2 Akupin
Irías nayaimpiniam junakmia
2 Nuyá̱ Uunt Yus Iríasan wainchi nasenam pachia nayaimpiniam júkitin jearmiayi. Kame Iríaska Jirkar nuṉkanmaya̱ Iriséuja̱i̱ winiarmiayi. 2 Nuyá̱ Irías Iriséun chicharuk “Yamaikia ámeka ju̱i̱ṉ juaktá. Uunt Yus Pitir péprunam akuptúkuiti” tutaisha Iriséu chichaak “Yus íirmanum tura ámiji̱a̱i̱sha nekas tajai, aminkikia peṉké ikiukchattajme” tímiayi. Tutai nuya̱ṉka métek Pitirnum wéarmiayi. 3 Nuya̱sha Pitirnum Yúsnan etserniu uchirí̱ pujuarmia nu weriar Iriséun iṉkiuṉkar chicharainiak “¿Ámin jintintramniun yamái Uunt Yus jukittiana nu nékamek?” tiármiayi. Nuna tuíniakui “Ee nékajai. Takamátsatarum” tímiayi. 4 Nuyá̱ ataksha Irías Iriséun chicharuk “Yamaikia ámeka ju̱i̱ṉ juaktá, Uunt Yus Jirikiú péprunam akuptúkai” tímiayi. Túrasha Iriséu aya̱k “Yus íirmanum tura ámiji̱a̱i̱sha nekas tajai, aminkikia peṉké ikiukchattajme” tímiayi. Nuya̱ṉka takui̱ métek Jirikiúnam wéarmiayi. 5 Tura nui̱sha nútiksaṉ Jirikiúnam Yúsnan etserniu uchirí̱ pujuarmia nuna Iriséun iṉkiuṉkar chicharainiak “¿Ámin jintintramniun yamái Uunt Yus jukittiana nu nékamek?” tiármiayi. Nuna tuíniakui “Ee nékajai takamátsatarum” tímiayi. 6 Nuya̱sha Irías chicharuk “Yamaikia ámeka ju̱i̱ṉ juaktá Uunt Yus Jurtan entsanam akuptúkai” tutai Iriséu aya̱k “Yus íirmanum tura ámiji̱a̱i̱sha nekas tajai, aminkikia peṉké ikiukchattajme” tímiayi. Nu tutai ataksha métek wéarmiayi.
7 Tura Irías Iriséuja̱i̱ Jurtan entsa kaanmatkari̱n wajainiai̱ Yúsnan etserniu uchirí̱ armia nu seṉkuintia káunkar arant naka íirkamunam ii wajatiármiayi. 8 Túmainiai̱ Irías awaṉkémpri̱n ipijiak entsan awatmiayi. Túram entsasha arakaani̱ nuyá̱ nuṉkaani̱sha jímiapetek kanak kukach ajasmatai mái̱ metek amaini̱ katiṉkiarmiayi. 9 Tura nui̱ katiṉkiar Irías Iriséun chicharuk “Amiinia̱ wi kanaatsa̱i̱ṉ warí itiurtukai tusam wakeram nu turuttia” tímiayi. Tutai Iriséu aya̱k “Aminí̱ya̱ enentái̱ nuyá̱ patakam surusai tusan wakerajai”* tímiayi. 10 Tutai Irías chicharuk “Ame támena nuka ishichik seattsume. Túrasha wi weai̱ wáitkiamka sunastatme tura wáitkiachmeka sunaschattame” tímiayi. 11 Tura nui̱ áujmatki̱ wenai̱ aya aneachma kawainium karu nenakma aya ji keekú wantintiuk akankaram Iríaska nase wainchi ajamunam páchitkia nayaimpiniam wakamiayi. 12 Nuna wainiak Iriséusha kakantar untsumuk “Apawá apawá, ámeka Israernum suntara káruri̱ya̱ áintsaiti tura kawainium ekemtan unuimiátkarinme” tímiayi. Nuya̱ṉka Iríasnaka peṉké wainkiachmiayi. Tura ni pushiri̱niak achik jímiapetek já̱a̱kmiayi.
