Yus Kanta
Alef
119 Yajauch túrutainmaya̱ aṉkant wekaana nuka
tura Uunt Yus akupkámuja̱i̱ métek wekaana nusha warasti.
2 Ni jintíamun umirna nuka
tura tuke enentái̱ji̱a̱i̱ e̱a̱na nusha warasminiaiti.
3 Nekas enentáiji̱a̱i̱ Yusja̱i̱ wekaana
nú shuarka yajauchiniam wekaatsui.
4 Akupkámurmin péṉker wáinkiarat tusam akupkámame.
5 Ame akupkámurmete tusan
tuke Ámin enentáimtusan wekasaṉka maak áchaintjiash.
6 Nuiṉkia wi Ame akupkámun ashí umikian wekáa asan natsa̱a̱rchattajai.
7 Antsu Ame tímiam nuna nekaan
péṉker enentái̱rji̱a̱i̱ shiir awajsattajme.
8 Yusru, tuke ajapruamka iniaitiusaipia
antsu Ame akupkámiamna núnaka péṉker wainkiattajai.
Bet
9 Natsasha ¿itiurak imiá péṉkersha imiatkinchasha wekasamniait?
Kame Ame chichammiji̱a̱i̱ métek wekaak túrunamniaiti.
10 Nekas enentái̱rji̱a̱i̱ e̱a̱kuitjiame.
Tuma asamtai akupkámurmiya̱ kanakí̱j iniaitiusaip.
11 Amiin yajauchin túrawa̱i̱j tusan
Ame chichammin nekas shiir enentáimtusan umíajai.
12 Maa Uunt Yusru ame náaram shiir awajsamu atí,
ame akupkámu chichammincha nekat tusam jintintruata.
13 Winia chichampruja̱i̱
Ame ashí tímiam nuna aentsnum etserkaitjiai.
14 Ame jintíamurmin umíakun
kuítriniatniuja̱i̱sha naṉkaamas warasuitjiai.
15 Ame akupkámurmin tuke enentáimtustatjai
tura Ame jintimín shiir wekasattajai.
16 Ame akupkámurmiji̱a̱i̱ shiir warastatjai.
Túran Ame chichamminkia peṉké kajinmátkishtatjai.
Guímel
17 Ame takartámin shiir awajsata.
Kame iwiaakna nuiṉkia Ame chichammin umirtamkati.
18 Tura winia jí̱rusha uratritia.
Túrawakminkia Ame akupkámurmin imiá shiira nuna nekaattajai.
19 Kame wikia ju̱ nuṉkanmaṉka íraraitjiai.
Ame akupkámu ú̱rtukaip.
20 Maa, wi Ame akupkámurmin tuke tsawant waké wakerakuan pimpikjiai.
21 Kame shuar naṉkamantu enentáimtumainia nuka chicharainiame
tura núnismek Ame akupkámu umiktinian nakitiáinia nuka yajauchiji̱a̱i̱ yumiṉkramu áiniawai.
22 Yusru, wi arantushtaintjiana tura imiancha enentáimturainiak nakitruinia nuya̱sha akantuktia,
warí ame jintíamurmin umíajai.
23 Kame uunt pujusár akupáiniana nu winia áujmatruiniakuisha
Ame takartámniuka Ame akupkámu umiktinia nuna enentáimtawai.
24 Ame jintinkratmena nuka winia warastintrua áintsaiti,
tuma asa winia jintintrin áiniawai.
Dálet
25 Eea, winia enentái̱rka peṉké kakarmachu nekapeawai,
tuma asamtai Ame chichammiji̱a̱i̱ métek iwiaaku awajtusta.
26 Winia wekaamurnaka ámin ujakmajme túramtai ái̱rkamame,
Ame akupkámu umiktin jintintruata.
27 Yusru, akupkámu umiktin jintia nekamtikruata,
túrawakminkia ame aents túrachmin túriniaitmena nuna enentáimtustatjai.
