Muisais Ujakma
Uminiakui péṉkerja̱i̱ yumiṉkramu
28 Tura atumí Uunt Yusri̱ akupkámu chichaman wi yamái atumín ujajrumna nu nekas umíakrumni̱ṉkia Uunt Yuska ashí nuṉkanmaya̱ aentsun naṉkaka awajtámsattarme. 2 Atumí Uunt Yusri̱ chichame̱ umireakrumka ashí ju̱ péṉker pujutnum yumiṉkramprattarme. 3 Péprunam tura atumí nuṉke̱n pujakrumni̱ṉkia ashí ju̱ péṉker yumiṉ áiniana ju̱ja̱i̱ péṉker pujutnum yumiṉkramprattarme. 4 Ántsaṉ atumí uchirí̱ncha tura arakri̱ncha waakarí̱ncha nuyá̱ murikrumniasha pampaṉtinnium yumiṉkrutmartatrume. 5 Nuyá̱ atumí yurumkari̱sha tura paṉ najantairmesha tátramsashtatrume. 6 Je̱a̱sha tura arant wekaakrumsha péṉker pujutnumka tuke yumiṉkramu átatrume. 7 Tura atumí nemasri̱ mesetan jurutrámsakrumni̱sha atumí Uunt Yusri̱ nupetmamtikramkattarme. Túram iruntrar káunkariat atumíya̱ṉka tsakiṉmakar pisakártatui. 8 Atumí Uunt Yusri̱ arakrumniasha tura ashí átum túrattarmena nunasha nuṉkan amastatrumna nui̱ warasrum matsamsaku tusa péṉkernum yumiṉkramprattarme. 9 Tura Uunt Yus akupkámu chicham umíakrum péṉker wekaakrumni̱ṉkia, atumí Uunt Yusri̱, ni timia ímiatrusaṉ Niniu árat tusarum tunaarincha awajtámsattarme. 10 Nuyá̱ ashí nuṉkanmaya̱ aents íirmasar Israerai̱ni̱ Uunt Yusa naari̱ shiir awajnakui atumín ashampramkattarme.
11 Tura Uunt Yus atumí we̱a̱trí̱n nuṉkan nekas amastiniaitjiarme tajai timia nú nuṉkanmasha ashí írunna nuna tí nukap amastatui. Kame ti pampaṉtatrume núnisaṉ atumí waakarí̱sha pampaṉkartatui tura arakrumniasha tí nukap júuktinian tsaṉkatramkattarme. 12 Nuyá̱ atumí nuṉke̱n ashí arakrum péṉker tsapakar núkap neretramiarat tusa ni peṉkeri̱ya̱n nayaimpinmaya̱ yumin yútumtiktiatui. Tura átumka untsurí nuṉkanmaya̱ aents kuítrum ikiastatrume. Tura Yusa péṉker yumiṉki̱ takaku asarum átumka kuitkia ikiamu wekaishtatrume. 13 28:13-14 Tura atumí Uunt Yusri̱ akupkámu chichame̱n wi yamái ujajrumna ju̱ awajitsuk nekas ímiatrusrum umíakrumka tura Niya̱ kanakrum aents najankamu yus tikishmáteachkurminkia Uunt Yuska atumniaka uku apujtamtsuk antsu eem apujtamsattarme. Ashí nuṉkanmaya̱ja̱i̱ naṉkaamas nupetmaku aṉkant matsamin awajtámsattarme.
Uminiachkui asutniátin
15 Tura atumí Uunt Yusri̱ akupkámu chichaman wi yamái atumín ujajrumna ju̱ antukrum umíachkurminkia ju̱ yajauch yumiṉ amaintiámkattarme. 16 Péprunam tura kampunniunam pujakrumsha yumiṉkramu átatrume. 17 Atumí yurumkari̱sha tura paṉ najantairmiṉsha yumiṉkramu átatrume. 18 Nuyá̱ atumí uchirí̱sha tura arakri̱sha waakarí̱sha tura murikrí̱sha yajauchiji̱a̱i̱ yumiṉkramu ártatui. 19 Je̱a̱sha tura arant wekaakrumsha yajauch pujutnumka tuke yumiṉkramu átatrume.
