1 Akupin
Irías Urep nainnium pisarma
19 Kame ántar yúsnan etserin armia nuna Irías puya̱ja̱i̱ máwarmia nuna Akaap Jisawíran ashí ujakmiayi. 2 Nuna antuk Jisawír aentsun akatar Iríasan akuptuk “Ántar yus áiniana nu asuttiuáwarti tura kashin ju̱ni̱ ai̱ ame yúsnan etserin itiurkarmam nútiksanak wisha ámin túrachmataiṉkia nuna núkap ántar yus ainia nu asuttiuáwarti” tímiayi. 3 Tura Iríassha mantuawa̱i̱ tusa sapijmiak pisar Jutanam Pirshiwia péprunam jeamiayi. Nuyá̱ ni takarniúri̱nkia nui̱ ikiukmiayi. 4 Nuyá̱ Iríaska kampuntin atsú nuṉkanmaani̱ chikichik tsawant wekas jakamnia nekaper numich ukatkatniunam wéanak pujusmiayi. Túruna chichaak “Maa, Uunt Yusru máakete, wárik mantuata. Warí winia úuntur armia nuja̱i̱ naṉkaamas wikia péṉkerchaitjiai” tímiayi. 5 Tura nuiṉ tepes kanarmiayi. Túrunamtai Yusa suntari̱ tarí antiṉ chicharuk “Nantakim yurumáta” tímiayi. 6 Tutai Irías nantaki̱ íimiaj tukamá ni cháikini̱ paṉ jinium iniarámu tura entsa yuminiam uwamu eketun wainkiamiayi. Tura nuna yuá entsancha umar ataksha tepes kanarmiayi. 7 Tura Yusa suntari̱ ataksha tarí antiṉ chicharuk “Ame wéamna nú jintiaka tí yajá asamtai jeatachminiaitme tuma asamtai nantakim yurumáta” tímiayi. 8 Tutai Irías nantaki̱ yurumá entsa umarmiayi. Nu kakarmaja̱i̱ kuaraintia tsawant tura kuaraintia kashi wekas Uunt Yusa naintri̱ Urepnum jeamiayi.
9 Tura nui̱ kayá wá̱a̱nam wayá̱* kanarmiayi tura nui̱ Uunt Yus chicharuk “¿Iríasá, warí ju̱i̱sha pujuram?” tímiayi. 10 Tutai Irías aya̱k “Ashí Akupin Uunt Yusan ti akasmatkajai. Warí Israer shuarka Ámiji̱a̱i̱ chícham najanamun iniaisar tura Ame áestutairmincha akatúrar núnisaṉ Áminiun etserin ainia nunasha puya̱ja̱i̱ kajeṉ amukarai. Túrawarmatai aya wíchik juakjai túrasha yamaikia winiasha mantuataj tusar e̱a̱tainiawai” tímiayi. 11 Takui̱ Nisha chicharuk “Wá̱a̱nmaya̱ jiinkim naint Uunt Yusai̱ naka wajasta” tímiayi. Nuya̱ṉka Uunt Yus naṉkamakui nase ti kakaram umpuakui Uunt Yus íimmianum naintkia yumpunainiakui kaya sáisaintin armia nuka jakukarmiayi. Túrasha Uunt Yuska nasenmasha atsumiayi. Nu naṉkaamasmatai tí u̱u̱rkamiayi túrasha Uunt Yuska ú̱u̱nmasha atsumiayi. 12 Nu naṉkaamasmatai ji kéekmiayi túrasha Uunt Yuska jiniumsha atsumiayi. Tura nu naṉkaamasmatai nase tápir ajak shiir antú ajamai ajamiayi. 13 Túmakui̱ Iríaska pushiri̱ji̱a̱i̱ yapin nukuk kaya wa̱a̱ jí̱i̱tkiamunam wajasmatai Uunt Yus untsúak “¿Iríasá warí ju̱i̱sha pujuram?” tímiayi. 14 Tutai Irías aya̱k “Ashí Akupin Uunt Yusan ti akasmatkajai. Warí Israer shuarka Ámiji̱a̱i̱ chícham najanamun iniaisar tura Ame áestutairmincha akatúrar núnisaṉ Áminiun etserin ainia nunasha puya̱ja̱i̱ kajeṉ amukarai. Túrawarmatai aya wíchik juakjai túrasha yamaikia winiasha mantuataj tusar e̱a̱tainiawai” tímiayi.
15 Nuya̱ṉka Uunt Yus Iríasan chicharuk “Támamna nuke kampuntin atsú nuṉkanmaani̱ waketkim Tamasku péprunam jeata. Tura nui̱ jeam Siria nuṉka akupniúri̱ atí tusam Jasaér asuitiji̱a̱i̱ muuknum ukatkata. 16 Núnismek Nimsi uchirí̱ Jeú Israer shuara akupniúri̱ atí tusam nisha asuitiji̱a̱i̱ muuknum ukatkata. Nuyá̱ Apirmiúrnumia̱ Sajata uchirí̱ Iriséu amea ántsaṉ Yúsnan etserin atí tusam anaikiata. 17 Tuma asamtai Jasaéra puya̱ri̱ya̱ pisaanka Jeú máattawai tura Jeú puya̱ri̱ya̱ pisaanka Iriséu máattawai. 18 Túrasha Páaran tikishmáttancha tikishmátracharun tura mukuntancha mukunácharun siati mir aentsun Israernum Wi juámtikiarjai” tímiayi Uunt Yus.
Irías Iriséun Yúsnan etserin awajsamu
19 Nuyá̱ Iríaska wesa Sajata uchirí̱ Iriséu waaka jímiar jímiar apatramun tuse takakuya nuja̱i̱ nuṉkan pukuak pujan wainkiamiayi. Tura niṉkia amuamuya nuja̱i̱ pukuak pujan náṉkak awaṉkémpri̱n ai̱k naṉkía patatak ikiukmiayi. 20 Nu túram Iriséu waakari̱n ikiuiniak Iríasan tseke werí chicharuk “Winia aparun nukurja̱i̱ yapiniam mukunan ikiuwartaj tsaṉkatrukta túran nemarsattajme.” Tutai Irías chicharuk “Antsu wisha ¿warí itiurkajmea? Weme waketuta” tímiayi. 21 Nuyá̱ Iriséu Iríasan nemarki̱ wéayat juákmiayi. Tura nui̱ jimiará waakan mámiayi. Tura pukumia nu numiji̱a̱i̱ṉ namaṉke iniarak aents pujuarmia nuna ayurkamamiayi. Nuna tura ikiuak Iríasan yaya̱k nemarsamiayi.