28 Maa, winia wakantruka kúntuts enentáimias uutui,
Ame wakeram núnisam emetruata.
29 Wíniaka ashí wait jintia nuyá̱ akantuktia.
Túram Ame akupkámuram jintintruata.
30 Wikia péṉker túratniun achikiuitjiai.
Tuma asan wikia Ame akupkámurmin émtikiajai.
31 Wikia Ame jintíamurmiini̱ weamkajai.
Maa Yusru Amiiní̱ weamka asamtai natsantruraip.
32 Winia enentái̱r uunt awajtúrsa asakmin Ame akupkámu jintimín tsékeajai.
He
33 Ame akupkámu umiktin jintia nu Uunt Yusru nekaprutáta.
Túrawakminkia wikia tuke iniaitsuk umiktatjai.
34 Yusru nekamtikruata, túrutawakminkia Ame akupkámun umiktaj
túran tuke enentái̱rja̱i̱ íistatjai.
35 Ame akupkámu jintia wéana nuní̱ juruktia, nuninkia waraajai.
36 Yusru, winia enentái̱rka ame jintíamurmiini̱ enentáimtikrurta
túrasha kuit waitruar achikma núja̱i̱nchu.
37 Kame winia jí̱ruka ántar ainia nuna iis wakeruka̱i̱n tusam nuyá̱ akantuktia.
Túram Ame jintimín wekasatin iwiaaku kakaram awajtusta.
38 Maa, Ame takartámin ashampramana nu
Ame anajmatramiamna nu umirkata.
39 Natsanmai ajakun ashamajna nuyá̱ akantuktia.
Warí Ame akupkámurmin nekasa nuja̱i̱ métek péṉker áiniawai.
40 ¡Íimsakia ame akupkámurmin itiura aneatsja!
¡Ame péṉkerumji̱a̱i̱ atak iwiaaku kakaram najatata!
Vau
41 Maa Uunt Yusru, ame waitnenkartutairam winia taruttí,
ame uwemtikkiartutairmeka támena nuja̱i̱ métekete.
42 Ame chichammin enentáimtusu asan
winia natsan awajtana nuna ái̱ktatjai.
43 Wi nekas chichaman chichawitjiana nuka peṉkesha jurutsaip.
Warí wikia Ame akupkámurmi̱i̱n péṉker átinia nuna nákasan pujajai.
44 Nuiṉkia Ame akupkámu umiktinia nuna
tuke umiktatjai túran tuke iniaitsuk umikin wétatjai.
45 Ame akupkámu umiktinia nuna e̱a̱ku asan
wikia aṉkant wekasattajai.
46 Wikia úunt akupin pujuiniamunmasha Ame jintíamurmin chichastatjai
túrasha wikia natsa̱a̱rchattajai.
47 Ame akupkámu umiktinian
aneaj nuna umirkan warastatjai.
48 Ame akupkámurmi̱i̱n enentáimtusan winia uwejrun takuittiajai.
Anea asan Ame akupkámurmi̱i̱n enentáimtú pujuttajai.
Zain
49 Ame takartámin ju̱na túrattajme tusam
nákamtikrusuitmena nu enentáimturta.
50 Kúntuts pujakui winia atsaṉtana nuka ju̱i̱ti.
Ame chichamem atak iwiaaku awajtúsai.
51 Naṉkamantu enentáimtuma ainia nu winia ti wishikruraruiti.
Túmaitkiuisha wikia Ame akupkámurmiya̱ṉka kanakchaitjiai.
52 Uunt Yusru, nekasa nuja̱i̱ métek sumamtikiam túriniaitmena nuna tí yaunchuk enentáimturmiajai
nuja̱i̱ atsaṉturuitmena nuna wáinkiaitjiai.
53 Yusan enentáimtichu áiniana nu
Ame chichamprumin ajapa iniaisarmatai wikia suíran kaje̱ntkajai.
