AKANKAMU 40
NAMPET 30 Jehovaka winia amikruiti, winia aparuiti, winia Yuusruiti
Jehovaka ti kuntuts pujuiniana nunaka waitnentas penker wainniuiti
“Tura enentáinium jaa ainia nunasha tsuáwiti tura akaṉmári̱ncha jaanchji̱a̱i̱ pénuiniaiti” (YKAN. 147:3).
JU UNUIMIATRATTAJI
Jehovaka kuntuts nekapainiana nuna enentaimtus pujawai. Ju unuimiatmanum iin yainmaktasar Jehová itiurniuit nu tura iisha chikich aents ikiakartaj tusar itiurkatniuitiaj nu nekaattaji.
1. Ni umirkattsar kakajnia nuna iiyak Jehovasha itiur enentaimniuit?
Warinsha nankaamajnia nuna Jehová iiniaiti. Urutai penker nankaamasuitiaj nuna tura urutai kuntuts nankaamasuitiaj nunasha nekawai (YKan. 37:18). Itiurchat enentaimiakrisha ni umirkattsar kakajnia nuna iis ti warawiti. Ainis nankaamakrin ninkia yainmawitji tura ikiakatmawitji.
2. a) Ti kuntuts nekapainiana nuna Jehová itiurniuit? b) Jehová yainkratkat takurkia wari itiurkatniuitiaj?
2 Aents akamakmarin tsuakratin waitnentas suana aintsan Yus Kanta 147:3 nuisha aujmatui. Jehovasha ti kuntuts pujuiniana nunaka waitnentas penker wainniuiti. Yuus papiinium ainis aarma asamtai kuntuts nekapainiana nuna Jehovaka waitnentainiak yayainiana nu nekaamniaitji. Jehová ainis yainkratkat takurkia wari itiurkatniuitiaj? Watskea yaksha akamakuka doctornum wetiniaiti. Tumaitkiusha nekas tsuamartaj takunka doctor mash tana nuna umiktiniaiti. Ju unuimiatmanumka ti kuntuts pujakrisha Jehová ni chichamejai warinia jintintramaj nu tura anenkratin asa ni jintintrameajnia nusha umiktasar wari itiurkatniuitiaj nusha nekaattaji.
JEHOVAKA TI SHIIR ENENTAIMTURMAJI
3. Urukamtai imiancha ainis enentaimin ainia?
3 Ju nunkanmanka aentska anenkratcha ainiawai. Nukap aents chikich aentsjai shiir ajachu ainiawai tura imiancha ainis iin ainiawai. Ii umai Helena naartin junis tawai: Wi uchiyajna nui winia jearuinkia anenkratcha armiayi. Winia aparka kajenuyayi. Atumka enentaimcha aniuitrume tuke ainis turam wemiaji ii umai tu tawai. Amesha aintiaku nankaamasukaitiam? Yaksha kajertamcharmiashia, imiancha ainis enentaimchashiam turutskesha yaksha anentainiatsui tu enentaimchashiam. Ainis nankaamasuitkiumka winiaka yaksha anenchaiti tu enentaimtsumeash.
4. Salmo 34:18 TNM nuisha Jehová wari turameaj?
4 Yaksha itiurchat amajtamsaitkiuisha Jehovaka anenmawai tura ti shiir enentaimturmawai. “Jehová ti kuntuts pujuinia nuna ikiuchuiti” (Salmo 34:18 TNM aujsata). Majat enentaimiakmeka penker enentai achiaku asakmin winia enentaimtursat tusa Jehová yainmakuana nui enentaimsata (Juaṉ 6:44). Ninkia ti anenma asa amin tuke yainmaktatui.
5. Jesús turamiania nuna wari unuimiatramniaitiaj?
5 Jesús ju nunkanam pujumiania nui urukuya nujai Jehová itiur nekapea nu nekaamniaitji. Jesús ju nunkanam pujumiania nui imiancha iisma asar waitiarmiania nuna iis waitnentrarmiayi (Mat. 9:9-12). Nuwa ti jaa Jesús tsuaramniapitia tu enentaimia asa Jesusa pushirin antinkiamiayi, nu turam winia enentaimtursa asam shiir weta timiayi (Mar. 5:25-34). Jesuska ni aparinia aniuiti (Juaṉ 14:9). Tuma asa Jehovaka ame penker najanmena nuna penker iiyawai. Nuyasha ni aneakum nekas enentaimtamna nunasha nekartamui.
