Muisais Ujakma
Paskua namper
16 16:1-8 Muisais chichaak “Awip nantutin jíinkin asarum nú nantuka kajinmáttsuk Paskua námper najattiniaitrume. Tuma asamtai murikkisha núja̱i̱ṉchuka waakaksha máarum Paskua nampertin yuátarum túrasha karin eṉketámu ainia nuka peṉké yuáwairap. Tura nuja̱i̱ yúakrum siati tsawant paṉ karin eṉketáchma yuátarum. Nuyá̱ námper juárkuram kí̱arai̱ taṉku máattarmena nuna namaṉke̱ṉka nu chichamaik amuktiniaitrume. Núnisrumek náṉkamas péprunam taṉku máwairap antsu Uunt Yus pujustajtsa iniakmasua nui̱ṉ túratniuitrume. Ejiptunmaya̱ jiinkimiarmena núnisrumek nantu akaakui̱ máarum weara jiárum yuátarum. Túrarum kashin atumí je̱e̱ni̱ṉ waketratarum. Nuya̱ṉka sais tsawant paṉ karin eṉketáchma yuárum siati tsawantiṉkia Paskua namperi̱ najatatarum túrasha takatka peṉké atsutí.
Pintikiustís namper
9 16:9-12 Árak jú̱u̱ktin tsawant náṉkamkui siati tumiṉ nekapmartarum túrarum Uunt Yus Pintikiustís namper najattiarum. Nú namper nájankurmeka Uunt Yus suramsaitrumna nuja̱i̱ métek atumsha súsatniuitrume. Túrarum atumí shuari̱ji̱a̱i̱ṉ tura Riwí shuar Yúsnan pujurin nuyá̱ waje̱ ántsaṉ mitiaik nútiksaṉ irarsha atumí pépruri̱n pujuinia nuja̱i̱ warakrum Uunt Yus tui̱ pujustaj tusa iniakmasuit, nui̱ irurtrarum namperka najanatarum. Warí atumsha Ejiptunam emetamu wáitkiatai matsammiarme. Tuma asamtai ju̱ akupkámu nu enentáimtusrum umiktiniaitrume.
13 16:13-17 Atumí arakri̱ júukrum irumprarmeka atumí shuari̱ji̱a̱i̱ tura takartámin nuyá̱ Riwí shuar núnisaṉ waje̱ nútiksaṉ írar atumí pépruri̱n matsatainiana nuja̱i̱ iruntrarum warakrum Ákmakar Matsamtai̱ namper najankuram siati tsawant pujursatarum. Núnisaṉ áishmaṉtirmeka chikichik uwitini̱ṉ Uunt Yusai̱ menaintiú wantinkiatniuitrume. Émkaka Paṉ Karin Eṉketáchma nampertin tura Pintikiustís nampertin núnisaṉ Ákmakar Matsamtai̱ nampertin túrasha chikichkisha jú̱nikkia wéchatniuiti antsu Uunt Yus susa nuja̱i̱ métek súsatniun jukí̱ nisha wétiniaiti.
Itiurchat iwiartai̱
18 16:18-20 Tura Uunt Yus nuṉkan amasuítrumna nui̱ ashí péprunam chichama iwiarin sumamtikin tura itiurchatan iwiaratniun unuimiátkaru uunt anaikiarum apujsatarum. Túrasha nekasa nuja̱i̱ métek túruiniakka núkap tsawant iwiaaku pujustatui tura nú nuṉkasha tuke atumniak átatui.
Najankamu yus enentáimtuschatin
21 Atumí Uunt Yusri̱ áestutai̱ najatattarmena nui̱ tíjiu̱ch najankamu yus Asera enentáimtutai̱ numi araawairap. 22 Núnisrumek najankamu yus enentáimtutai̱ kaya awajainirap. Warí núnaka Uunt Yus peṉké muí̱jiawai.*