Ameja ya enentaimtustatam?

1. Nekas warasar pujustai takurkia wari turatniuitiaj? (Isaías 48:​17, 18 TNM).

Jehovaka iin anenmaji tuma asa yamaisha tura ukunmataisha waras pujuarat tusa wakerawai (Ecl. 3:​12, 13 TNM). Warinkisha turamnia aini najatmaitji. Ninki naamkar penker pujuarat tusanka Yuuska tu enentaimias najatmachuitji. Nuyasha ninki penkera nuna tura yajauchia nuna neka arat tusasha najatmachuitji (Ecl. 8:9 TNM; Jrm. 10:23). Ni enentaimtakur tura umireakur warasar pujumniaitiajnia nuna ninkia nekawai (Isaías 48:​17, 18 TNM aujsata).

2. a) Iwianchkia warintia enentaimsarat tusa wakera? b) Iwianch ainis waitrua asamtai Jehovasha warinia itiurkait?

² Iwianchkia Yuuska utsumatsji iik warasar pujumniaitji tura iik naamkar penker pujumniaitji tu enentaimsarat tusa wakerawai (Náṉ. 3:​4, 5). Iwianch waitrak ainis tiniuana nuna nekaawarat tusa Jehová naamkar pujuarat tusa yamaikikia iniaisaiti. Aents naamkaru eketainiana nuka itiurchatan iwiaratniun tujinkiaruiti. Antsu aishman nuwasha Yuusan enentaimtuiniak waras pujuarmiania nuna Yuusa chichame aujmateawai. Jesussha Jehovan enentaimtak waras pujumiayi. Ju unuimiateamunam Jesussha urukamtaiya aya Jehovanak enentaimtustinian enentaimsamia nuyasha urukamtaiya Jehovasha aya ninki enentaimtustiniaitiaj nusha nekaattaji. Tura aintsan urukamtaiya Jehová enentaimtin ajastincha enentaimsamaj nusha nekaattaji.

JESUSHA URUKAMTAIYA AYA JEHOVANAK ENENTAIMTUSTINIAN ENENTAIMSAMIA?

3. Iwianch Jesusan warinia amastajme timia tura ainis tutai Jesussha waritmia?

³ Jesús ju nunkanam pujumiania nui yana enentaimtustiniuya nui enentaimsamiayi. Jesús imianmiania nui arusan iwianch aya chikichki winia tikishmatrurakminkia ashi nunkanam irunna nuka aminiu ati tusan amastatjai tu timiayi. «Tutai Jesus chichaak “Werumta iwianchi uuntri̱yá. Yus Papinium aarma awai ‘Ame Úuntrum Yusak tikishmátrata tura Niṉki shiir awajsata’ tawai” timiayi» (Mat. 4:​8-10). Jesussha urukamtaiya aya Jehovanak enentaimtustinian enentaimsamia nu nekaatai.

4, 5. Jesussha urukamtaiya Jehovan enentaimtustinian wakerukmia?

⁴ Jesuska ni apari Jehovan nekas enentaijiai anea asa nin enentaimtimiayi (Juaṉ 14:31). Nuyasha Jehová enentaimtustinkia ti penker asamtai Jesuska nin enentaimtawai (Juaṉ 8:​28, 29; Apu. 4:11). Jehová ii iwiakmarin amasuitji tura ninkia tsankaiti Jesuska nuna mash nekawai (YKan. 33:4; 36:9 TNM; San. 1:17). Jehovaka Jesusan tuke nekasa nuna warinkisha ujakuyayi tura Jesús takumiania nuka Jehová susauyayi (Juaṉ 1:14). Antsu iwianchkia untsuri aentsun maiti tura waitriniaiti nuyasha aya niniunak enentaimniuiti (Juaṉ 8:44). Jesuska Jehovan penker nekamiayi tura iwianchnasha penker nekamiayi tuma asa iwianch turamiania aintsan Jehovan nakitratniunka ninkia penke enentaimchamiayi (Filip. 2:​5-8 TNM).

⁵ Nuyasha ni Jehovan umireakuinkia wari turunatniuya nuna neka asa aya Jehovanak enentaimtustinian wakerimiayi (Heb. 12:2 TNM). Jesuska Jehovan umireakka ni apari naarin penker ujukatniuyania nuna nekamiayi. Tura aintsan iwianch itiurchat amajkartusuana nuna ni amuktiniuyania nunasha nekamiayi.

