Muisais Ujakma

Emka nereku juukma

26 26:1-11 Yus nuṉkan amasuítrumna nui̱ jearum nu nuṉka nérentin ajasrum pujusrumka arakmakrum emka nerekáru júukrum chikichik chaṉkiniak itiatniuitrume. Túrarum Yúsnan pujurin pujuiniana nui̱ júkitniuitrume. Tura chaṉkinnium piaku Yúsnan pujurin súakrum ‘Yamaikia nekas Yus nuṉkan amasmiaj nú nuṉkanam pujaji’ títiniaitrume. Núnisaṉ Yúsnan pujurin nu chaṉkinian Yus áestutai̱niam ayamach apujsamtai chaṉkinian itiana nuka yaunchu Aprajám yajaya̱ itiur tamia tura Ejiptunam uunt mátsatka ajasmia nuna áujmatsatniuiti. Nu arantcha chichaakrum ‘Nuyá̱ emetamu wáitkiatai matsateari̱n Yus ni kakarmari̱ji̱a̱i̱ ji̱i̱rmarmiaji. Tura ju̱i̱ péṉker nuṉkanam ashí arak tsapáu asamtai muntsu míshkiji̱a̱i̱ entsa núnis akamunmasha ikiatmakuitji. Tuma asamtai arakmakan emka nerekárun juukan itiajai’ tusarum Yus tikishmátratniuitrume. Túramtai Riwí shuarsha tura yajaya̱ aentssha nuyá̱ nisha warasar itiainia nuna yúawartiniaiti.

Tiásnumia̱ chikichik akankar kuítrincha súsartin

12 26:12-15 Nú arantcha menaintiú uwí ántar súsatin uwí asamtai atumí arakri̱ júukrum tiásnumia̱ chikichik akanka (1/10) irumprarum Riwí shuarsha tura yajaya̱ ainia nu nuyá̱ mitiaik áiniana núnasha núnisaṉ waje̱sha nú araamu nere̱ súsatniuitrume. Tura imiatkímprachma pujusjai tusarum núnisnak Yus akupkámuncha mash umikjiai tusarum Israer shuarsha tura ju̱ nuṉka Ame sukartusmiamna nusha yaunchu tímiamna tímiatrusmek péṉker pujutnum yumiṉkiarturta Yus títiniaitrume.

16 Tuma asamtai Uunt Yus yamái atumín ju̱ akupkámu umiktin chicham péṉker unuimiátrarum nekaak tusa amarme. Kame umíakrum nekas atumí enentái̱ji̱a̱i̱ tura takamtsuk atumí wakaní̱ji̱a̱i̱sha umirkatnuitrume. 17 Nu asamtai atumsha yamái paant chichaakrum ‘Ju̱ka nekas ii Úunt Yusri̱nti tura niji̱a̱i̱ wekaakur ashí akupkámu umiktaji’ tíniuitrume. 18 Núnisaṉ Uunt Yus yamái chichartamuk ‘Israerá, atumniaka Wi nekas tímiajrumna núnisnak wíniaitrume tusan yamái aya Winiak árat tusan achikmajrume. Atumsha núnisrumek ashí Wi akupkámu umiktatrume. 19 Wi tímiaj nútiksanak Wiki ashí nuṉkanmaya̱ áentsja̱i̱ṉkia naṉkamantu awajsattajrume. Tura chíkich aents shiir awajtai̱, pachí ajat tura enentáimtu ajat átatrume. Kame atumí Uunt Yusri̱ asamtai átumka aya Winiak enentáimturin átatrume’ tawai Uunt Yus.” Tu ujakármiayi Muisais.