54 Ju̱ nuṉkanam íraraitjiana ju̱i̱ṉkia
Ame akupkámuka winia kantamtair ajasái.
55 Maa Uunt Yusru, Ame náarmin kashi enentáimtusjai
túran Ame akupkámu chichammin umikjiai.
56 Ame akupkámun umikiu asamtai
ashí péṉkera nu túrunayi.
Chet
57 Uunt Yusru ashí takakjana nuka Ámetme.
Tura Ame chichammin umiktatjai tíniuitjiai.*
58 Tuke enentái̱rji̱a̱i̱ Ame waitnenkartutairmin seawitjiai.
Túramtai Ame chichamem tana nuja̱i̱ métek winia waitnentrurta.
59 Winia wekaamurun enentáimturan Ame jintíamurmiini̱ wikia waketkijiai.
60 Ame akupkámiam nuna
nákatsuk wárik umikjiai.
61 Yusan enentáimtichu ainia nu chapikji̱a̱i̱ téntatrukarai
tura wikia Ame akupkámu chichamminkia kajinmatkichjai.
62 Ámeka péṉker nekasa nuja̱i̱ métek sumamtikin asakmin
yumiṉsajme titiaj tusan kashi ajapéṉ nantaktiatjai.
63 Wikia ashí ashampramainiak
Ámin umirtamainiana nuna tsaníakmari̱ntjiai.
64 Ame waitnenkartutairmek nuṉkanka piákuiti.
Uunt Yusru Ame akupkámuram nekaprutáta.
Tet
65 Uunt Yusru Ame takartámin
Ame chichammiji̱a̱i̱ métek péṉker awajsáme.
66 Ame akupkámun enentáimtusu asamtai
nekatai̱ tura péṉker enentáimsatin jintintruata.
67 Wáittsuk pujuyajna nuiṉkia wikia yajá wekaimiajai
tura yamaikia Ame chichammin umíajai.
68 Péṉker asam péṉker túriniaitme.
Tuma asam Ame akupkámuram jintintruata.
69 Naṉkamantu enentáimtuma ainia nu ántar tsanumprutainiawai
túrasha wikia nekas enentái̱rja̱i̱ Ame akupkámun umiktatjai.
70 Ni enentái̱nkia macha ijirámu ásar Ame akupkámurmi̱i̱n nekaatniun enentáimtuiniatsui
túrasha wikia Ame akupkámurmi̱i̱n waraajai.
71 Wáitkiarmamna nuka péṉkerauyi.
Kame túrutawakmin Ame akupkámurminkia nekaamjai.
72 Wíji̱a̱i̱ṉkia Ame akupkámuram wenumíya̱ jiinia nuka
tí nukap kuriji̱a̱i̱sha tura kuítji̱a̱i̱sha naṉkaamas imiá peṉker áiniawai.
Yod
73 Ame uwejmeka nuní̱ iira atí tusa najatawarmai.
Wi Ame akupkámurmin nekaataj nekatairam surusta.
74 Ámin ashampramainia nuka winia wáitkiar warartusartatui,
warí Ame chichammiin ti nákasuitjiai.
75 Maa Uunt Yusá Ame akupkámu nekasa nuja̱i̱ métek péṉker ainia nuna nékajai.
Kame túratniua tímiatrus umin asam asutiuám wáitkiarsamamna nuka nékaskeyi.
76 Ame takartámin tímiam
nuja̱i̱ métek Ame waitnenkartutairam atsaṉturti.
77 Ame waitnenkartutairam wini̱n taruttí iwiaaku átaj.
Kame Ame akupkámurmeka winia waramuruiti.
78 Waantu enentáimtuma ainia nuka natsanmai̱ ajakarti, warí itiurkachu ai̱ṉ yajauch awajtuiniawai.
Túrasha wikia Ame akupkámu ana nuna ti enentáimtittiajai.
79 Ámin ashampramainia nuka
tura Ame jintíamurmin nékainia nusha wini̱n waketkiarti.