20 Tura átum tunáa túrakrum Yus iniaisa asakrumin Uunt Yus yajauch yumiṉkian tura páchim enentáimtikratniun nuyá̱ sapijmiakar kuraṉtinian akuptúrmaktatrume. Nuní̱ túrutma tí warik amutmaktatrume. 21 Tura átum nuṉka nérentin ajasrum matsamsattarmena nui̱ Uunt Yus atumín amumam suṉkuran akuptúrmaktatrumna nuka ju̱ suṉkur áiniawai, 22 sua̱ch suṉkurja̱i̱, tsuemuja̱i̱, émumpraja̱i̱, tsamamuja̱i̱ tura uunt esatja̱i̱sha núnisaṉ araka suṉkuri̱ ijiji̱a̱i̱ tura árak kaji̱ti̱a̱i̱ji̱a̱i̱ átum kajiṉkrum amuumam Uunt Yus wáitkiarmastatrume.
23 Yumisha yuturtamchattawai. Tura nuṉkasha káarmatai arakrumsha péṉker neretramchattawai. 24 Antsu Uunt Yus yumin yutumtiktsuk yuṉkunmin tura nuṉká ju̱yu̱ri̱n nayaimpinmaya̱n akuptúrmak átum kajiṉkrum amuumam wáitkiarmastatrume. 25 Uunt Yus tsaṉkampramkakrumin atumí nemasri̱ nupettamkattarme. Tura iruntrarum ashinkiayatrum nini̱ya̱ṉka tsakiṉmakarum pisaktatrume. Núnisrumek ashí nuṉkanmaya̱ aents yajauch iisma átatrume. 26 Tura atumí aya̱shi̱ṉkia ashí nanamtin yakiya̱ yukartin nuyá̱ nuṉkaya̱ yajasma ainia nuna yurumke̱ ajasártatui. Túrunamtaisha yaaksha kirtamkashtatrume.
27 Nuyá̱ Ejiptunmaya̱ aentsun kuchapja̱i̱ wáitkiasarmia nuja̱i̱ atumsha wáitsattarme. Núnisaṉ uṉkuja̱i̱ turiji̱a̱i̱ tura teremú tsuámarchamnia ainia núja̱i̱sha Uunt Yus atumniaka wáitkiarmastatrume. 28 Núnisaṉ Uunt Yus waurka awajtámsakrumin tura ji̱min ukustamprakrumin nuyá̱ pujuschamnia enentáimtikramprakrumni̱sha wáitsattarme. 29 Tura kusurú wáinmatsna núnisrumek tsawai̱sha kiritniunam takasrum wekáa núnitiarme. Tura atumí takatrí̱sha péṉkerka áchartatui. Tuke tsawant wáitkiasma tura kasartai̱ pujuttarme. Nuyá̱ aṉkant awajtámsatniuka atsuttawai.
30 Tura nuwa̱sha anajmartatrume. Túrasha chíkich áishmaṉ atantramtiatrume. Je̱a̱sha je̱a̱miatrumek nui̱ṉkia pujuschattarme. Nútiksarmek ajasha ajamiatrumek átumka yúashtatrume. 31 Nuyá̱ atumí waakari̱ncha átum íimprumni̱ṉ manturtamawartatui, túrasha peṉké yúashtatrume. Núnisaṉ atumí umpururi̱ncha átum íimprumni̱ṉ yarurtamkariat awaṉturmakchartatui. Nuyá̱ atumí murikrí̱ncha nemasrum yarurtamkartatui. Túrutmawakrumnisha yaaksha awaiṉkitniun yaintmakchattawai. 32 Núnisaṉ atumí uchirí̱ncha tura nawantri̱ncha atumsha íimprumni̱ṉ yajaya̱ aentsnum surukartatui. Túrawarmatai ashí tsawantin wáinkiataj tukamarum wáinchakrum wáitnenmai ajakrumsha peṉkesha itiurkashtatrume. 33 Ántsaṉ atumí nuṉke̱n takakmasrum arakmattarmena nunasha átum nékashtai̱ aents yuáwartatui. Tura ashí tsawant ayamtiktsuk wáitkiatai átatrume. 34 Tura átum ashí itiurchat wáintiatrumna nuja̱i̱ waurka ajastatrume. 35 Nuya̱ṉka Uunt Yus atumí tikishí̱ṉsha tura makui̱ṉsha nuyá̱ nawe̱ya̱ juárkiniak muuke̱a tímianai tsuámarchamnia uṉkumu suṉkurja̱i̱ asutiá wáitkiarmastatrume.
