Muisais Ujakma

14 14:1-2 Átumka Uunt Yusa shuari̱ anaikiar akantúkma tura imiatkincha awajsamu asarum aents jakamtaisha kúntuts enentáimkiuram aya̱shmíncha akamakrum tura muukmesha kesá kesá awajsashtiniaitrume.

Yúchatai tura yutai̱ ainia nu

3 14:3-8 Mui̱jmiai̱ áiniana nuka peṉké yúashtiniaitrume. Antsu yajasma nawe̱ chikiaku yurumáyat awaiṉki̱ itiak nau áiniana nuke yuámniaitrume. Tura awaiṉki̱ itiak náuwitiat nawe̱ chikiakcha asamtai kamiyusha tura sá̱wa̱sha yúashtiniaitrume. Kuchisha núnisaṉ nawe̱ṉka chikiakuitiat awaiṉki̱ itiak nauchu asamtai yúashtiniaitrume. Tura jakamtaisha antitcha antiṉchatniuitrume.

9 14:9-10 Tura entsaya̱ṉka aya sáeptin nuyá̱ wianmatai̱rtin ainia nuke yuámniaitrume. Antsu sáeptichu tura wianmatai̱rtichu ainia nuka mui̱jmiai̱ asamtai yúashtiniaitrume.

11 14:11-18 Nanamtincha aya péṉkerak ainia nuke yuámniaitrume. Antsu pínchuka tura ashí nanamtin káurun yu ainia nuka yúashtiniaitrume. Núnisaṉ ampushsha shanashnásha tura jéenchmasha nuyá̱ chíkich yajasma núnintiaku ainia nusha yúashtiniaitrume.

19 Núnisaṉ yajasmach nanaptin ainia nuka mui̱jmiai̱ asamtai yúashtiniaitrume.

20 Nanamtin ainia nuka yutai̱ ainia nuke yuámniaitrume.

21 Tura namaṉ kauterúka yúashtiniaitrume. Antsu chíkich aents susatarum. Ántsaṉ chipiu uchichikia ni nukurí̱ muntsurí̱ji̱a̱i̱ṉ iniarkashtiniaitrume.

Tiásnumia̱ akankar chikichik súsatin

22 14:22-27 Chikichik uwitin árak júukrumka peṉké kajinmattsuk tiásnumia̱ chikichik akankarum Yus pujamunam jukirum Uunt Yus súsatniuitrume. Nui̱ ashí yaruakrum tiásnumia̱ akankámu yúakrum ashí tsawant Uunt Yus ashamkatin nekaatniuitrume. Antsu Uunt Yus pujamu arantaitkiui̱ júkitin jeachrumka aya kuítiak urutmá jeá nuja̱i̱ métek súsatniuitrume. Túrasha Riwí shuarka núṉke̱ncha ásarmatai araka nere̱ súsatin peṉké kajinmátkishtiniaitrume.

28 14:28-29 Antsu menaintiú uwí naṉkaamasmataiṉkia nu uwitin ashí júuktatrumna nuyá̱ akankarum tiásnumia̱ chikichik atumí pépruri̱n ikiustiniaitrume. Túrawakrumin Riwí shuar núṉke̱ncha ásar tura yajaya̱ aentssha núnisaṉ waje̱sha nuyá̱ mitiaik ainia nusha nuna yúawartiniaiti. Túrakrumni̱ṉkia Uunt Yuska tuke yaintmaktatrume.