan tui̱ iniakmasuit nui̱ṉ ashí túratniuitrume. Antsu namaṉka ashí péprunam átum wakerarmena tímiatrusrumek yúatniuitrume. Kame japa máarum yúarmena nútisarmek túratnuitrume áitkiasrumek tunamkachusha tura tunamkasha yuamnia áiniawai. Antsu númpenka yútsuk entsa ukarmena nútiksarmek nuṉká ukartiniaitrume.

17 12:​17-19 Kame Yus susamuka náṉkamsarmeka péprunam yúashtiniaitrume. Antsu Yus ju̱i̱ pujustájai tusa iniakmasua nui̱ yaruakrum Uunt Yus íimmianum ashí iruntrarum Riwí shuaraimiak Uunt Yus wararkuram yurumátniuitrume. Túrasha Riwí shuarka yáiṉtin peṉké kajinmátkishtiniaitrume.

20 12:​20-25 Uunt Yus nuṉkan amastatrumna nui̱ waya̱rmeka nú nuṉkaka ti uunt asamtai núnisaṉ Uunt Yus pujamusha arantaitkiuiṉkia pujuinia nui̱ṉ waakasha tura muriksha máarum aṉkant yúatniun amaajrume. Japá namaṉke̱n yuinia nútiksarum mui̱jmiai̱ ainia nusha tura imiatkincha ainia nusha yuámniaitrume. Antsu númpaka yuáwairap. Warí aya̱sh iwiaakmaka numpanmaiti tuma asamtai númpaka entsa ukarumna nútiksarum nuṉká ukartarum. Warí iwiaakma namaṉja̱i̱ métek yúachminiaiti. Nu ashí umíakrumka atumsha tura atumí uchirí̱sha Uunt Yus iismasha péṉker tura asarum tuke shiir pujustatrume.

26 12:​26-27 Antsu Uunt Yus iniaktusarma nuka Uunt Yus pujana nui̱ yaruaktarum. Nui̱ takamtsuk áestuatniusha tura namaṉsha Yus áestutai̱niam áestuatniuitrume. Tura númpaka Yus áestutai̱niam ukartiniaitrume. Antsu namaṉke̱ṉka yuámniaitrume.

28 Tura akupkámu chicham umíakrumka Uunt Yus íimmianumsha péṉker tura asarum atumsha núnisaṉ atumí uchirí̱sha tuke péṉker pujustatrume.

Najankamu yus enentáimtakur asutniátin

29 12:​29-31 Tura Uunt Yus nu nuṉkanmaya̱ aentsun ji̱i̱rarmatai nui̱ pujusrumsha nuyá̱ aents ní yusri̱n itiurá enentáimtin ainia núkesha inintrúschatniuitrume. Uunt Yus mui̱jmiai̱ iyá asamtai nu nuṉkanmaya̱ aentsu túrutairi̱nkia túrashtiniaitrume. Warí ni uchirí̱ṉkisha núja̱i̱nchuka nawantri̱ṉkisha ni najankamu yusri̱n áestin áiniawai. Núnaka Uunt Yuska mui̱jmiai̱ iyawai.

32 Ti shiir enentáimtusrum ishichkisha patatsuk tura ementasha ementsuk ashí akupkámu chicham umiktiniaitrume.