Muisais Ujakma

Nupetmaktinkia Israernachuiti antsu Úunt Yusai̱ya̱iti

9 Tura Muisais chichaak “Israer shuará antuktarum. Jurtan entsa katitkirum uunt nuṉka atumji̱a̱i̱ṉkia naṉkaamas tí uunt mátsatka tura atumji̱a̱i̱ṉkia naṉkaamas kakaram núnisaṉ wenuke̱sha kayaja̱i̱ tí yakí̱ nayaimpin ántiaku téntakar pujuiniak nupetkarum akintruktin yamái jeayi. 2 Kame uunt pépruiti tura aentsri̱sha ti naya Anak aents átumka nékarme. Núnisrumek ¿yaki Anak aentsu uchirí̱ji̱a̱i̱sha mánikiaint? tiniu ainia nusha ántiniaitrume. 3 Tura atumí Yusri̱ Uunt Yus atumíin eem wéana nu yamái nekaattarme. Niṉkia amukratin jíyaiti. Tuma asa nú aentsnaka ashí emesak atumsha íimprumni̱ṉ nupetkartatui. Túramtai Uunt Yus túrattarme timia núnisrumek ashí jí̱i̱rum wárik amuktatrume. 4 Núnisaṉ atumí Uunt Yusri̱ nupetmaktinian tsaṉkatramkakrumin nuṉka akintrukrum pujusrumsha iikia péṉker asakrin yáintmaji tiirap. Antsu nú aents nupetkattarmena nuka netse ásarmatai Uunt Yus nu aents mátsatkaka amukrum átum matsamsak tusa Niṉki tsaṉkatramkattarme. 5 Kame átum péṉkera túrin tura naka enentáimin asakrumin ju̱ nuṉkanam waya̱ttarme túramtsurme. Antsu Uunt Yus jú̱ mátsatkamunmaya̱ aentsnasha netse ásarmatai átum íimmianun amukártatui. Ju̱ka atumí Uunt Yusri̱ atumí úuntri̱n Aprajáman, Isakan, Jakupnasha ju̱ nuṉkan nekas amastatjai timia nuna umiktaj tusa túrattawai. 6 Tura ataksha tájarme átumka péṉker túrin asakrumin túrashtatui. Warí kátsuram enentáimin shuar árumni̱ṉ yaunchu atumí úuntri̱n tiniu asa nu péṉker nuṉkan Uunt Yus amastatrume.