URUKAMTAIYA JEHOVASHA AYA NINKI ENENTAIMTUSTINIAITIAJ?

6, 7. a) Nukap aents urukamtaiya Jehovan enentaimtuiniatsu? b) Urukamtai aya Jehovak enentaimtustiniaitiaj?

⁶ Yamaiya juinkia nukap aents Jehovan nekainiachu asar nin enentaimtuiniatsui. Nuyasha ni urukuit nuna nekainiatsui tura warinmansha yayainiana nunasha nekainiatsui. Atenasnumia aents Jehovan nekachu armiayi nu aentsun apóstol Pablo Yuusa chichamen ujakarmiayi (Tur. 17:​19, 20, 30, 34).

⁷ Atenasnumia aentsun Pablo junis timiayi “Warí, imia niṉki Nisha ii iwiaakmari̱n, ii mayattairi̱ncha tura ashí írunna nunasha súramtsujik” timiayi. Nuyasha junasha timiayi “iisha Yusja̱i̱ iwiaakji. Yusja̱i̱ muchitiaji. Tura Yusja̱i̱ ii kakarmari̱ takakji” tu timiayi. Tura aintsan junasha timiayi “Ashí nuṉkanam matsamsarat tusa nú numpanmaya̱nak ashí aentsun najanamiayi” tu timiayi. Ainis asamtai Jehovaka iin najakrata asamtai aya ninki enentaimtustiniaitji (Tur. 17:​25, 26, 28).

8. Jehovasha warinia penkesha turachminiait?

⁸ Jehovaka iin najakrata asa tura ashi nerentin asa ni wakerakka enentaimtursarat tusa utsukmakminiaitji. Tumaitkiusha ninkia nunaka penke ainis turachminiaiti. Antsu untsuri aents winia amikiur ajasar tuke waras pujuarat tusa wakerawai (1 Ti. 2:​3, 4). Tuma asa ninkia iwiaku Yuusana nuna tura iin ti anenmajnia nunasha paant nekaamtikramaitji. Tuma asamtai ju nunkan shiiram amajsattsa itiurkatta nuna chikich aentsun unuiniararat tusa penker jintintrameaji (Mat. 10:​11-13; 28:​19, 20). Jehovaka anenkratin asa ni iruntramurin pachitkia atinian yainmakuitji tura nui uuntri anaikiamu ainiana nuka aneasmajai iin waitmakarat tusa ni apujsaruiti (Tur. 20:28).

9. Jehovasha anenkrata asa itiurniuit?

⁹ Yuuska atsawai tu enentaimiainiana nunasha Jehovaka anena asa warinkisha suiniawai. Yaunchunia juarkin aentska ni wakeruiniana nunak turin ainiawai. Tumaitkiusha Jehovaka ti penker asa iwiaku pujustai tusar utsumainiana nuna suiniawai (Mat. 5:​44, 45; Tur. 14:​16, 17). Ni yayam nuatnaikiarminiaiti tura uchin takuarminiaiti nuyasha amikrincha takuarminiaiti nuyasha takakmainiak warinkisha takuarminiaiti (Sal. 127:3 TNM; Ecl. 2:24 TNM). Jehovaka ashi aentsun nekas anenaiti (Jiin. 34:6). Yamaikia iisha urukamtaiya Jehová enentaimtin ajasuitiaj tura nisha itiura warinkisha amaj nu nekaawartai.

URUKAMTAIYA JEHOVÁ ENENTAIMTIN AJASTINCHA ENENTAIMSAMAJ?

10. a) Nekassha Jehovasha urukamtaiya enentaimtaj? (Mateo 22:37 TNM). b) Jehová penker nekakratea asamtai tura tsankukratin asamtai ameja itiur enentaimiam? (Yus Kanta 103:​13, 14).

¹⁰ Iisha Jesusa aintsan Jehová nekas enentaijiai anea asar ni enentaimtaji (Mateo 22:37 TNM aujsata). Jehová nekaki weakur ni urukuit nu nekaar shiir enentaimsattaji. Israel aents Jehovan umirkacharmiania nui waitneasrum yajauch turamuka iniaisarum wini waketkitiarum tu timiayi (Jrm. 18:11). Jehovaka tunaartiniaitiajnia nuna neka asa tsankukratniuiti (Yus Kanta 103:​13, 14 aujsata). Jehová tsankukratniuana nui enentaimkium amesha Jehová tuke umirkatin wakeratsmeash.

