Muisais Ujakma
Ajapnaiyatin chicham aarma
24 Tura áishmaṉ nuwá̱ nuatak natsanmainian waitiak nakitiak ajapataj tákuṉka ájapeajai tama papin aar susa ‘yamaikia je̱a̱ruí̱ya̱ṉka jiinkí̱ wetá’ títiniaiti. 2 Nuya̱ṉka nisha je̱a̱ya̱ jiinkí̱ aṉkant ajaska chíkich áishmaṉja̱i̱ nuatnaikiamniaiti. 3 Tura nú aishri̱sha nakitiar ájapeajai tama papin susa je̱e̱ya̱ ji̱i̱ki̱ akupkámtai nuíchuka ni jakamtaiksha 4 Yúsja̱i̱ṉkia peṉké mui̱jmiai̱ asamtai émka áishri̱ya̱nia nu awaiṉki̱ ataksha nuatkashtiniaiti. Atumín Yus nuṉkan amasua nuka yajauch awajsairap.
5 Yama nuatkaka mesetnumka wéchatniuiti. Tura warinmaṉsha útsukma áchati. Antsu chikichkí uwí ni je̱e̱n aṉkant pujus ni nua̱ri̱n waramtiksati.
6 Shuar tumashmakui akirkámtai awaṉtukmi̱j tusarum neketai̱ kayari̱ nuṉkaani̱ tura yakini̱ eketna nusha jurukirap. Warí nu jurukmiaka ¿wariji̱a̱i̱ṉ wáinmamak pujusat?
7 Núnisaṉ Israernumia̱ shuar nuamtaketiat kasamak jukí̱ ni iniatairi̱ awajás nuíchuka suruku nekaanamtaiṉkia kasa asamtai mátarum. Nuní̱ túrakrum atumín yajauch pampartaj tau wárik asakáittiarme.
8 Yúsnan pujurin Riwí shuaran akupkármajna nu repra suṉkurnan atumíin ashí jintintramainiak tiártatna nu umíakrum nekasa nu tímiatrusrum anturkatarum. 9 Átum Ejiptu nuṉkanmaya̱ jiinkimiarmena nui̱ atumí Uunt Yusri̱ Marin jintiá warí itiurkamia nu enentáimpratarum.* 10 Atumí írutramuri̱ wariṉkish íkiakrum winia awaṉtúrmam wisha ju̱na juruktiajai tusarum ni je̱e̱n waya̱wairap. 11 Antsu íkiamna nuke ni je̱e̱n wayá̱ awakémam ju̱ takusta tusa niṉki ji̱i̱ki̱ amasti. 12 Antsu kuítrincha akikmakmatai awaṉturkimnium tusa amasainia nu takakuk atsa̱we̱a̱rairap. 13 Tura akikmakmatai awaṉturkimnium tusa amasainia nuka etsa̱ akaikímtai̱ṉkia wárik awaṉtuktiarum. Ni pushiri̱ji̱a̱i̱ kának péṉker pujutnum yumiṉkrurat tusarum túratarum. Túrakrumka atumí Uunt Yusri̱ iismasha nekas péṉker túrarme.
14 Tura akíam takakma ainia nu atumí yachi̱ núja̱i̱nchuka irarkesha peṉké takurmakcha asa atsumainia nu atumí nuṉke̱n núnisaṉ atumí pépruri̱n pujuinia nu peṉké ántrarum wáitkiasairap. 15 Warí niṉkia peṉké takurmakcha asamtai tsawant iniaṉkatsuk takasa nui̱ṉ akiktarum warí ti enentáimias atsumak takakmatsuk. Nu túrachmaka Uunt Yusan ujakmatai átum tunaarintin juáka̱i̱rum.
16 Uchirí̱ yajauch túrutairi̱ji̱a̱i̱ apa jákashtiniaiti. Núnisaṉ aparí̱ tunaari̱n uchi jákashtiniaiti. Antsu ní yajauch túrutairi̱ji̱a̱i̱ṉ aṉkant aṉkant jákatin áiniawai.
17 Átum wakeramu túrakrum irarsha tura mitiaikiasha yajauch awajírap. Tura waje̱ wariṉkish íkiakrum akirkákmin awaṉtuktiajme tusarum pushiri̱ jurukirap. 18 Ejiptunam iniatai̱ pujarmin Uunt Yus atumí Yusri̱ ji̱i̱rmarmiarmena nu enentáimpratarum. Tuma asamtai Wi akupeajna nu umiktarum.
19 Áitkiasrumek atumí arakri̱ juwakrum jiṉkiá áepkiarma kajinmátkirmesha waketrukrum júu juusairap. Antsu núnaka yajaya̱ nuíchuka mitiaikiaksha tura waje̱ksha jurumkiarti. Nu túrakrumni̱ṉkia Uunt Yus tarimiat pujutnum yumiṉkramprattarme. 20 Nútiksarmek asuiti najantai uriwiu numi neré̱ tsutsukrar juwakrum kajinmátkimiuka waketrukrum ataksha tsutsukram júu juusairap. Antsu juákarainia núnaka yajaya̱ aents nuíchuka mitiaikiasha ántsaṉ waje̱ksha jurumkiarti. 21 Nuyá̱ úwasha júukrumka waketrukrum júu juusairap. Antsu juákarainia núnaka irarkesha mitiaikiaksha tura waje̱ksha jurumkiarti. 22 Kame Ejiptunam iniatai̱ pujuyarum nu enentáimpratarum. Tuma asarum Wi tájarmena nu umiktarum.*