Jirimías
Péṉkeran túrichu Jerusaréṉ téntakar matsamtuktin
6 Maa, Piṉjiamínkia uchirí̱tirmeka Jerusaréṉnumia̱ṉka pisaktárum túrunarum Tekuanam kachu umpuartarum. Tura shuar nekaawarat tusarum Pitjakirímnumka ji múkuun awajtiarum. Warí yajauch awajkartincha tura tí kuntuts jakamnia enentáimkiartinkia araki̱a̱ wininiawai. 2 Kame Seuna nawantri̱ṉkia paka tí peṉker tépakna emeskamuiti. 3 Murikiun wáinniuka ni murikrí̱n yaruaki̱ nu pakanam kaunenawai. Nu pakan téntakar jutai̱ je̱e̱ncha je̱a̱mak matsamkar ni murikrí̱ncha nuiṉ ayurkamainiawai. 4 Tuma asamtai yamaikia meset najatatarum. Nantarum tutupin ajasmatai ashintiuktarum. Tsej, ju̱sha iisha urukatjik. Warí tsawantcha amuuki̱ wéak kashi ajatéschaik. 5 Nantartarum túrunawakrumin ashintiukarar ni úunt akupniuri̱ je̱e̱sha emestukarmi. 6 Warí Ashí Akupin Uunt Yus chichaak “Jerusaréṉka numiri̱ṉkia ajatrarum mesetnum wákar mánitiai najatkatarum. Warí ju̱i̱ṉkia aya yájauchik piákuiti tuma asa jú̱ pepruka asutniátniuiti. 7 Entsa pajamtainmaṉka éntsaka micha átsuk núnisaṉ Jerusaréṉnumka yajauch túrutaiṉkia aya ajattsar áiniawai. Tura yajauch awajkartuktiniak núnisaṉ aya émeskartuktiniak áujmatma ántuwawai. Warí Wisha pujai̱ṉ suṉkursha tura tsupiawarmasha tuke irunainiawai” tawai Uunt Yus. 8 Maa Jerusaréṉká iwiarnarta. Núja̱i̱nchuka Winia wakantrusha amiya̱ṉka kanakminiaiti. Núnisnak nuṉkemniasha atsá aya jú̱nik pujuschamnia awajtúsaijiam.
9 Ashí Akupin Uunt Yus chichaak “Uwa nere̱n júu shuar juuk umiriat waketruki̱ kanawe̱ya̱n émamkes juu júu ewekámena áitkiasaṉ Israer shuar juákaru ainia núnaka juu júu awajsártatui. 10 Ántichu áiniancha ¿antukat tusancha yanak chicharkataj? Warí kuishi̱sha tí empeku ásarmatai antuktinniasha peṉké tujintiainiawai. Túmainiak Uunt Yusa chichame̱ncha peṉké nakitiáiniawai. 11 Tuma asan Uunt Yusa kajeakui wisha núnisnak kajekmajai. Katsú katsunkuan yamaikia peṉké katsuntrachmin ajasjai. Tuma asamtai uchi páasanam yujainiasha tura natsa áiniana nusha asutniáwarti. Warí áishri̱sha nua̱ri̱ji̱a̱i̱ tura úuntchisha tsawantan émtuku ainia nuja̱i̱ sepunam eṉkeamu ártatui. 12 Núnisaṉ je̱e̱sha ajarí̱sha tura nua̱ri̱sha chíkich sunasartatui. Warí nu nuṉkanmaya̱ aentsun asutiáwartatjai. 13 Kame uchiimiak uunt áiniana nusha waitruar aya kuit achiktinniak wakeruiniawai. Núnisaṉ Yúsnan etserniuimiak Yúsnan takarniusha anaṉmainiawai. 14 Wi shuar wáitiainia nu yaya̱chiatrum ‘Aṉkant atí, aṉkant atí’ tárume túrasha nekas aṉkant pujuiniatsui tawai Uunt Yus. 15 Antsu mui̱jmiai̱ túramarum nui̱sha ¿natsa̱a̱rukaitrum? Ti nekas natsantai̱nchaitrume tura péejchachisha ajaschaitrume. Tuma asamtai Wi asutiáttajrumna nú tsawantinkia atumsha asutniáttarme” tawai Uunt Yus.
