Muisais Ujakma
Tumashmaku tsaṉkurtai̱ uwí
15 15:1-6 Uunt Yus tiniu asamtai siati uwí jeamtaiṉkia ashí tumashmaku ainia nuka tsaṉkuratniuitrume. Antsu yajaya̱ aents atumji̱a̱i̱ matsatainia nu tumashitkiuiṉkia áyatik awaṉturkitia títiniaitrume. Túrasha Uunt Yus yáiniamu asar nui̱ matsatáiniaka chikichkisha atsumaka atsutniuiti. Nekas enentái̱ji̱a̱i̱ Uunt Yus enentáimtakrumka ashí nuṉkanmaya̱ aents kuít ikiasmin átatrume. Antsu átumka seamchatniuitrume. Núnisrumek ashí nuṉkanmaya̱ aentsu uuntri̱ ajasminiaitrume. Túrasha átumka chíkich aents akupkámu pujuschatniuitrume.
7 15:7-8 Tura Uunt Yus nuṉkan amastatrumna nui̱ jearum matsamkarmeka atumí yachi̱ atsumakuisha itiurchatka enentáimtutsuk ni atsumamuri̱ súsatniuitrume.
9 15:9-18 Núnisrumek tsaṉkurnatai̱ uwí ishichik ajasmatai susamsha awaṉturkichai tusarum yajauch enentáimiakrum atumí yachi̱ atsumamuri̱ sútsukka iniaisashtiniaitrume. Nu túrawakrumni̱ṉkia atumí yachi̱ Uunt Yusan seatramiakrumin yajauchiniam iniartatrume. Tura yajauch enentáimtsuk ni atsumamuri̱ súakrumninkia núnisaṉ Uunt Yussha atumniasha yaintmaktatrume. Kame kuítrinchasha tura atsumainiasha tuke iruntin áiniawai tuma asamtai nuka tuke yáiṉtiniaitrume. Tura Israer shuar áishmaṉkesha núja̱i̱nchuka nuwa̱ksha atumí takartámin ajastaj tusa surumakmataiṉkia sais uwichik takamtiksam siati uwí jeamtaiṉkia aṉkant akupkatniuitrume túrasha aṉkant akupeakrumsha jú̱nikkia akupkashtiniaitrume. Warí atumsha Ejiptunam emetamu wáitkiatai pujarmin Uunt Yus aṉkant awajtámsamiarumna nu enentáimsatniuitrume. Antsu anenmak wétinian nakitiakuiṉkia nakash achikrum wáitiniam anumkrum kuishi̱ chiṉkiaratarum túramka tuke atumí takartámin ajastatui. Tura aṉkant akupeakrumsha itiurchatka enentáimtusairap. Warí takakma chikichik tsawantin akitiái̱ji̱a̱i̱ṉkia naṉkaamas ishichkich akikiam sais uwí takamtiksa asarum túratniuitrume. Nu túrakrumni̱ṉkia Uunt Yussha péṉker yaintmaktatrume Uunt Yus turutmiayi” tusa Israer shuaran Muisais ujakármiayi.
19 15:19-23 Núnisaṉ Uunt Yus tiniu asamtai Muisais chichaak “Waaka tura murik emka petsakmaka Uunt Yus súsatniuitrume. Tura núja̱i̱ṉkia takakmatcha takakmaschatniuitrume núnisaṉ murikiu ure̱sha tsupirashtiniaitrume. Antsu ashí uwitin atumí shuari̱ji̱a̱i̱ iruntrarum Uunt Yus nuṉkan iniakmastatna nui̱ yúatniuitrume. Tura taṉku tunamáruitkiuiṉkia atumí Úunt Yusri̱ṉkia súsashtiniaitrume. Antsu nuka japa yúarmena nútiksarmek yuátarum antsu númpe̱ṉka entsa ukarum nútiksarmek ukartarum” Israer shuaran Muisais tímiayi.