80 Ame akupkámurminkia winia enentái̱rka áya Aminiak enentáimturmas pujurtamin atí
núja̱i̱nchuka natsa̱a̱ra̱i̱j.
Caf
81 Winia wakantruka Ame uwemtikkiartutairmin naká naká pimpikní̱
tura Ame chichammin enentáimtakun nákajai.
82 Winia jí̱rusha Ame chichammin nákarma asa chichaak
¿urutáik atsaṉturat? tawai.
83 Uwá jutai̱ nuap jinia mukuintiuri̱n nenasma urukniuit núniniaitkiuncha
Ame akupkámurminkia kajinmatkichuitjiai.
84 Ame takartámniu tsawantri̱sha ¿urutmá ainia?
Nekasa nuja̱i̱ métek sumamtikiam túriniaitmena nusha ¿urutáik pataturainia ju̱sha túrattam?
85 Waantu enentáimtuma ainia nu wa̱a̱n winia táutriarai.
Kame nu shuar Ame akupkámu tana nuja̱i̱ métek wekainiatsui.
86 Ashí Ame akupkámurmeka tí nekas áiniawai.
Winia nemasur anaṉkrua pataturainiawai. ¡Yáintkiata!
87 Nuṉká aju̱ntá mantunkiawarai túramaitiatnak
wikia Ame chichammin akupkámamna núnaka ajapan ikiukchajai.
88 Ame waitnenkartutairmiji̱a̱i̱ métek iwiaaku awajtusta
túrutawakminkia Ame jintíamurmincha umiktatjai.
Lámed
89 Maa Uunt Yusru
Ame chichammeka nayaimpinmaṉka tuke peṉké yapaji̱áchminiaiti.
90 Umitiáirmeka yamaisha ukunmasha nú ukunmasha tuke matsamiartatna ímianaiyaiti.
Núṉkaka ímiatrusmek najanamame túram tuke juákuiti.
91 Ame akupkámurmek yamaiya̱ ímiaja̱i̱sha nayaimpisha tura nuṉkasha irunainiawai.
Ashí au irunainia nuka Ame takartámin áiniawai.
92 Ame akupkámuram winia waramurchaitkiuiṉkia
wikia itiurchat ana nuja̱i̱ amuuka̱a̱jai.
93 Ame akupeamurminkia peṉké kajinmátkishtiniaitjiai
warí nuja̱i̱ iwiaaku awajtúsuitme.
94 Wikia Áminiuitjiai uwemtikrurta.
Warí Ame akupeamurmin e̱a̱kuitjiai.
95 Yusan enentáimtichu emesturtaj tusa nákarkaruiti
túrasha wikia Ame jintíamurmin anearan pujajai.
96 Ashí imiá péṉker ainia nuka náṉkatkan wáinkiaitjiai.
Túrasha Ame akupkámurmeka peṉké náṉkatkachuiti.
Mem
97 ¡Maa Yusru, ame akupkámurmin urutmatsuk aneaj!
Tuma asan tuke tsawant Ame akupkámun enentáimtajai.
98 Maa, winia nemasur ainia nuja̱i̱ naṉkaamas Ame akupkámurmiji̱a̱i̱ jintintruam ti neka awajtúsume.
Kame nu akupkámuka tuke wiji̱a̱i̱ pujuiniawai.
99 Ame jintíamurminkia tuke enentáimtajai.
Tuma asamtai winia unuitin armia núja̱i̱sha naṉkaamas neka awajtúsai.
100 Tura Ame akupkámurmin umikiu asan
úuntach ainia núja̱i̱sha naṉkaamas nekaajai.
101 Ame chichammin umiktaj tusan
ashí yajauch jintianmaani̱ wekatainkia ikiukniuitjiai.
102 Kame Ame akupkámu jintintruamamna
nuya̱ṉka Yusru kanakchaitjiai.
103 ¡Ame chichamminkia yumin apatniua núnisan nekaprajai.