36 Tura atumniaka nuyá̱ atumí akupniúri̱ anaikiaitrumna nuja̱i̱ yajá nuṉkanam atumsha tura atumí aparí̱sha nékashtai̱niam Uunt Yus juramkittiarme. Túramu nui̱ pujusrum numiji̱a̱i̱ tura kayaja̱i̱ najankamu yus tikishmátrattarme. 37 Túram ashí nuṉkanam Uunt Yus tui̱ akuptámkattarum nui̱ pujakrumsha mui̱jtiai̱ ántsaṉ áujmattsari wishiktai̱ wekaittiarme. 38 Tura arakmatka tí nukap arakmattarme túrasha manchi amutramkurmin ishichik juurmattarme. 39 Tura úwasha araarum péṉker wáintiatrume. Túrayatrumek yumiri̱sha ijiurkarum umarchattarme. Warí aka amutramkurmin nere̱sha juurmakchattarme. 40 Núnisaṉ ashí atumí nuṉke̱n uriwiu numisha iruniartatui. Túrasha nerenayataṉ aya máju̱wainiakui kuṉkuin najankarum muukmin ukatmamchattarme. 41 Tura uchi áishmaṉ nuwa̱sha yajutmaktatrume túrasha atumji̱a̱i̱ṉkia pujuschartatui. Warí chíkich nuṉkanam yaruakma sepunam pujuartatui. 42 Tura atumí nuṉke̱n ashí numincha tura arakrumin nere̱ncha manchi amutramiartatui. 43 Núnisaṉ yajaya̱ aents atumji̱a̱i̱ pujuartatna nuka atumji̱a̱i̱ṉkia naṉkaamas kakaram ajasártatui. Túrunawarmatai átumka peṉké imiancha ajastatrume. 44 Niṉkia atumniaka ikiatmastatrume túrasha átumka ikiastin tujintkiattarme. Niṉkia uuntri̱ ajasártatui túrasha átumka ni iniatairi̱ ajastatrume.
45 Warí Uunt Yus atumí Yusri̱ chichame̱ umiktai tusarum péṉker anturkachu asarum ni akupkámu chichamsha umirkachuitrume. Tuma asakrumin ju̱ yajauch yumiṉkia átum kajinkia amuumam apapétmaktatrume. 46 Nuyá̱ atumsha tura atumí tiraṉki̱sha tí tsuumai̱ tura itiurchat wáinkiurmin nuja̱i̱ átum umikchamu tuke paant nekanattawai.
47 Núnisaṉ atumí Uunt Yusri̱ ashí wariṉkish takustinian tí nukap yaintmaku ai̱ṉ péṉker enentáiji̱a̱i̱ warasrum umirkachu asarum túrunattarme. 48 Nu arant Uunt Yus atumí nemasri̱n akuptúrmakarmatai atumsha nu umiru asarum tsukaja̱i̱sha kitiakja̱i̱sha tura misumáktinji̱a̱i̱sha núnisaṉ ashí wariṉkísh atsumamuja̱i̱ tí waitsattarme. Ántsaṉ yajaya̱ aentsun takarniúri̱ awajtámsar amuumam ti wáitkiarmastatrume. 49 Tura Uunt Yus nuṉka náṉkata ímianian churuwia kuntintri̱ wainiak inianna núnis iniantrámpratniun akuptúrmaktatrume. Tura nu nuṉkanmaya̱ aentsu chichame̱sha peṉké anturkashtatrume. 50 Nu aentska kajen ti netse ásar uchincha tura úuntchincha arantutsuk peṉké waitnentrachartatui. 51 Átumka kajinkia amuumam atumí waakari̱ pampaakuisha tura arakmakrum taramkakrumnisha mash yurutrámattarme. Kame atumí yurumkari̱ṉsha núnisaṉ asuitiṉsha tura umutai̱ṉsha nuyá̱ waakasha muriksha pampainiakuisha peṉké ikiurtámkishtatrume. Tura nu túram amukáttarme.
