Muisais Ujakma

13 13:1-5 Núnisaṉ yusna etserniuksha núja̱i̱nchuka mesekramniuksha ju̱ túrunattawai tama uminkiashtimpiash. Túrunamtaiṉkia ‘Atumsha tura atumí aparí̱sha nekaacharma yus enentáimtusartai’ túramkurni̱ṉkia peṉké anturkashtiniaitrume. Warí nekas enentái̱ji̱a̱i̱yash tura takamtsuk wakaní̱ji̱a̱i̱yash anentiarum tusa núnaka Uunt Yus tsaṉkatkattawai. Antsu aya Uunt Yusak enentáimtakrum ni akupkámuri̱n umirkatarum. Tura ashí aentsun Uunt Yuska iniaisatai tu chicharkaru asa nu aentska mantamnatniuiti. Nu túrakrum atumíya̱ṉka yajauchikia emeṉkáktiniaitrume.

6 13:6-11 Áitkiasaṉ atumí yachi̱ṉsha tura uchirí̱ṉsha núja̱i̱nchuka atumí aneamu nua̱ri̱ṉsha íshishmasaṉ chichaak ‘Chíkich yus enentáimtustai’ tuíniakuisha anturkashtiniaitrume. Antsu peṉké waitnentsuk ameá ameá naṉkamawakmin ashí irunturar kayaja̱i̱ tukurar máwartiniaiti. Tura ashí Israer shuartiram antukrum sapijmiakrum atakka túrashtatrume.

12 13:12-18 Tura Uunt Yus péprun suramsaitrumna nui̱ matsatearmin aents Yusan enentáimtichu chichaak ‘Chíkich yus enentáimtustai’ tusa aentsun yajauch túrumtikiainiawai tama antukrumka peṉké iniaisashtiniaitrume. Antsu péṉker anintrúsrum nekaarum nekasaitkiuiṉkia mui̱jmiainian túrawaru ásarmatai nu péprunmaya̱ aentska taṉkurtiuk puya̱ja̱i̱ kajeṉkrum ashí amú amú awajsatniuitrume. Túrarum ni warirí̱ nui̱ irunainia nuka júukrum péprunam ajapén irumprarum péprusha takamtsuk ekemáktiniaitrume. Túrakrum Uunt Yus takamtsuk áestuatniua nútikiatniuitrume. Túramu asa ukunmaṉka peṉké pujuschamnia átatui. Nuya̱ṉka yumiṉkramu asamtai wariṉsha júkishtiniaitrume. Túrakrumka Uunt Yus umiru asakrumin Yusa kajetáiri̱ atsaṉkar aṉkant ajasártatrume tura pampaṉkrum ti untsurí ajastatrume.