Tuma asamtai Ame chichammin tí peṉker nekaan míshik apaar péṉker nekapratniua núja̱i̱sha naṉkaamas péṉker enentáimprajai!
104 Wikia Ame akupkámurmin enentáimtakun nekatai̱n unuimiáruitjiai.
Tuma asan wikia ashí ántar jintian muí̱jiajai.
Nun
105 Ame chichammeka shirikip ekemákam tsáapin awajna núnisaiti.
Tuma asa wi tui̱ wajaj tura tui̱ wekaaj nui̱sha sukúak ti paant awajturui.
106 Ame péṉker nekasa nuja̱i̱ métek jintíamurmin umiktatjai tusan
Yus íirmanum nekas tajai tímiaj núnaka umiktatjai.
107 Maa Uunt Yusru tí naṉkaamas kúntuts nekapeajai
Ame chichamprumji̱a̱i̱ métek iwiaaku awajtusta.
108 Maa Uunt Yusru wí wakeramu amastinian chichampruja̱i̱ amaajna nuka Ámiji̱a̱i̱sha wakerú ajamai atí,
Ame nekas chichamea nuja̱i̱ métek jintintruata.
109 Winia iwiaakmarka tuke tsuumainium pujawai
túrasha Ame akupkámurminkia kajinmattsujai.
110 Yusan enentáimtichu ainia nuka jintian akirturawarai.
Túmaitkiuisha wikia akupkámu chicham umiktinia nuya̱ṉka ipijiákan waketkin ikiukchajai.
111 Jintíamurmin tuke iin amastin iwiaraitmena núnisaiti.
Winia enentái̱rja̱i̱ waraajna núnis niṉkia áiniawai.
112 Ame chichammin naṉkaman amúana ímianai ejen umirkatjam tusa
winia enentái̱rka nuní̱ enentáimturmawai.
Sámec
113 Ántar chichamtin ainia núnaka nakitiajai
antsu Ame akupkámurminkia aneajai.
114 Wi ejamkar u̱mtai̱ tantara núnisaitme tura winia ayamprutniumka Ámetme,
Ame chichammiin nákasuitjiai.
115 Yajauch túrintirmeka wini̱i̱ya̱ kanaktiarum,
winia Yusru akupkámuri̱n wikia umiktatjai.
116 Ame chichammiji̱a̱i̱ métek wáitkiata túrutawakminkia nuja̱i̱ iwiaaku pujustatjai.
Wi nákajna nuja̱i̱ natsantruraip.
117 Ayamprutkata túrawakminkia uwemprattajai.
Ame akupkámurmi̱i̱n tuke warasan pujú átatjai.
118 Akupkámurmi̱i̱nia̱ kanainia nuka iniaisaruitme.
Ní enentáimsamuri̱n ti neka enentáimtumas anaṉkartin áiniawai.
119 Ashí Yusan enentáimtichu ashí nuṉkanmaya̱ ainia nu sau utsaṉtinia nútikiam amukáruitme.
Tuma asamtai Ame jintíamurmin anenaitjiai.
120 Winia aya̱shur Ámin ashampramak kurawai.
Tura Ame nekasa nuja̱i̱ métek jintíamurmin arantajai.
Ayin
121 Naka túratin tsaṉkatkamua núnaka tura nekasa nuja̱i̱ métek túrutai̱nkia túraitjiai.
Winia wáitkiari̱n ainia nui̱ íktusam iniaitiusaip.
122 Ame takartámniu tumashrí̱ya̱ uwemtikrata.
Wíchakaitiaj naṉkamantunka tu enentáimtuma ainia nú shuar wáitkiarsara̱i̱ṉ.
123 Winia jí̱ruka Ame uwemtikkiartutairmin naká naká ju̱ju̱kní̱
tura Ame wariṉkish páchitsuk péṉkeran túrattajai tímiam nunasha yawe̱tkíyi.