Israer shuarka Yusa jinti̱n wekainiatsui
16 Uunt Yus chichaak “Jintiá setura wajasá iimsarum yaunchu jintia anintrústarum. Tura tu jintia péṉkerait nuní̱ wetarum túrakrumka átum ayamtikrattajrume.” Tuíniamaitiat “nuninkia wéchartatji” tiarmai.* 17 Núnisaṉ kachu umpuamu antuktarum tiarat tusan jintiá íinian apujsarmajai. Túrasha “nuka peṉké antukchartatji” tiarmai. 18 Tuma asamtai ashí uunt nuṉka mátsatka áiniatirmesha tura aents iruntratirmesha túrunattana nu nekaatarum. 19 Maa nuṉkáa antuktarum. Tura iistarum. Winia chichamprun umitsuk Wi akupkámuncha ajapa iniaisaru ásarmatai ni enentáimsarua nútiksanak yamaikia jú̱ aentsun asutiáwartaj tusan tí yajauchin itiarainiajai. 20 Kame Shíwianmaya̱ kuṉkuin tura kuṉkuin paat yajaya̱ itiartarmena nusha warinma péṉkerait. Warí átum takamtsuk áesturumna nusha péṉkercha áiniawai tura surarmena nunasha wakeruiniatsjai. 21 Tuma asamtai ju̱ shuarnaka itiurchatnum tukumkatniun apujtusarjai. Tuma asa apasha uchirtiuk iniarartatui. Tura ayaam pujuinia nusha amikriimiak ashí kaji̱ṉ amuukartatui, Uunt Yus jú̱nis tíniuiti.
22 Uunt Yus chichaak “Nekaatarum yamaikia, yajaya̱ aents arakaani̱ matsatu winitrámprume. Nuṉka náṉkatramunmaya̱ uunt nuṉka mátsatkamunmaya̱ aents tí untsurí wajarártatui. 23 Tíshimkiuja̱i̱ naṉkin takarainiawai. Peṉké netse waitnenkartichu áiniawai. Tuma ásar nayants nase wajataam uu ajak téter ajana tímiatmainiawai. Kawainium ekemprar chikichik áishmaṉka núnisar mesetnaka aya ajatrámas winitramui Seuna nawantri̱yá. 24 Ni urukua ainia nuuri̱ nekarar iikia kakarmachu ajasármaji. Iinkia sápij enentái ekemturmawakrin nuwa̱ takustaj tusa jateemá najaimiana núniarmaji. 25 Kampunniumaani̱sha tura jintiaksha wérap. Warí ii nemasri̱ puya̱ri̱ṉkia tura tsuumai̱ sapijmiakmin ainia nusha náṉkamas yujainiawai. 26 Winia pépruru nawantri̱yá suí̱r pushí entsaram yuṉkunminiam tepekam túniṉkia túniṉkia ajata. Uchirí̱ peṉké chikichik asamtai kúntuts enentáimin ainia núnisam kúntuts enentáimprata. Warí emeskartinkia áya aneachma iinkia kautramkattaji.
27 Kumpin je̱a̱nam jintia íistin awajsamua áitkiasan Wi shuarnum ajapén awajsaitjiame. Nekaam ni jinti̱sha émamkesam íirsarta. 28 Ashí nu aentska náṉkamas enentáimin áiniawai tura tsanumás yujainiawai. Yaṉkú jiruja̱i̱ namincha jírua núnin áiniawai túmainiak tí yajauch awajkartin áiniawai. 29 Umputai̱sha umpuawai tura jiruncha ji áeseawai. Jirun unuik aya jíruk awajniúsha peṉké antar wáitiainiawai. Warí yajauch ainia nusha nuya̱ṉka peṉké kanainiatsui. 30 Ju̱ka ‘kuit jiru ajapamu’ tu anaikiarai. Warí Uunt Yus niṉkia ajapawaruiti” Uunt Yus tíniuiti.