Muisais Ujakma
Riwí shuara túratniuri̱
18 18:1-8 Tura Riwí shuar Yúsnan pujurin armia nuka núṉke̱ncha ártiniuyayi. Nuka Yus amasma nuyá̱ Uunt Yus áestuatin susamu ainia nuya̱n yurumin ármiayi. Warí Uunt Yus Riwí shuarnaka núnisaṉ ni uchirí̱ncha ukunmasha winia takartin tuke armi tusa anaikiamiayi. Tura Riwí shuar Israer shuar matsatainia nu péprunmaya̱ jiinkí̱ Uunt Yus chichaak ai̱ pujuuttame tutai nui̱ wéakuisha nincha yachi̱n itiarainia tímiatrusaṉ súsartiniuyayi. Núnisaṉ ni shuarai̱ya̱ ainia núnaka chíkich jurumainia nuja̱i̱ métek nisha nérenniuyayi tura wariṉkísh surukma áiniana nuna kuítrincha jurumkiartiniaiti.
9 Tura ámin Uunt Yus nuṉkan amastatna nui̱ pujusrumsha nu nuṉkanmaya̱ aents mui̱jmiainian túruinia nu túratin unuimiátrairap. 10 Núnisaṉ Israer shuartirmeka atumí uchirí̱ áishmaṉchiksha nuwa̱chiksha najankamu yusan aestua enentáimtuiniana nu wainniakcharti. Núnisaṉ iwianchnia̱ unuimiátai̱ papisha unuimiátrairap. Tura nekamin átincha unuimiátrairap. Núnisrumek uwishniumawairap. 11 Tura anamkartiniaitjiai nekaamniuitjiai tura jaká wakaní̱ji̱a̱i̱ chichawitjiai nuyá̱ wakanniasha untsuwitjiai tiniu ainia nui̱ werum anintrúsairap. 12 Tura náṉkamas aents nu yajauchin túraka Úunt Yusja̱i̱ṉkia mui̱jmiai̱yaiti. Tuma asamtai nu yajauchin mui̱jmiainian túrin ásarmatai Uunt Yus átum íimmianum ju̱ nuṉkanmaya̱ṉka ashí amukártatui. 13 Tura átumka Yusja̱i̱ íismaka tí peṉker átiniaitrume.
14 Kame nu nuṉkanmaya̱ átum jí̱i̱rtatrumna nu shuarka uwishniuitjiai tura nekamniuitjiai tuinia nuna anturin áiniawai. Tuma asamtai atumí Uunt Yusri̱ nu yajauch túratniunka tsaṉkatramkacharuiti.
Yúsnan etserin tátin
15 Ukunam atumí Uunt Yusri̱ átum weanmaya̱nak kame atumínia̱nak Yúsnan etserniun wiya jú̱ni̱nniak anaikiattawai. Tura nisha anturkatarum. 16 Tura ju̱sha ti nekasaiti Urep nainnium iruntramunam Uunt Yus seakum ‘Wisha yamaikia atak Uunt Yusru chichame̱n antuktinniaka tura ji keá íistinniasha jáka̱i̱j tusan ashamajai’ tímiame. 17 Tuma asamtai Uunt Yus chichartak ‘Tuinia nusha nekas péṉkeraiti. 18 Amea ánis Yúsnan etserniun ame yatsuminianak anaikiattajai. Tura winia chichamprun etserkattawai. Nuyá̱ ashí Wi títiatjana nuja̱i̱ métek chichartamkattawai. 19 Tura náṉkamas aents Ni Winia naarja̱i̱ etserkattana nuna ánturtachunka wi núnaka íistatjai. 20 Núnisaṉ Yúsnan etserin winia chichampruchun winia naarja̱i̱ waitruá étseruka tura chíkich yusa náari̱ji̱a̱i̱ étserna nuka jakattawai.’ 21 Tura amesha Uunt Yusa chichame̱nchu etserkamusha ‘¿itiurak nekaatjik?’ tu enentáimsashtapash. 22 Tura etserin Yusa náari̱ji̱a̱i̱ pachisar etserkamu uminiachkuṉka nuka Yusa chichame̱nchun ni enentái̱ji̱a̱i̱ṉ waitruá etserkaiti. Tuma asamtai nu etserniuka ashamkaip.*