Muisais Ujakma
Waje̱ nuatkatin chicham aarma
25 Tura aents itiurchat pujuiniak úuntnum iwiarattsa táarmataisha péṉker aentsnaka sumamtikin aṉkant akupeak yajauch aentsnaka sumamtikiatniuiti. 2 Nuyá̱ yajauch aents asutniátniuitkiuiṉkia sumamtikin nuṉká áepas nisha íimmianumaṉ urutmá asutniáti tímiait ímiatrusaṉ asutmamtikiatniuiti. 3 Tura asutíniaksha kuaraintiaka iniaṉkakchatniuiti. Warí núna naṉkaamas asutiámka ame yatsumi aya̱shi̱ emestukam peṉké natsan awajkattame. 4 Trikiu pakatai̱niam waaka takamtikiakrumka nuji̱ jiṉkiatáshtiniaitrume.* 5 Tura shuar nu je̱a̱nmaṉ ni yachi̱ji̱a̱i̱ irunar pujá yajutmatsuk jakamtaiṉkia nú waje̱nka chíkichkia nuatkashtiniaiti. Antsu ní waje̱ri̱ji̱a̱i̱ ni aishri̱ jakamia nuna yachi̱ji̱a̱i̱ṉ nuatnaikiatniuiti. Warí yachi̱ jaka asamtai ni shuar amuuka̱i̱ tusa waje̱ umiktinia nuna umíak túratniuiti. 6 Tura uchí iwia̱i̱n takustatna núnaka ni aishri̱ jakama nuna náari̱niak anaikiatniuiti. Warí Israer shuarnum ni naari̱ kajinmátnaki̱ tusa túratniuiti. 7 Núnisaṉ waje̱ ni waje̱ri̱n jaká yachi̱n nuatrukai támaitiat nakitrámka pepru wá̱i̱ti̱a̱i̱ri̱n chichama iwiarin pujuinia nui̱ we chichaak ‘Winia waje̱ruka ni yachí̱ naari̱ ju̱i̱ Israernum iwiaakua núnis pujusat tusa nakitiawai’ tákuiṉkia 8 Israernum pepru wá̱i̱ti̱a̱i̱ri̱n chichama iwiarin pujuinia nu áishmaṉkan untsukar nuatkata tusar áujsartiniaiti. Tura ni nú nuwa̱n nuatkatniun nakitiak nu arant ajakuiṉkia, 9 waje̱ nú aishmaṉkan weantuk chichama iwiarin pujuiniamunam ni sapatri̱n ukuitiak yapiniam usukiá chicharuk ‘Áishmaṉ ni yachi̱ yajutmarchamunam yajutmatrata támaitiat nakitiaka jú̱tikiatniuiti’ títiatui. 10 Kame Israer shuarnum nuní̱ túramu asamtai ní shuari̱ṉkia sapatri̱ ukuitkiamu tutai shuar ártatui.
Nuwa̱ natsantichu asutiátin
11 25:11-12 Jimiará áishmaṉ katsumnai pujuinian ni nua̱rí̱ ayamprúktaj tusa tarí chíkich áishmaṉkan sukiniam achikmatai̱ṉkia nú nuwa̱ka peṉké waitnentsuk uwejé̱ tsupirnaktiniaiti.
Nekapmatai̱ṉkia nekasa nuja̱i̱ métek átiniaiti
13 25:13-16 Núkap tsawant iwiaaku pujustin wakerakmeka kijin nekapmatai̱sha tura chíkich nekapmatai̱ ame surutai̱rmin takakmena nu nekasa nuja̱i̱ métek ártiniaiti. Nu nekapmatai̱ nekas métek áiniachkuṉka Úunt Yusja̱i̱ṉkia muí̱jmiainti.
Amarík yapajkiatin
17 25:17-19 Ejiptunmaya̱ jiinkirum nui̱ átum wáitsar yujarmin Amarík aents itiurchat awajtámsarmena nu enentáimpratarum. Tuma asamtai Kanaan nuṉkanam jeawar nérentin ajas matsamkarka Amarík aentska waitnentsuk takamtsuk amuktiniaitrume. Uunt Yus tiniu asamtai Muisais Israer shuaran tú ujakármiayi.