124 Ame takartámniuka waitnenkartutairmiji̱a̱i̱ métek túrata
túram Ame chichamen jintintruata.
125 Wikia Ame takarniuitjiai Ame jintíamurmin nekaataj,
nékamtikruata.
126 Uunt Yusru, Ame akupkámu chichammin umikchamuja̱i̱ yajauch awajsaruiti
tuma asamtai túratniun tsawant jeayi.
127 Tuma asamtai kuriji̱a̱i̱ tura aya kúrik awajsámuja̱i̱ naṉkaamas
Ame akupkámurminkia aneajai.
128 Tuma asamtai ashí akupkámu chicham umiktinniaka umikiuitjiai
tura ashí wáitrin ainia nuna jintinkia muí̱jiajai.
Pe
129 Ame jintíamurmeka naṉkaamas péṉker áiniawai.
Nuka winia wakantrun wáiniawai.
130 Ame chichammiji̱a̱i̱ enentáimtikiartamna nuka nuna tsáapnin awajkartiniaiti.
Tuma asa shuar nékachuncha yúpichuch nékamtikniuiti.
131 Ame akupkámurmin ti wakera asan aya jikiatájai.
132 Apajá̱sa íirsakia.
Ámin anenmainia waitnenniuitmena núnismek winiasha waitnentrurta.
133 Yajauch túrutai̱ nupettuka̱i̱
ame támena núja̱i̱ṉ péṉker wekasatin yáintkiata.
134 Shuar yajauch awajkartutai̱ ainia nuya̱ṉka aṉkant awajtusta.
Túrutawakmin Ame akupkámurmin umiktajai.
135 Wi Ámin takarniuitjiamna ju̱ péṉker wáinkiata.
Túram Ame akupkámuram jintintruata.
136 Ame akupkámurmin uminiachu asamtai
wi utkui nea̱jkir entsa waana ímiatrus jíiniawai.
Tsade
137 Maa Uunt Yusru Ámeka péṉker túrin asam péṉkeraitme.
Ame chichamprumka nekasa nuja̱i̱ métek naka áiniawai.
138 Ame jintíamurmeka naka túrutai̱ji̱a̱i̱ iwiarkaitme
túrasha chichakma yapajtsuk métek umikiuitme.
139 Winia nemasur ainia nuka Ame chichammin kajinmatainiakui
winia akasmatai̱rka amukáyi.
140 Ame chichammeka ti nekas imiatkincha áiniawai
tuma asamtai Ame takartámin anenmawai.
141 Uchich asan nakitrámuitiatnak
Ame akupkámuram umiktinniaka kajinmatkichuitjiai.
142 Ame naka túrutairmeka amuichaiti
tura Ame akupkámuka nekasaiti.
143 Kúntuts pujustincha tura jakamnia enentáimpratniusha amaintiúkarai
tura Ame akupkámurmeka winia waramuruiti.
144 Ame jintíamurmeka amuicha asa tuke péṉkerkete.
Nekatai̱ surusta iwiaaku pujustaj.
Cof
145 Nekas enentái̱rja̱i̱ wi untsúajme. Maa Uunt Yusru ái̱rkata,
túrawakminkia akupkámurmin umiktatjai.
146 Uwemtikrurai tusan untsúajme
túrawakminkia jintíamurmin umiktatjai.
147 Tsawa̱tsa̱i̱ṉ yáintkiata tusan untsúajme
tura nákajna nuka Ame chichammin nákajai.
148 Ame chichammin awaiṉki̱ enentáimtustaj tusan kánatsjai.
Nu arant winia jí̱ruka kashi íkiattsui.
149 Ame waitnenkartutairmiji̱a̱i̱ métek winia chichamur antukta.
Uunt Yusru nekasa nuja̱i̱ métek túrutairmiji̱a̱i̱ iwiaaku awajtusta.
150 Apapétainia nuka yajauchiji̱a̱i̱ weantúrainiawai,
Ame akupkámurmiya̱ jeachat pujuiniawai.