Urepnum Israer Yusan nakitrarma

7 Átum kampuntin atsunum atumí Uunt Yusri̱ akajkamarumna nu nekas enentáimpratarum. Ejiptu nuṉkanmaya̱ jiinkimiarum ímianiaṉ ju̱ nuṉkanam táurmena ju̱i̱sha tuke Uunt Yus nakitniuitrume. 8 Kame átum Urep nainnium atumí Uunt Yusri̱ akajkamarme. Tura Nisha atumín ti kajertamak amutmaktaj tusa wakerutmakmarme. 9 Tura wi naint wakan Uunt Yus akupkámu umiktin chichaman Yus atumji̱a̱i̱ najanama nuna kaya pakamámunam áarman surusat tusan wakamjai. Kame nui̱ kuaraintia tsawant tsawai̱sha káshisha yurumtsuk tura entsankesha umutsuk pujusmajai. 10 Nuyá̱ Uunt Yus jimiará kaya pakamámunam nekas imia Ni uwejé̱ja̱i̱ áarman surusmai. Kame átum iruntramarumna nú tsawantai̱ Uunt Yus Senainium jinium páchitkia chichama nu nú kayanmasha mash áarmauyi. 11 Tura kuaraintia tsawant tsawai̱sha káshisha naṉkaamasai̱ nú kayan jímiaran surusmai. Kame nu kaya pakamámunam Uunt Yus aentsja̱i̱ chichaman najanamia nú áarmauyayi. 12 Tura Uunt Yus chichartak ‘Wárik ju̱ya̱ṉka akaikitia. Kame amé shuar Ejiptunmaya̱ jí̱i̱rmamna nu yajauchin túrawar tura tí warik Wi akupkámu umiktin chichaman umitsuk kajinmatkiar kurin imintrar ántar yusan nakumak najanawarai’ turutmiayi. 13 Tura nu arant Uunt Yus chichartak ‘Ju̱ shuarnasha íisarjai. Maa, enentái̱sha tí katsuram áiniawai. 14 Tuma asamtai yamaikia ámeka pachisaip. Ju̱ nuṉkanam pujuinia jú̱naka ashí amukan atakka enentáimtushtai̱ ártí tusan ni náari̱nkia asakátrartatjai. Antsu aminí̱ya̱ṉka untsurí shuar awajsan ti kakaram niṉkia naṉkaka awajsattajme’ turutmiai. 15 Tura nu nainnium ji keamunmaya̱ waketki̱ táarkun akupkámu chichaman jimiará kayanam áarman takukin itiamjai. 16 Túrasha peṉké turawairap Uunt Yus timia nuka umirtsuk wárichik Úunt Yusai̱ya̱ kanakrum kuri imintrarum waaka uchich najanamarme. Nu túrakrum atumí Úunt Yusri̱i̱n yajauch túrarmin nekas winia jí̱ruja̱i̱ wainkiamjarme. 17 Kame túrawakrumin akupkámu umiktin chichaman takukir winiamun átum íimprumin takuin aji̱a̱ran púurmajai. 18 Atumí Uunt Yusri̱ íimmianum ti yajauch túrakrum akajkamarumna nuja̱i̱ Uunt Yusan werin tikishmátramjai. Túran ataksha nuik túramiaj nútiksanak kuaraintia tsawant tsawai̱sha káshisha yurumtsuk tura entsankesha umutsuk pujusmajai. 19 Kame wisha Uunt Yus ti kajek atumín ashí amutmaktinian chichaakui ti ashamkamjai. Tura ataksha werimiaj nui̱ Uunt Yus wi seamun anturtukmai. 20 Tura Araunnasha Uunt Yus ti kajerak mátaj takui̱ wi yáiṉtaj tusan Uunt Yusan áujtusmajai. 21 Túran kuriji̱a̱i̱ waaka nakumka najanarum tikishmáteakrum tunáa túramarum nuna jinium apeamjai. Nuyá̱ tsai̱ tsái̱san ju̱yu̱mkan nú náinniumia̱ ashints tauya nui̱ utsamiajai.

22 Nútiksarmek Tawiranmasha nuyá̱ Masanmasha tura Kiprutjatáwanmasha atumkechuk ántichu asarum Uunt Yuska akajkamiarum. 23 Nu arantcha Káatish Parníanam pujarmin yamaikia werum wi nuṉkan amasmaj nui̱ waya̱tarum támaitiatrum atumí Uunt Yusri̱ chichame̱ nakitiakrum umirkachmarme. 24 Kame Uunt Yus nakitniuitrumna núnaka wikia atumniaka íinkiá nekamjarme. 25 Warí Uunt Yus Israer shuaran amuktatjai takui̱ Uunt Yusan kuaraintia tsawant tsawai̱sha tura káshisha tikishmáttsan pujurmiajai. 26 Tura Uunt Yusan chicharkun ‘Uuntá, ame áentsrum shiir awajénakum kakarmarmiji̱a̱i̱ Ejiptunmaya̱ jí̱i̱kiarmiam nu amukáraipia. 27 Wats Aprajámsha Isaksha tura Jakupsha enentáimtusaria. Tuma asamtai Israer shuar kátsuram enentáimtai̱sha aya yájauchiniak enentáimtutairi̱sha tura tunaarí̱sha íirsaraip. 28 Warí Ejiptunmaya̱ iin jí̱i̱rmiam nuyá̱ aents chichartamainiak “Uunt Yus Israer shuarnaka nuṉkan amastatjarme timia nu nuṉkanmaṉka ejetniun jeachu asa amukáruiti. Nuíchuka Ejiptunam pujuarmia nui̱ kajerainia asa ji̱i̱r yaruakar kampuntin atsú nuṉkanam amukáruiti” turamartatui. 29 Warí Israer shuarka Ame achikma áiniawai tura nekas Áminiu ásarmatai ame kunturam imiá kakarma nuja̱i̱ ji̱i̱ram yaruakmiame’ Yusan tímiajai.