Juaṉ

Jesus jíntiaiti

14 “Kúntuts pujusairap. Yus enentáimtustarum, Winiasha enentáimtursatarum. 2 Winia Aparuí̱ átum matsamsatin tí aṉkant írunui. Nekaschaitkiuiṉkia nunasha ujakcha̱a̱jrume. Tuma asamtai nuna iwiarataj tusan Aparuí̱ wéajai.

3 Tura iwiaaran amukan ataksha tátatjai. Tura tana yaruaktatjarme, wi pujamunam atumsha pujusúk tusan. 4 Wi wéaj nu nékarme tura jintiasha nékarme” tímiayi Jesus.

5 Tumas chichaak “Uuntá, Ame wéam nu nékatsji. ¿Jintiasha itiurak nekaatajⁱ?” 6 Takui̱ Jesus aya̱k “Wi nekas jíntiaitjiai. Núnisnak Nekasa nuitjiai. Tura Iwiaakmaitjiai. Yaaksha Winí̱ winiachkuṉka Aparuí̱ peṉké jeashtatui. 7 Winia nékarkurmeka winia Aparsha nekaawaintrume. Yamaisha Ni wainkia asarum nékarme” tímiayi. 8 Nuiṉkia Jiripsha chichaak “Uuntá, Apasha wainkiarkia maak” takui̱. 9 Jesus chichaak “Jiripí, atumji̱a̱i̱ ti pujusu ai̱sha ¿tuke nékartsumek? Winia waitkia nuka Winia Aparnasha wáinkiaiti. ¿Itiurak nuikia ‘Apasha wainkiarkia maak’ tame? 10 Winia Aparja̱i̱ tsaniṉkian pujakun tura winia Aparsha Wiji̱a̱i̱ pujakui tuke chikichkitji. ¿Nu nékatsrumek? Wi tájarmena nu Winia chichampruchuiti. Yus Apa Winí̱ pujak ni wakeramun takaawai. 11 Nekaatarum. Wisha winia Aparja̱i̱ tsaniṉkia pujakur nekas chikichkitji. ‘Nu chicham itiurchataiti’ enentáimkiurmeka wi túramu nuikia enentáimpratarum. Wi túramuja̱i̱ chikichik ájinia nu páantchakait. 12 Wi tájarmena nu ti nekasaiti. Winia enentáimturna nu Wi túrajna nuna túrattawai. Tura winia Aparuí̱ wéakui nuna naṉkaamas tujintiamun túrattawai. 13 Ashí Winia enentáimtursarum seatrumna nuna amastatjai. Núja̱i̱ṉkia winia Apar shiir awajnástatui. 14 Winia enentáimtursarum seakrumni̱ṉkia ashí túrattajai” tímiayi.

Jesus Yusa Wakaní̱n akupkáttawai

15 “Atumsha anentkurmeka winia chichamur umiktarum.

16 Tura wéakun winia Aparun chikichan akuptúrmakti tusan seattajai. Nisha atumji̱a̱i̱ tuke pujak atsaṉtamprartatui. 17 Nusha Nekasa nú Wakaniti. Yus shuarcha Nin nekaachmin áiniawai. Tuma asamtai ni enentái̱n waya̱chminiaiti. Antsu átumka atumí enentái̱n pujakui Ni nékarme. Nisha atumí enentái̱n tuke pujustatui. 18 Mitiaikia áitkiasnak ikiukchattajrume. Atumíin atak tátatjai. 19 Ishichik tsawant naṉkaamasmatai chíkich shuar írunna nu wáitkiachartatui. Tura Wi iwiaaku asamtai átumka nu iwiaakmaja̱i̱ pujustatrume. Tuma asarum waitkiattarme. 20 Tura nu tsawantai̱ ju̱ nekaattarme. Wisha winia Aparja̱i̱ tsaniṉkia pujakur chikichkitji. Núnisnak Wisha atumji̱a̱i̱ tsaniṉkian pujajai. Tura atumsha Wiji̱a̱i̱ tsaniṉkia pujarme. 21 Shuar Winia anentuka wi akupkámun nekáa umíawai. Nú shuarnaka winia Aparsha aneawai. Wisha nin aneajai tura nekarati tusan iniaktustatjai.” Jesus nuna tímiayi.

22 Chíkich Jútas, Iskariútichu, chichaak “Uuntá, ¿urukamtai ashí shuarnum iniaktutskesha aya iin iniaktustatam?” 23 Jesus chichaak “Winia anentuka tájana nuna enentáimtawai. Winia Aparsha nu shuaran aneattawai. Tura Wisha winia Aparuí̱ nu shuarja̱i̱ tsaniṉkia pujustatji. 24 Antsu Winia anentchaka tájana nuna enentáimtatsui. Átum ántarmena nú chichamka wíniachuiti antsu Yus Apa Winia akuptúkua Núnaiti.

25 Atumji̱a̱i̱ tuke pujakun nuna tájarme. 26 Yus Apa ni Shiir Wakaní̱n atumín yáintmak atsaṉtamprarat tusa akuptúrmaktatrume. Wi seam túrattawai. Nu Wakancha ashí Wi ujakjarmena nuna atak enentáimtikramprar ashí unuitiamprartatui.

27 Aṉkant shiir pujustarum. Aṉkant shiir pujajna núnisrumek pujustarum tusan amaajai. Jú̱ nuṉkanmaṉka warastin wáinkiashtatrume. Antsu itiurchatnum pujayatrumkesha Wiji̱a̱i̱ aṉkant shiir pujustatrume. Ashamtsuk pujustarum. Itiurchat enentáimprairap. 28 Nuik timiaj nu antukmarme. Aparuí̱ wena atak atumíin tátatjai. Winia Aparka Wiji̱a̱i̱ naṉkaamas úuntaiti. Tuma asamtai ti nekas anentkurmeka ‘Aparuí̱ wéajai’ takui̱ ashí warasa̱a̱rme. 29 Nuka túmatsa̱i̱ṉ ujajrume. Túrunamtai nuyá̱ Winia enentáimtursattarme.

30 Jú̱ nuṉkanmaya̱n akupin winiakui atumji̱a̱i̱ núkap chichaschattajai yamaikia. Wíniaka nupettukchamniaiti. 31 Tura Wikia winia Aparun aneajai tura Ni akuptúrkama nuna tuke túrajai. Ashí shuar nuna nekaawarti tusa ashí túrunatniuiti. Wajaktiarum. Ju̱yá̱ wetái” tímiayi.