151 Uunt Yusru Ámeka tíjiu̱ch pujame.
Ashí Ame akupkámurmeka nekasa nu áiniawai.
152 Ame jintíamurminkia tuke atí tusam ikiusmam
núnaka tí yaunchuk nékaitjiai.
Resh
153 Winia kúntutsur iisam aṉkant awajtusta.
Kame Ame akupkámurminkia wikia kajinmatkichuitjiai.
154 Winia itiurchatur ayamprutkata túram uwemtikrurta.
Ame chichammiji̱a̱i̱ métek iwiaaku awajtusta.
155 Ame akupkámun e̱a̱iniachu ásar
Yusan enentáimtichu ainia nuyá̱ uwempratniuka jeashtaiti.
156 Maa Uunt Yusá Ame waitnenkartutairmeka untsurí áiniawai.
Ame chichamem nekasa nuja̱i̱ métek kakaram awajtúsam ishintiátrata.
157 Winia nemasrusha tura apapétainia nusha untsurí áiniawai
túrasha Ame jintíamurmiya̱ṉka kanakchaitjiai.
158 Ame chichammin umichu ásarmatai
anaṉkartin ainia núnaka wainkian muí̱jkiarmajai.
159 Maa Uunt Yusá chícham akupeamna nuna itiurá aneatsuj íimsata.
Ame waitnenkartutairmiji̱a̱i̱ métek iwiaaku awajtusta.
160 Ashí Ame chichammeka ti nekas áiniawai
tura Ame péṉker nekasa nuja̱i̱ métek jintíamurmeka ashí amuicha áiniawai.
Sin
161 Akupniu uchirí̱ ainia nusha peṉké ántar apapétkarmai
túrasha winia enentái̱rka Ame chichamprumin ashamkamai.
162 Tí nukap ata̱a̱r yaruak wéana núnisan
wikia Ame chichammiin waraajai.
163 Wáitniaka nakitran muí̱jiajai
tura Ame akupkámurminkia aneajai.
164 Chikichík tsawantini̱ṉ siati awenan
Ame péṉker nekasa nuja̱i̱ métek jintíamurminkia shiir awajeajai.
165 Ame akupkámurmin anea nuka ti warasar
tura yajauch awajsachma pujusártatui.
166 Uunt Yusru Ame uwemtikkiartutairmin nákajai
tura Ame akupkámurminkia anturkan umirjai.
167 Ame jintíamurminkia winia wakaniur umikiai
núnaka tí nukap aneawitjiai.
168 Ame akupkámurminkia tura jintíamurmincha umikiuitjiai,
ashí wi wekaamurka Ame paant nékame.
Tau
169 Maa Uunt Yusru wi untsumma Ame pujamna nui̱ jeatí
Ame chichammiji̱a̱i̱ métek nekatai̱ surusta.
170 Wi seajmena nuka Ame pujamunam jeatí
tura Ame tímiam nuja̱i̱ métek aṉkant awajtusta.
171 Ame akupkámuram jintintruáwakminkia shiir awajsattajmena nuka
winia wenuruí̱ya̱ jíinkiti.
172 Winia wene̱r Ame chichammin kantamprútmati.
Ashí Ame akupkámu ainia nuka nekasa nuja̱i̱ métek túrutai̱ áiniawai.
173 Ame uwejmiji̱a̱i̱ yáintkiataj tusam taruttia
kame Ame akupkámu chicham umiktinian achikiuitjiai.
174 Maa Uunt Yusru uwemtikrurai tusan wakerajme
tura Ame akupkámuka winia ti wakeramuruiti.
175 Iwiaaku pujakun shiir awajsatjam
Ame nekasa nuja̱i̱ métek jintíamuram yáintkiarti.
176 Murik meṉkaka núnis wi wekaakun
Ame akupkámu chichamnasha kajinmatkichu asamtai Ame takarniúram wáinkiata.