Muisais Ujakma

Yajauchiniam yumiṉkramu

27 Muisais tura pepru úuntri̱ji̱a̱i̱ iruntrar Israer shuaran chicharainiak “Jú̱ akupkámu yamái tájarmena nu nekas umiktarum. 2 Tura Uunt Yus atumí Yusri̱ nuṉkan amastatrumna nui̱ wesarum nu tsawantin Jurtan entsa amaini̱ katiṉkrumka kaya uunt awajairum pújuja̱i̱ yakartarum. 3 Tura atumí úuntri̱n nekas amé aentsun ju̱ péṉker nuṉka ashí arak tsapáu asamtai muntsu míshkiji̱a̱i̱ entsa núnis akamunmasha nérenniun súsartiniaitjiai tusa anajmatrampramiarmena nui̱ jeattsa wéakrum Jurtan entsa katitkittiarme. Túrarum nu kayanam Yus akupkámu umiktin chicham mash aartarum. 4 Nuyá̱ Jurtan katitkirum Epar nainnium jearum wi yamái tájarmena nútiksarmek kaya awajairum pújuja̱i̱ mash yakartarum. 5 Nuya̱sha kaya irumprarum atumí Uunt Yusri̱ áestutai̱ najanatarum. Túrasha jiruja̱i̱ kaya iwiarkamuja̱i̱ṉkia najanashtiniaitrume. 6 Tura atumí Uunt Yusri̱ áestutai̱ nájatkurmesha kaya iwiarkachmaja̱i̱ najanatniuitrume. Nui̱ Uunt Yus atumí Yusri̱ takamtsuk taṉku áestuattarme. 7 Túrarum aṉkant ajamusha taṉku áestuattarme. Nui̱ yurumpruarum Uunt Yus atumí Yusri̱ íimmianum warastatrume. 8 Túrasha nu kayanam ashí akupkámu umiktin chicham nekas paant aartarum” Muisais tímiayi.

9 Nuyá̱ Muisais tura Yúsnan pujurin Riwí shuar armia nuja̱i̱ ashí Israer shuaran chicharainiak “Wats Israer shuartiram mitia ajasrum ju̱ péṉker antuktarum. Yamaikia átumka atumí Yusri̱ Uunt Yusna ajasurme. 10 Atumí Yusri̱ Uunt Yusa chichame̱ antuktarum tura ni akupkámu umiktin chichame̱ wi yamái tájarmena nu umiktarum” tímiayi Muisais.

11 Kame nu tsawantin Muisais ju̱ túratarum tusa chicharainiak 12 “Jurtan entsa katitkittiarmena nui̱ Jeresém nainnium Israer shuartirmin péṉkerja̱i̱ yumiṉkramprattarmena nuka Semiun, Riwí, Jutá, tura Isakár, Jusé nuyá̱ Piṉjiamín pujuartatui. 13 Tura Epar nainnium yajauchiji̱a̱i̱ yumiṉkramprattarmena nuka Ruwin, Kaat, Aser, tura Sapurún, Tan nuyá̱ Neptarí ártatui. 14 Nui̱ Riwí shuar ashí Israernumia̱ shuartirmin kakaram chichamja̱i̱ jú̱nis turamtatrume,

15 ‘Yaaksha imintrar najanamu yusan nuíchuka ántar yus numiji̱a̱i̱ nakumkar aents najanamua nuna Uunt Yus muí̱jiamun u̱u̱k takakuka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

16 ‘Núnisaṉ uchi aparí̱n nukurí̱ncha yajauch enentáimtinkia yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

17 ‘Aents ni shuari̱ji̱a̱i̱ nuṉka nakarnáikiamunam eṉkemtakka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

18 ‘Shuar kusurun anaṉka yajá akupniuka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

19 ‘Ántsaṉ iraran, mitiaikian tura waje̱ncha níniua nuna atanniuka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

20 ‘Nuyá̱ aparí̱ nua̱ri̱n tsanirma nuka, aparí̱ kanutairi̱n iisu asa yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

21 ‘Ántsaṉ aents náṉkamas yajasmaja̱i̱ tsanirmakka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

22 ‘Nútiksaṉ waje̱mamunmaya̱ uchi ni aparí̱ nawantri̱ji̱a̱i̱ nuíchuka nukurí̱ nawantri̱ji̱a̱i̱ tsanirmakka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

23 ‘Núnisaṉ ni tsatsari̱ji̱a̱i̱ tsanirmakka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

24 ‘Áitkiasaṉ shuar ni írutramuri̱ anaṉka u̱u̱k maakka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

25 ‘Tura shuar chíkich útsukam umitmákcha nuna maakka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.

26 ‘Tura jú̱ akupkámu chichaman antukiat umíachuka yajauchiniam yumiṉkramu atí’ tuíniakui ashí aents aimiainiak ‘Núnisaṉ atí’ tiártatui.