6. Imiancha ainis enentaimiakmeka wari turamniaitiam?
6 Imiancha ainis enentaimiakmeka wari turamniaitiam? Yuus papiinium Jehovaka shiir enentaimturmawai tu aarma esetram enentaimsam aujsata (YKan. 94:19).b Ame najanattsa wakeramu najanatin jeashkumsha tura chikichkia najanainiakuisha wikia jeatsjai tu enentaimtumasaip. Jehovaka jeashminiaka ju turata tukartichuiti, tuma asa ame jeamuk najanat tusa wakerawai (YKan. 103:13, 14). Yaunchuk yaksha waitkiarmasuitkiuisha waitkiarsame tu enentaimia pujuip. Jehovaka aents waitkiarmasun nekawai. Nunaka ni iistatui (1 Pit. 3:10-12). Sandra uchiyania nui waitkiasma asa junis tawai: Yuuska shiir enentaimturuapi tu enentaimsattsan tuke Yuusan seawitjiai tu tawai.
7. Itiurchat nankaamasuitkiumka chikitcha itiur yainminiaitiam?
7 Jehovaka chikich yainminiam tusa amin utsutmakminiaiti tura Yuusa chichame etsermanumsha yaimkiat tusa tsankatramkaiti (1 Kur. 3:9). Yaunchuk itiurchat nankaamasu asam chikich itiurchat nekapainiakui ni itiur nekapea nu neka asam yaksha yaintatme. Helen naartin párrafo 3num aujmattsajnia nu nin chikich yainkiarmiayi tuma asa yamaikia chikichan yainminiaiti. Ni junis tawai: Yaunchukka penke imiancha ainis enentaimniuyajai antsu Jehovaka anenta asa chikich aents yainminiam tusa yaintiawai tu tawai. Helen yamaikia precursora regular asa ti shiir nekapeawai.
JEHOVAKA NINKIA TSANKURTURUITI TU ENENTAIMSARAT TUSA WAKERINIAITI
8. Isayas 1:18 nui Jehová warintramaj?
8 Testigo de Jehová ainiaka yaunchuk imiannitsuk turutskesha imianniaruitiat tunaamkamurin nui enentaimia pujuiniash iruneawai. Jehová anenkrata asa ni uchiri akupturmakmiajnia nui enentaimsatniuitji. Jehová chichaak “Wats winitiárum iiji̱a̱i̱ áujmatsarmi” tawai.c Nu turawakrinkia Jehovaka ii tunaarin tsankurtamprattaji (Isayas 1:18 aujsata). Yaunchuk yajauch najanamuncha tsankurkartin asamtai tura aya penker najanaitiaj nui enentaimin asamtai ti yuminkiaji (YKan. 103:9, 12; Isr. 6:10).
9. Yajauch turamiamna nuinki enentaimiakmeka wari turamniaitiam?
9 Yajauch turamiamna nuinki enentaimiakmeka wari turamniaitiam? Yamai penker pujamna nui tura ukunam penker pujuttamna nuisha enentaimsata. Apóstol Pablo nankaamasmiania nui enentaimsata. Ninkia yaunchuk Kristu aentsun turamiania nui enentaimias waitniuyayi, tumaitkiusha Jehovaka tsankurturuapitia tu enentaimmiayi (1 Ti. 1:12-15). Yajauch turamia nui enentaimiaka pujuchmiayi turutskesha unuimiaruitjiai tusha enentaimchamiayi (Jir. 3:4-8, 13-15). Turamurin enentaimia pujutsuk Yuusa chichamen etsereak arum atatna nui enentaimniuyayi. Amesha aintsamek yamaiya jui Jehová paant ujukamniaitme tura arum atatna nuisha enentaimsamniaitme.
10. Yaksha warinkish timi yajauch enentaimtikraitkiumka wari turamniaitiam?
10 Yaksha warinkish timi yajauch enentaimtikraitkiumka timiamna nui enentaimsam yajauch nekapeakmeka wari turamniaitiam? Shiir amajnaisam pujustasam nekas enentaimjiai tsankurturta titia (2 Kur. 7:11). Yajauch enentaimtiksaitmena nui, shiir enentaimsat tusam Jehová seattia. Jehovaka aents yajauch enentaimtikraitmena nunasha tura amincha shiir amajnais pujusmintrum tusa yainmaktatrume.
11. Jonás nankaamasmiania nuna wari unuimiatramniaitiaj? (nakumkamu iista).
11 Awajirmiamna nui enentaimtsuk Jehová warinia turat tusa wakera nu najanata. Jonás nankaamasmiania nui enentaimsata. Jehová Nínive matsatkamunam weta tutai Jonaska nuna turutsuk yaja wemiayi. Jehová yayam Jonaska ni awajirmiania nuna nekaamamiayi (Jns. 1:1-4, 15-17; 2:7-10). Jehovaka Jonasan Niniveniam weta ataksha tu timiayi, tutai Jonaska wemiayi. Ni umikchamiania nui enentaimias itiurchat enentaimtsuk yamaikia Jehová turuteana nuna najanattajai tu timiayi (Jns. 3:1-3).
