Muisais Ujakma
17 Atumí Uunt Yusri̱ waaka áishmaṉ nuíchuka murikkisha tunamárua nu tura warí urukaksha áestuawairap. Warí Úunt Yusja̱i̱ṉkia nuka muí̱jmiainti. 2 Nuyá̱ atumí nuṉke̱n pujustatrumna nui̱ tú peprunmaya̱ṉsha áishmaṉkesha nuwa̱ksha Uunt Yus aentsja̱i̱ chícham najanamu umitsuk Yus íimmianum Ni nakitiamun túrak, 3 chíkich najankamu yus ainia nuna núnisaṉ etsa̱ncha nantuncha tura yaa ainia nunasha yúsaiti tusa Wi suritkiamajrumna nuna tikishmátui 4 tama antukrumka émamkesrum nekaatarum. Tura ti nekasaitkiuiṉkia Israer shuarnum mui̱jmiainian nekas túraiti tusarum 5 núwa̱itkiuisha áishmaṉkaitkiuisha nu tunaan túraka péprunmaya̱ṉka jí̱i̱krum arant jukirum kayaja̱i̱ tukurum mátniuitrume. 6 Kame aents nekas wáinkiarua nu jímiar tura menaintiuksha nekas tajai tuíniakui mantamnatta nuka mantamnati antsu chikichik aents nekasaiti támaja̱i̱ṉkia mantamnashti. 7 Tura nekas wáinkiar etserkarua nuá nuá kayaja̱i̱ tukuarmatai nuya̱ṉka ashí aents tukuar máwarti. Nuní̱ túrakrum atumín yajauch pampartaj tau wárik emenkáittiarme.
8 Tura umitmakma ti itiurchat ainia nuka maṉkartuamuksha katsumkartukmaksha tura chíkich itiurchat túramu atumí nuṉke̱n átatna nu iwiaratin tujintiakrumka nú péprunmaya̱ jiinkirum tui̱ iwiarutarum Uunt Yus títiata nui̱ wétatrume. 9 Nuyá̱ Uunt Yúsnan pujurin Riwí shuar tura sumamtikin nú tsawantai̱ pujuartatna nui̱ werum itiurchat ujaktiniaitrume. Tura nú itiurchat itiura iwiaratarum núnaka ni jintintrámattarme. 10 Tura Uunt Yus tui̱ iwiarutarum turamtatrum nui̱ ju̱ní̱ túratarum turamtatrumna nuka wariṉsha peṉké kajinmattsuk tímiatrusrumek umiktiniaitrume. 11 Kame Yus akupkámu chicham tana nuja̱i̱ métek túrutai̱ atí tusa sumamtiktai̱ya̱ nu tímiatrusmek ishichkisha yapají̱tsuk umimtikiata. 12 Tura antsu Uunt Yúsnan takarniun nuyá̱ sumamtikniu chichame̱n umirtsuk aya kájea nuka mantamnattawai. Nuní̱ túmakui̱ atumíin yajauch pampartaj tau emeṉkákar awajtiatrume. 13 Nu túruna táman ashí aents nui̱ pujuinia nu antukar ashamainiak iikia áiṉkiashtai tiártatui.
Úunt akupniu umiktintri̱
14 Kame amesha Úunt Yusrum nuṉkan amastatna nui̱ jeam nérentin ajasam pujakum winí̱ ayaam chíkich nuṉkanmaya̱ úuntri̱ntin ainia núnisnak wisha úunt akupniun takustájai tákumsha 15 nekaska Israernumia̱ shuaran ame Úunt Yusrum iis péṉkeran amastatna nu áme yatsumek úunt akupin anaikiata. Antsu ame yátsumcha yajaya̱ weká nuka anaikiaip. 16 Tura anaikiattamna nu úunt akupniuka untsurí kawain ipiampátmarchati. Núnisaṉ ní shuari̱n Ejiptu nuṉkanam kawain ipiampátmarat tusa awakearchati. Warí Uunt Yus atakka nú jintianmaani̱ peṉké waketkirap tíchamkia. 17 Núnisaṉ nuwa̱n apattra tura kurincha kuítniasha núkap takustinian aya nunak enentáimtin áchati. Nuna túrakka ni Yusri̱n kajinmátkittiawai. 18 Kame nisha akuptai̱ pujutai̱niam akupkáttsa pujuska Yúsnan pujurin tura Riwí shuar Yus akupkámu chichaman takakainia nuna nisha papiri̱n aar takusti. 19 Tura akupkámu chichaman aar júsania núnaka ni takus pujuttana nui̱ṉkia tuke tsawant áujsati. Nuna túrak Yus arantúkar enentáimtustinian nekáa ashí nui̱ úunt akupkámu chicham aarma ana nuja̱i̱ métek umíak túrati. 20 Tura ju̱ akupkámu chichaman métek tímiatrusaṉ umía asa ni shuari̱ji̱a̱i̱ naṉkamantu enentáimtumaschati. Nuna túrak nisha tura ni uchirí̱sha Israer shuarnum tuke úunt akupin ártatui.*