Rúmanam
Shuar tunáa túramun Yus nékaiti
2 Amesha enentáimtumasta. “Shuar nu yajauchin túrana nu imiá tunáa shuaraiti” tákumka amesha métek túrakum imiá nekas sumamame. 2 Yuska nu tunaan túrin ainia nuna súmamtikiashtinkiait. 3 Amesha nuna túrin “imiá yajauchiti” táyatam amesha métek túrakminkia Yus sumamtikiattana nuyá̱ ¿itiurak uwemprattam? 4 Wats, Yus imianú wait aneaku asa katsunteamuri̱sha tsaṉkarí̱sha ¿shiir awajtutsuk wasureamek? Kame ni waitnentrammari̱ ame atak enentáimpratjai turutit tusa nákarma nuka nékatsmek. 5 Tura tunaarum enentáimtutsuk tuke túrakmeka sumamtikiatin tsawantai̱ ti tunáa irutmampramuja̱i̱ ti asutniáttame. 6 Nu tsawantai̱ ni túramuja̱i̱ métek Yus ashí shuaran akirartatui.* 7 Shuar tuke péṉker túrak ashí shiira nunasha tura tuke amukachmin ainia nunasha wakeruiniana nuna Yus tuke iwiaaku Niji̱a̱i̱ shiir pujustinian súsartatui. 8 Antsu péṉkera nuna wakerutsuk aya yajauchin wakeruiniak Yusan nakitiáinia nuna Yus ti kajerak asutiáwartatui. 9 Nekas Israer shuarsha tura núnisaṉ Israer shuarchasha tunaan túrin áiniaka ti wáitsartatui. 10 Antsu nekas Israer shuarnasha tura núnisaṉ Israer shuarchancha péṉker túrin ainia núnaka Yus ti shiir imiatkinchanum apujsartatui. 11 Yus ashí shuaran akantsuk mái̱ metek iyawai. 12 Shuar Muisais akupkámun nékatsuk tunaan túraka aya jú̱nisaṉ sumamawartatui. Tura shuar Muisais akupkámun nékayat tunaan túraṉka nu akupkámuja̱i̱ sumamawartatui. 13 Akupkámun aya antukarua nuka Yusai̱ péṉker áiniatsui antsu antukar umirainia nuna Yuska “péṉkeraiti” tawai. 14 Israer shuarchaka Muisais akupkámun takakainiachkusha aya ni enentái̱ji̱a̱i̱ nu akupkámun umirainiak 15 nu umireamuja̱i̱ Yus nu akupkámun ni enentái̱n ikiursamua nuka paant nekanamniaiti. Nuja̱i̱ métek túruiniak itit awajsachma shiir enentáimtumainiawai. Tura métek umirainiachkuṉka itit péṉkercha enentáimtumainiawai. 16 Wi uwempratin chichaman étsereaj nui̱ ashí shuar u̱kri̱sha túramun ashí paant awajsártatui. Tura nuna etserkatniun Jesukrístun anaitiukmiayi. Nu tsawantai̱ tunaan túrin sumamawartatui.
Israer shuarsha Muisais akupkámun umirchamu
17 Kame jú̱nisam enentáimprashtameash “Wikia Israer shuarchakaitiaj. Muisais akupkámun takakui winia Yúsruka ti shiir enentáimturui. 18 Yus wakeramuncha nékajai. Tura akupkámun nekaan péṉkera nuna wakerajai. 19 Wakannium kusuraru ainia nunasha jintintiámniaitjiai. Tura tsáapninian nekamtikiawarminiaitjiai. 20 Yusa akupkámuri̱nkia nekasa nuna tura naka enentáimpramnia nunasha takaakun nékachuncha tura uchincha jintintiáwarminiaitjiai” ámeka tátsumeash. 21 Pai, chíkichka unuiniaitiatmesha ¿urukamtai imia ámeka unuimiatsum? “Kasamkashtiniaiti” tu étsereatsmek. Táyatmesha ¿urukamtai ámeka kasamam? 22 “Tsanirmashtiniaiti” tátsumek. Enta, ¿urukamtai ámeka tsanirmam? “Najankamu yusan nakitiajai” tátsumek. ¿Urukamtai ámeka nu yusa je̱e̱nia̱ kasamam? 23 Akupkámun takakjai tusam shiir enentáimtumayatam nu akupkámu umireachkum Yus yajauch awajeatsmek. 24 Yus Papiniumsha núnis áarmaiti “Átum péṉker umirchamuja̱i̱ Israer shuarcha Yusan yajauch chicharainiawai.”*
25 Muisais akupkámia nu ashí umireakmeka ni timia núnismek tsupirnaktin péṉkeraiti. Tura takamtsuk umireachkumka tsupirnakcha núnisketme. 26 Chíkich shuarsha tsupirnakchaitiat Muisais akupkámun umireakka tsupirnatskesha tsupirnakua áintsaṉkete. 27 Nu shuar tsupirnakchaitiat akupkámun ashí umireak atumín tsupirnakutirmin akupkámu takakuitiatrum umircha asakrumin sumamtikramawartatui. 28 2:28-29 Kame nekas Israer shuarka aya pátatkechu antsu nekas enentáiji̱a̱i̱ Yúsnan wakeruktinia nuiti. Núnisaṉ nekas tsupirnaktinkia aya aya̱shji̱a̱i̱nchuiti antsu enentáiji̱a̱i̱ Yus enentáimtustinia nuiti. Nekas akupkámu aya áarchamuiti antsu Yusa Wakaní̱ji̱a̱i̱ nekas enentáiniam tsupirnakma núiti. Nekas tú tura núnaka aents shiir enentáimtuiniachkuisha Yuska shiir enentáimturtatui.