1 Akupin
Jutanmaya̱ Yúsna aishmaṉ Jirupuámja̱i̱
13 Kame Jirupuámka Yus áestutai̱nian kuṉkuinian áestuataj tusa pujurai̱ Yúsna aishmaṉ Uunt Yus akupkam Jutá péprunmaya̱ Pitirnum támiayi. 2 Tura Uunt Yus akupkámu asa áestutai̱n kakantar chicharuk “Áestutai̱yá áestutai̱yá Uunt Yus chichartamuk ‘Tawit shuarnum uchi Jusías náartin akiiniattawai. Tura naint najankamu yus enentáimtutai̱niam nú yusnan takarin kuṉkuinian aminí̱ áesawarua nunasha aminí̱ṉ máwartatui núnisaṉ aentsu ukunchí̱ncha aminí̱ṉ áeskattawai’ tawai” tímiayi.* 3 Tura nu tsawantai̱k ju̱ja̱i̱ nekaatarum tusa étseruk chichaak “Uunt Yus nekas tiniu asamtai yamaikia ju̱ja̱i̱ paant nekaattarme. Ju̱ áestutai̱sha tsainiartatui túrunamtai yuṉkunmiri̱sha ukarattawai” tímiayi. 4 Tura áestutai̱n kakantar chicharun akupin Jirupuám antuk nui̱ wajasaṉ Yúsna aishmaṉ achiktarum tusa uwejé̱ja̱i̱ iniakmasmiayi. Tura iniakmaj tukamá uwejé̱ kármiayi túruna uwejé̱n awaiṉkitiaj tukamá tujintkiamiayi. 5 Túrunamtai Yúsna aishmaṉ Uunt Yus akupkam túrunattawai tusa etserkamiania tímiatrusaṉ áestutai̱sha tsai̱niarmatai yuṉkunmiri̱sha ukarámiayi. 6 Nuya̱ṉka úunt akupin Jirupuám Yúsna aishmaṉkan chicharuk “Winia uwejur péṉker ajasat tusam ame Yúsrum Uunt Yus winiasha seatritia” tutai Yúsna aishmaṉ Uunt Yusan seatmiayi. Túramtai úunt akupniu uwejé̱sha ataksha yaunchu urukuya núnisaṉ ajasmiayi. 7 Nuyá̱ Jirupuám Yúsna aishmaṉkan chicharuk “Winia je̱a̱rui̱ yurumámniun wetái núnisnak ántranak amastinniasha susattajme” tímiayi. 8 Tura Yúsna aishmaṉ úunt akupniun chicharuk “Ame je̱e̱min írunna nu jímiapetek nakakam surakmincha ámiji̱a̱i̱ṉkia winichaintjiai. Tura páṉnaksha yuáchaintjiai núnisnak jú̱ nuṉkanmaṉka entsankesha umarchaintjiai. 9 Warí winia Uunt Yusur umikta tusa chichartak ‘Paṉka yuáwaip tura entsasha umaraip. Núnismek wéamna nú jintianmaani̱sha waketkip’ turuti akuptúkuiti” tímiayi. 10 Tura Pitirnumia̱ wáketuk Yúsna aishmaṉ chíkich jintianmaani̱ wémiayi.
Yúsna aishmaṉ Pitirnumia̱ Yúsnan etserniuja̱i̱
11 Núnisaṉ chíkich Yúsnan etserin weamsa Pitirnum pujumiayi. Tura ni uchirí̱ weriar Yúsna aishmaṉ nu tsawantin Pitirnum túrama nuna ni aparí̱n ujakármiayi. Tura Jirupuáman timia nunasha ujakármiayi. 12 Tutai aparí̱ anintrak “¿Tu jintianmaani̱ waketkin?” tutai ni uchirí̱ Yúsna aishmaṉ Jutanmaya̱ taa waketkimia nu jintian iniaktusarmiayi. 13 Nuya̱ṉka ni uchirí̱n chicharainiak “Umpuru iwiarturatarum” takui̱ iwiarturam ekemkámiayi. 14 Túruna Yúsna aishmaṉkan pataatuki̱ wesa ensena numiniam weanak pujan wainiak chicharuk “Yúsna aishmaṉ Jutanmaya̱ tawa nu ¿amekaitiam?” tutai aya̱k “Ee, witjiai” tímiayi. 15 Nuya̱ṉka chicharuk “Winia je̱a̱rui̱ wetái paṉ yuámnium” tímiayi. 16 Túrasha aya̱k “Ámiji̱a̱i̱ṉkia waketkin je̱e̱min waya̱tniuncha tujintiajai. Núnisnak ju̱ nuṉkanmaṉka ámiji̱a̱i̱ṉkia páṉnasha yúashtatjai tura entsancha umarchattajai. 17 Warí winia Uunt Yusur umikta tusa chichartak ‘Nuyá̱ paṉka yuáwaip tura entsasha umaraip. Núnismek wéamna nú jintianmaṉka waketkip’ turuti akuptúkuiti” tímiayi. 18 Takui̱ nisha chicharuk “Wisha ámiji̱a̱i̱ métek Yúsnan etserniuitjiai. Tura nayaimpinmaya̱ suntar taruti ‘ju̱na umikti’ tusa Uunt Yus akupkam chichartak ‘Ame je̱e̱min awaiṉkim paṉ ayurata tura entsasha aartá’ túrutui” tímiayi. Túrasha núnaka wáitrak tímiayi. 19 Nuya̱ṉka niji̱a̱i̱ waketki̱ je̱á̱ wayá̱ páṉkan yua entsancha umarmiayi.
