Yus Kanta
Nekas péṉker juurma sunastin
Tawit áaruiti.
16 Yusá Amiini̱ṉ weantka asamtai peṉker wáitkiata.
2 Maa, Yusá Áminiuketjai tájame.
Ámiji̱a̱i̱ṉchuka péṉker átinkia peṉké atsawai.
3 Kame Áminiu íktusma ju̱ nuṉkanam pujuinia núnaka
tí peṉker wekainiakui niṉkia ti wararainiajai.
4 Tura najanamu yusan wáurtusar enentáimtuinia nu ti wáitsartatui.
Nu ántar yúsnaka taṉkú numpe̱nka wikia ukatrúkchartatjai.
Tura náari̱ṉkisha pachitkiachartatjai.
5 Uunt Yusá surusuitmena nuka Ameketme.
Kame Amiini̱ṉ shiir enentáimsatniusha surame tura winia nuka Amek wainme.
6 Waitnentruruitme. Túram tí peṉker pujustinnium tsaṉkatrúkuitme.
Kame wi achiktiniaitjiana nusha imiá shiirmachiti.
7 Jintintra asamtai Uunt Yusan yúmiṉkiajai.
Nuja̱i̱ kashi kánaj nui̱sha winia enentái̱rui̱ jintintrawai.
8 Wini̱ya̱ Uunt Yusan tuke émtikjiai.
Warí, wini̱ya̱ eem wea asamtai peṉké nupettukchartatui.
9 Tuma asamtai winia enentái̱rja̱i̱ waraajai.
Núnisaṉ warastin chichaman chichaajai.
Tura aya̱shruja̱i̱sha imiatkinchanum pujustiniaitjiai.
10 Warí, winia wakantrusha jaka matsamtai̱niam tuke ikiurtuschattame.
Tura Áminiu naka wekáa Tunaarincha aya̱shi̱nkia káurtin tsaṉkatkashtatme.*
11 Tura iwiaaku átin jintia jintintruáttame.
Kame Amiin pujustatna nuka ti warastatui.
Nuyá̱ Ame untsuurumiini̱ṉkia tuke shiir pujustin awai.*