Iríasai̱ya̱ Iriséu Yúsnan etserin juakma
13 Nuyá̱ Irías wéak awaṉkémpri̱n aju̱a̱r ikiukmia nuna jukí̱ waketki̱ Jurtan entsa kaanmatkari̱n taa wajasmiayi. 14 Tura Iríasa pushiri̱ji̱a̱i̱ entsan kakantar awateak “¿Tui̱ pujá Iríasa Uunt Yusri̱sha?” tímiayi. Nuyá̱ awatmaja̱i̱ métek entsasha arakaani̱ tura nuṉkaani̱sha jímiapetek nakaak kukach ajasmatai Iriséusha katiṉmiayi. 15 Nuya̱sha Jirikiúnmaya̱ Yúsnan etserniu uchirí̱ amaini̱ wajarmia nu Iriséu túramun wáinkiar chicharainiak “Yamaikia Iríasa wakaní̱ Iriséun pujurui” tiármiayi. Nuna tiar iṉkiuṉkar tikishmátrarmiayi. 16 Nuyá̱ chicharainiak “Íimsakia, ámin takartámin seṉkuintia aents kakaram írunji, ámin jintintramniun e̱a̱uwarti. Yusa Wakaní̱ yajá jukí̱ pakanam nuíchuka muraani̱ apujkichiash” tutai “Atsá yaaksha akupkairap” tímiayi. 17 Kame tíitruiniam chicharainiak “Wats nui̱ṉkia seṉkuintia áishmaṉ akupkatarum e̱a̱uwarti” tímiayi. Tutai nú aishmaṉsha ashintiukar Iríasan menaintiú tsawant e̱a̱karsha peṉké wáinkiacharmiayi. 18 Túrawar Jirikiúnam waketkiar Iriséu pujamunam jeawarmatai chicharainiak “¿Ái̱chuk e̱a̱uwairap tímiajrum?” tímiayi.
Iriséu Jirikiúnmaya̱ entsan tsuarma
19 Nuyá̱ nu péprunam matsamiarmia nu shuar Iriséun chicharainiak “Uuntá ju̱ péprunam pujustincha tí shiiraiti. Túmaitiat éntsaka yajauchiti tura arakmamsha tsapachuiti” tiármiayi. 20 Nuna tuíniakui Iriséu chicharainiak “Yamaram ichiṉnanam wee eṉkearum itiartitiarum” tutai itiariármiayi. 21 Túram Iriséusha nu entsa jeará wee ukatuk chichaak “Uunt Yus jú̱nis tawai ‘Wi yamaikia jú̱ entsaṉka péṉker awajsarjai. Suṉkursha tura jákatniusha atsuttawai nuyá̱ arakmamsha péṉker tsapaittiawai’ tawai” tímiayi. 22 Iriséu chichakmia tímiatrusaṉ yamaiya̱ ju̱i̱sha éntsaka péṉker ajasáru áiniawai.
Pitirnumia̱ natsa Iriséuja̱i̱
23 Nuna tura Iriséu Pitirnum waketmiayi. Tumai̱ untsurí natsa áishmaṉ jintiurar katsekainiak “¡Pakaka yakí̱ wetá! ¡Pakaka yakí̱ wetá!” tiármiayi wishikiainiak. 24 Tu katsekenam Iriséusha apajá̱tar iis Uunt Yusa náari̱ji̱a̱i̱ yajauchiji̱a̱i̱ yumiṉkramiayi. Túram nuya̱i̱k kuaraintitús natsa áishmaṉ armia nuna, jimiará chai̱ nuwa̱ kampunniunmaya̱ tariar achia̱rar tepet tepet ikiukiármiayi. 25 Tura Iriséu Karmiriu nainnium wémiayi, nuyá̱ Samarianam waketkimiayi.