11. Iisha urukamtaiya Jehová enentaimtin ajasuitiaj?

¹¹ Nuyasha Jehová enentaimtustinkia imia penker asamtai ni enentaimtiniaitji (Mat. 4:10). Jehová umireakur ni naari penker ujuwaji nuyasha iwianchkia waitriniaiti tu enentaimia asar ni umirkattaji tura ni umireakur waramtiksattaji. Yamaiya jui Jehová enentaimtakrikia uruma nuisha tuke enentaimtustatji (Juaṉ 17:3).

12, 13. Ii umai Juana tura Adela nankaamasarmiania nuna wari nekaamniaitiaj?

¹² Uchichinmayan Jehová ti aneastin juarkimniaitji tura ainis aneakrikia tsawan nankaamaki weakuisha tuke aneastatji. Ii umai Juana tura Adelaa nankaamasarmiania nuna aujmattsatai. Yuusa chichamen unuimiartinian juarkiarmiania nuinkia 11 uwi tura chikichkia 10 uwi takuarmiayi. Ni apari ni nukurijiainkia ii religionkrin warinkish najanmanum atumsha pachinkiattakruminkia Yuusa chichame unuimiartarum tusar tsankamkattaji ainis tiarmiayi. Ii umai Juana aujmatuk junis tawai: Testigos de Jehová jintintruawarmania nu nekaska drogan mukunat tusa utsutainiakuisha katsuntratniun yainkiamiayi tura aintsan tsanirmatin nakitratniuncha yainkiamiayi tu tawai.

¹³ Natsamaru armiania nui Yuusa chichame etserin ajasar tsawan nankaamaki weakui precursora ajasarmiayi. Yuusa chichamen etserainiaksha ni apari ni nukuri uuntmantu asarmatai wainiarmiayi. Ii umai Juana ni nankaamasmari enentaimias junis tawai: Jehovaka nin enentaimtin ainiana nunaka tuke yainkratniuana nuna nekaamiajai tura 2 Timiutéun 2:19 nui tana aintsan “Uunt Yus ni shuari̱n nékainiawai” tana nuna nekaamiajai tu tawai. Nin anenana tura nin enentaimtuinia nunaka Jehovaka penker wainniuiti.

14. Jehová naari ayampruktai tusar itiurkamniaitiaj? (Nakumkamusha iista).

¹⁴ Jehová naari penker ujukamu ati tusar wakeraji. Watskea enentaimsakia amikrum ti tsanka tura waitnenkratin takaku aintme. Aya neachma ame amikrumin ninkia kajenaiti tura waitriniaiti tu tuiniamu antukaintme. Warin itiurkaintiam? Ame amikrum ayampruktatme nekaschak? Aintsan yaksha Jehovanun yajauch aujmatkuinkia iikia nuka nekaschaiti tusar Jehovanu penker aujmattsattaji (YKan. 34:1; Is. 43:10 TNM). Nu turakur ii tajinia nujai tura ii najaneajnia nujai Jehová nekas enentaimtustasar wakeramu paant nekanattawai.

15. Pablo ni wakeramurin iniais Jehová wakeramun najana asa urukamia? (Jiripiusnum 3:​7, 8).

¹⁵ Jehová waramtiksatai tusar tura ni takatrisha nukap najanatai tusar ii wakeramuka iniaisar Jehová wakeramu najanatai tusar warinkisha turiniaitji. Pablo Kristu aents ajastasa tura Jehovan enentaimtustaj tusa unuimiaru asa paantin ajasminiaitiat nuna nakitramiayi (Kar. 1:14). Nuna tura asa waras pujuyayi tura Jesusjai uunt naamak pujuttawai. Pabloka Jehovan enentaimtustinian kajinmatkishmiayi. Iisha Pablo itiurkamiania aitkiasrik turatniuitji (Jiripiusnum 3:​7, 8 aujsata).