20 Tura ekentsa yurumtainiam pujuiniai̱ Yúsnan etserin Yúsna aishmaṉkan awaiṉki̱ itiamia nuna Uunt Yusa chichame̱ tarimiayi. 21 Tura Yúsna aishmaṉ Jutanmaya̱ tamia nuna kakantar chicharuk “Uunt Yus chichartamuk ‘Uunt Yusa chichame̱ umirkachu asam tura Ni túramania nusha enentáimtutsuk, 22 waketkinme tura ju̱yá̱ paṉka yuáwaip tura entsasha umaraip támaitiatam waketkim paṉsha yua asam nuyá̱ entsasha umaru asakmin ame úuntrum iwiarsamu ainia nui̱ṉkia ame aya̱shmikia iwiarnaschattawai’ túramui” tímiayi. 23 Tura Yúsna aishmaṉ páṉkan yua entsancha umarmatai Yúsnan etserin umpurun iwiarturmai. 24 Túram Yúsna aishmaṉka wémiayi. Tura jintiá wéan úunt ya̱wa̱ iṉkiuá mamai. Tura ni aya̱shí̱sha jintiá tepemai. Núnisaṉ umpurusha tura úunt ya̱wa̱sha nui̱ṉ wajatiarmai. 25 Nuya̱ṉka untsurí aents naṉkaamainiak aya̱sh jintiá tepan tura úunt ya̱wa̱sha aya̱sh tepamunam wajan wáinkiar Yúsnan etserin pujumia nú peprunam jeawar etserkarmiayi.
26 Tura Yúsnan etserin Yúsna aishmaṉkan awaiṉki̱ itiamia nu nuna antuk chichaak “Nuka Yúsna aishmaṉ Uunt Yusa chichame̱n umirkachma núiti. Tuma asamtai Uunt Yus úunt ya̱wa̱num surukuiti. Túramu asa úunt ya̱wa̱sha Uunt Yus timia núnisaṉ maa achia̱rai” tímiayi. 27 Nuya̱ṉka ni uchirí̱n chicharainiak “Umpuru iwiarturatarum” tutai iwiarturarmiayi. 28 Tura nui̱ wesa aya̱sh jintiá tepan wainkiamiayi. Tura umpurusha núnisaṉ úunt ya̱wa̱sha nui̱ṉ wajarmiayi. Nuyá̱ úunt ya̱wa̱ka aya̱shniasha yúachuyayi tura umpuruncha peṉké itiurkachuyayi. 29 Nuya̱ṉka Yúsnan etserin weamsa Yúsna aishmaṉka aya̱shi̱n takuí umpurunam awaṉ jukimiayi. Tura péprunam e̱a̱ran iwiarsatjai tusa túramiayi. 30 Tura ní iwiarnastinniumaṉ iwiarsamiayi tura útainiak “Ja yatsuchiruá, ja yatsuchiruá” ajarmiayi. 31 Nuyá̱ iwiaras umik ni uchirí̱n chicharainiak “Wi jakamtaisha Yúsna aishmaṉ iwiarsamua nui̱ṉ winiasha niin ayamach iwiartustarum. 32 Warí Pitirnum áestutai̱ ana nuna tura Samaria péprunmasha ashí naint najankamu yus enentáimtutai̱ írunna nuna túrunatniuri̱ Uunt Yus akupkam nú aishmaṉ timia nuka nekas uminkiattawai” tímiayi.
33 Túrasha Jirupuámka netse túrutai̱nkia iniaisachmiayi. Núnisaṉ náṉkamas aentsun najankamu yúsnan takarin awajiármiayi. Tura aents najankamu yúsnan takarin ajastinian wakera nunasha Jirupuám ashí najankamu yus enentáimtutai̱ naintia nui̱ takarin awajsámiayi. 34 Tura Jirupuám nú tunaan tura asamtai ni aentssha núnisaṉ túruinia ásar nú aentska peṉké amuukarmiayi.