Muisais Ujakma
Aents aya ápatkuja̱i̱ iwiaaku áchamniaiti
8 Wi yamái jintinkiun tájarmena nu ashí akupkámu chicham unuimiátratarum. Nu umíakrum imiá shiir pujusrum untsurí aents ajastatrume. Túrakrumin atumí úuntri̱n Uunt Yus nuṉkan anajmatuk nekas amastatjarme timia nu nuṉkanam pujustatrume. 2 Tura atumín aya kampuntin atsamunam Uunt Yus kuaraintia uwí enentáimtikramprataj tusa nekapramsamiarmena nu enentáimsatarum. Tura núnisaṉ ni akupkámu chichaman umirtukartimpiash tusa atumí enentái̱n nekartamattsa ewekátmasmiarme. 3 Tura ewekátmasmaja̱i̱sha tsukaja̱i̱sha ti waitsa árumni̱ṉ ukunam maná yurumkan ti shiir ayurtamamiarme. Nu yurumkanka atumsha tura atumí úuntri̱sha peṉké waincha ármiayi. Núnaka aents aya apatkuja̱i̱ṉ iwiaaku pujuschamniaiti. Antsu Yus táman enentáimtuiniak nekas iwiaaku pujusártatui tusa nékamtikramattsa túramiayi.* 4 Kame kuaraintia uwí wekasamiarmena nui̱sha atumí pushirí̱ṉsha imiamprachmiarme tura nawemíṉsha e̱a̱kchamiarme. 5 Tura atumek enentáimtumasrum nekaamatarum. Apa ni uchirí̱n jintintiá nútiksaṉ Uunt Yus atumniasha jintintrámamiarme. 6 Tura yamaikia atumsha Yus akupkámu chicham umiktarum tura jintintrámamiarmena nuja̱i̱ métek arantúkrum wekasatarum. Tu ujakármiayi Muisais Israer shuaran.
Uunt Yus kajinmatki̱j tusarum aneartarum tiarma
7 8:7-10 Uunt Yuska nekas péṉker nuṉkanam awa̱intiamearme. Nú nuṉkaka tí peṉker asamtai yurumkaka peṉké tátramsashtatrume. Núnisrumek ti taramkarum pujakrum yaṉkú jirusha nú nainniumia̱ṉ jusattarme. 11 8:11-18 Túrasha Uunt Yusan kajinmatki̱j tusarum anearum pujustiniaitrume. Tura Ni akupkámuri̱sha ashí umiktiniaitrume. Túrakrumka núkap yurumárum eje̱e̱marum tura péṉker je̱a̱mkarum núja̱i̱nchuka núkap waakartin ajasrum túrutskesha ti kuítrintin ajasrumka naṉkamantu enentáimtumakrum Uunt Yuska kajinmátkittiarme. Núnisaṉ kampuntin atsú nuṉka tí tsuumai̱ áiniana nui̱sha Uunt Yusak iniaṉkarmaitiatrum tura entsa atsamunmasha kayanmaya̱ entsa áarmaitiatrum nuyá̱ maná yurumkasha ayuramaitiatrum atumek enentáimtumasrum winia kakarmarja̱i̱ṉ tura winia takatruja̱i̱ṉ ashí takarjai títiatrume. Nuka tútsuk antsu aya Úunt Yusak enentáimtustiniaitrume. Warí yaunchu atumí úuntri̱ji̱a̱i̱ chichaman najanamia nuna umiktaj tusa kuítrintin ajastinniasha kakarmanka Niṉki amasuítrume.
19 8:19-20 Túrasha aya aneachma Uunt Yus kajinmátkirum aents najankamu yus enentáimtakrum tikishmáteakrumni̱ṉkia yamái wiki sumamtikiajrume. Tura Uunt Yusa chichame̱ antukcha asarum atumsha chíkich nuṉkanmaya̱ aentsun Uunt Yus itiurkatta núnisrumek atumsha ashí amuukattarme” tiármiayi Muisais Israer shuaran.