16. Julia turamiania nuna wari nekaamniaitiaj? (Nakumkamusha iista).

¹⁶ Ii umai Julia nankaamasmiania nuna nekaatai. Uchiyania nuinkia iglesianam eem wajasar nampenainiana nui nisha pachitkiauyayi. Ti penker nampea asamtai tuinsha wekas nampesat tusar nampestinian unuimiatra unuiniarmiayi. Arusan tuinsha nekaamu ajasmiayi tuma asa aents tuakar matsatainiamunam tui tuinsha nampestinian juarkimiayi. Nampestinian unuimiatuk pujai ni ai Yuusa naarin jintintiamiayi. Arusan ii umai Julia naartinkia Yuusa chichamen tuke atsakamutin jimiara unuimiatmiayi. Tura Yuusa chichamen unuimiak nampestinian unuimiatmiania nunaka iniais Jehová enentaimtin ajasmiayi. Ainis turatniuka yupichuchichuyayi. Ii umai junis tawai: Aentska nampestin nekayatmesha urukamtai iniaisam turut wearmiayi tumaitkiusha wikia Jehovan enentaimtustinian imiankaska wakerimiajai tu tawai. Julia ainis turamiania nuka 30 uwi nankaamasuiti tura nisha ainis turamiania nuna warintia enentaimta? Ni junis tawai: Ti warajai tura uruma nui wi warinkish wakerajna nuna Jehová mash tsankatruktatui tu enentaimiajai ainis tawai (Sal. 145:16 TNM). Jehová enentaimtakrikia yamaiya juisha tura uruma nuisha nekas penker pujumniaitji.

JEHOVÁ TUKE ENENTAIMTITIA

17. a) Jehovan enentaimtuiniasha warintia enentaimiania? b) Jehová enentaimtuiniatsna nuka warinia turawarminiait?

¹⁷ Yajauchia nu amukatin penke ishichik ajasmanum pujaji. Apóstol Pablo junis timiayi: “Kame Yus Chichamnum áarmaiti ‘Tátinia nu ishichik ajasái. Wárik tátatui’” tu timiayi (Isr. 10:37). Pablo wariniak takua ainis timia? Jehová enentaimtuiniatsna nuka yamai enentaimtusartiniaiti (1 Kur. 7:29). Jukeruska itiurchat atatui tusa timiayi antsu Jehová enentaimtatikia itiurchatka ishichik tsawan katsuntrattaji tu enentaimiaji.

18. Jehová Jesusjainkia warinia turawarat tusar wakeruinia?

¹⁸ Jesuska winia nemartin ajasrum tuke nemartustarum tu timiayi (Mat. 16:24). Jehová nukape uwi enentaimtakrikia yawetkichartai. Aminiak enentaimtustatjame tiniuitiajnia nuna Jehovaka tuke umirtukarat tusa wakerawai. Jehová enentaimtakur penker nankaama asar warinkish penkera nu wainiu asar shiir enentaimiaji (YKan. 35:27).

19. Germán nankaamasmarijiai wari nekaam?

¹⁹ Jehovan enentaimtaknaka wi wakeramun warinkisha turachminiapitjia tu enentaimniusha irunui. Natsamaruitkiumka Yuus enentaimtakum chikich natsamaru nankamas ni wakeramun turuiniana ainis wikia turatniunka tujinkiattajapia tu enentaimtsumeash. Natsamaru Germán naartin junis tawai: Testigos de Jehovatikia warastai tusar warinkisha turichu ainia ainis enentaimmiajai. Chikich uchi wijiai metek tsakararu armiania nuka nampernum wear warainian tura anajmarmarincha takakainian turutskesha maniniamunu nakuruiniak warainian wainiarmiajai. Antsu wikia iruntainiam wu wemiajai tura Yuusa chichamencha etserniuyajai tu tawai. Ii yachi tu enentaimiu asa urukamia? Ni junis tawai: Chikich natsamaru yajauchin najan wearmiania aintsan najantan juarkimiajai. Penkeran najanea nuke nekapmiajai tumaitkiusha tsawan nankaamaki weakui nekas nekaamka enentairuinkia penker nekapchamiajai. Yuusa chichame unuimiatrauyajna nui enentaimsamiajai tura nuna umiaknaka penker pujumniaitiajna nuisha enentaimsamiajai. Nui enentaimkiun Jehovan nekas enentaimtustajai tu timiajai. Tura nunianka Jehovaka wi seamun anturtawai tu tawai.

20. Wari tuke turatin enentaimsatniuitiaj?

²⁰ Yus Kanta 65:4 juna aarusha: “Aents Ame je̱e̱min pujusat tusar Ame achikma Aminí̱ weamkaka ti shiir awajsamuiti” tu timiayi. Tura Josuesha junis timiayi: “‘Antsu wikia wí shuarja̱i̱ nekas Uunt Yusan umirkattajai’ tímiayi” (Jus. 24:15) Aintsarik iisha Jehová tuke enentaimtukir weartai.