52 Nuyá̱ atumí Uunt Yusri̱ átum matsamsatniun nuṉkan amasmarumna nui̱ pujusrum ashí atumí nuṉke̱n ashí pépruri̱ kayaja̱i̱ yakí̱ wenuirum nui̱ uwempramnia enentáimmiarumna nuna téntakar matsamtúkar yumpunkiar utsanturmawar atumí pépruri̱n ashí akintrutmakartatui. 53 Tura atumí nemasri̱ ti wáitkiarmakrumin wáurkirum átum tui̱ pujuttarum nui̱ pujusrum atumí Uunt Yusri̱ pampartinian amasuítrumna nuke atumí uchirí̱sha tura nawantrumi namaṉké̱sha yuáttarme. 54 Atumíya̱ áishmaṉ tí peṉker waitnenkartin pujuwitiat atak íksaṉ ni yachi̱n tura nuwe̱n núnisaṉ uchirí̱ juákaru ainia nuna nemasmak kajera asa 55 ni uchirí̱ namaṉke̱nak surimiak yúak ampitsuk niṉki amuktatui. Warí ashí atumí pépruri̱n tui̱ pujuttarum nui̱ atumí nemasri̱ peṉké waitkiarmakrumin wáurkirum túmattarme. 56 Nunisaṉ atumíya̱ nuwa̱ tí peṉker tura waitnenkartin ti shiir pujú asa nuṉkancha ántiakchaitiat ni aneamu áishri̱n núnisaṉ nawantri̱ncha nuyá̱ uchirí̱ncha yajauch enentáimturtatui. 57 Tura ni nemasri̱ ni pépruri̱n ashí akintrukaram tí waitsattawai. Túruiniam yúatniuri̱sha peṉké atsakui nu nuwa̱ tsukamak ní takusmanak uchí je̱e̱ncha tura uchi kuírchin u̱u̱k yuáttawai.
58 Tura Uunt Yus atumí Yusri̱ ashí naṉkamantu nuyá̱ tí tsuumainia nu ashamakrum esettsarum enentáimtusrum ni akupkámu chicham ju̱ papinium áarmana nu umirchakrumni̱ṉkia 59 tí tsuumai̱ asutkiaja̱i̱ peṉké tsuámarchamnia suṉkurja̱i̱ atumniasha tura atumí tiraṉki̱ncha Uunt Yuska asuttiámattarme. 60 Ejiptunmaya̱n asutíniakui wainkiarum ashamkamiarmena nu suṉkurja̱i̱ peṉké iniaitiámsashtatrume. 61 Tura nu arantcha ashí suṉkurja̱i̱sha tura chíkich wáitsatniuja̱i̱sha ju̱ akupkámu papinium áarchamua nu suṉkurja̱i̱sha átum jaká amuumam asutiámattarme. 62 Tura atumsha Israer shuartiram nayaimpinmaya̱ yaaja̱i̱ métek nekapmarchamnia ajasuitiatrum atumí Uunt Yusri̱ umirkachu asarum peṉké ishichik juáktatrume. 63 Núnisaṉ atumín shiir tura untsurí awajtamuk Uunt Yus ti shiir warasmia núnisaṉ yamaikia atumín yajauch awajtámas amutmaktaj tusa warastatui. Tuma asarum nuṉka nérentin ajastaj tusarum waya̱ttarmena nuya̱ṉka ji̱i̱rma átatrume. 64 Túrutma Uunt Yusak yajá nuṉkanam pepru irunainia tímianai tsakiṉmak akuptámprattarme. Túram nui̱ pujusrum atumsha tura atumí úuntri̱sha wáinkiacharma numiji̱a̱i̱ tura kayaja̱i̱ najankamu yus tikishmátrattarme. 65 Tura nu nuṉkanam pujakrumsha peṉké ayamprashtatrume. Nui̱sha Uunt Yus sápij enentái̱n eṉketrámamtai ashí itiurchat wáintrumna nuja̱i̱ tí kuntuts enentáimkiuram wáitsattarme. 66 Túmakrum peṉké jakamnia nekapea asarum tsawai̱sha káshisha sapijmiattarme. Túmakrum iwiaakuash pujuartaji tu enentáimtiatrume. 67 Kame ashí tsuumainia nu wáinkiuram sapijmiakrum káshikkia chichaakrum ‘Káshitkiuṉka maak’ tura káshikia ‘Tsawaitkiunka maak’ títiatrume. 68 Tura wi chichaakun ‘Jú̱ jintiaka atakka peṉké wáinkiashtiniaitrume’ tímiajrumna nú jintianmaṉ Uunt Yus ataksha Ejiptunam uunt kanunam awaṉtamkittiarme. Tura atumí nemasri̱ iniatairi̱ ajasarat tusa áishmaṉnasha tura nuwa̱ncha surutmaktinian wakeriartatui túrasha yaaksha peṉké sumarmakchattarme.”*