Namaknumia Jonás jinkimtai Jehová ataksha chicharuk Ninivenam weme Yuusa chichame etseruta timiayi. (Párrafo 11 nui iista).
JEHOVÁ NI KAKARMARIJIAI IKIAKAKRATNIUITI
12. Ti itiurchat nankaamakrin Jehovasha itiur yainkratniuit? (Jiripiusnum 4:6, 7).
12 Ti itiurchat nankaamakrin Jehovaka ni kakarmarijiai shiir enentaimtikrameaji. Ii yachi Ron naartin ni nuari Caroljai ni uchiri maamamtai Jehová yainkiarmiania nu nekaatai. Ninkia junis tuiniawai: Yaunchuksha itiurchat nankaamasaitji tumaitkiusha ii uchiri maamamtai ti waitsamiaji. Kanartin tujintiakur Jehová seakur ii enentain shiir nekap wemiaji. Jiripiusnum 4:6, 7 (aujsata) tana aintsan nekap wemiaji, ii yachi ni nuarijiai tu tuiniawai. Ti itiurchat nankaamakum ti kuntuts pujakmeka ame itiur nekapeam nu ninkia tuke seamniaitme (YKan. 86:3; 88:1). Ni kakarmarijiai yainkiat tusam tuke sea weta. Ninkia ame seamun tuke anturtamkattawai (Ruk. 11:9-13).
13. Ti itiurchat nankaamakmincha Jehová itiura yainmakminiait? (Ipisiunam 3:16).
13 Ti itiurchat nankaamasu asam katsuntrashmin nekaptsumeash? Jehovaka winia tuke enentaimtursat tusa ni kakarmarijiai yainmakminiaiti (Ipisiunam 3:16 aujsata). Ii umai Flora naartin nankaamasmiania nu nekaatai. Ninkia ni aishrijiai misionero anaikiamu armiayi. Tumaitkiusha ni aishri tsanirmamtai ajapnaiyawarmiayi. Ii umainkia junis tawai: Winia aishur anankruamiania nuin enentaimkiun ti itiurchat nekap wemiajai. Ainis puja asan ame kakarmarmijiai katsuntratniun yainkiata Jehovan tu seamiajai. Jehová ikiakatramiayi tura wikia katsuntrashtatjai tu enentaimsaitkiuisha Jehovaka katsuntratniun yainkiamiayi. Yamaikia Jehová nekas yainkratniuiti tu enentaimniuitjiai tura warinkish itiurchatan wainkiancha ninkia ajapa iniaituschattawai, ii umai tu enentaimiawai. Jehová itiur yainmia nuna aujmatuk ii umainkia Yus Kanta 119:32 nui tana nuna pachis junis tawai: Winia enentair uunt awajtursa asakmin ame akupkamu jintimin tsekeajai ainis tawai.
14. Jehová ni kakarmarijiai yainkratkat tusar wari itiurkatniuitiaj?
14 Jehová ame kakarmarmijiai yainkiata tu seam nunianka wari itiurkatniuitiam? Iruntramunam tuke weta, Yuusa chichame etsermanumsha pachinkiata, tura Yuusna najanatin chikich irunna nusha najanata. Tuke tsawan Yuusa chichame aujsata, nu turakmeka Jehová enentaimiana ainis amesha enentaimsattame (Jir. 4:8, 9). Yuusa chichame aujkum yaunchuk Yuusan umirkaru itiurchatan wainiainiaksha itiurkarmia nui tura katsuntratniun Jehová itiurak yainkiarmia nuisha enentaimsata. Nuik párrafo 6 nui ii umai Sandranu aujmattsamji, ninkia ti itiurchatan nankaamasuiti. Ninkia junis tawai: José nankaamasmiania nui enentaimkiun kaka wemajai. Ninkia ti itiurchat nankaamasuitkiusha Jehovainianka aran ajaschamiayi tu tawai (Náṉ. 39:21-23).
JEHOVAKA II YACHI II UMAIJIAI IKIAKATMAJI
15. Ii yachi ii umaisha itiur ikiakatmararminiaitiaj? (Nakumkamusha iista).
15 Ii waitiakrin ii yachi ii umai ti ikiakatmararminiaitji (Kurs. 4:11). Jehová anenkratin asa ii yachi ii umaijiaisha yainkratniuiti. Ii yachi ii umaisha iijiai pujuiniakui tura amamkesar anturtamainiakrin ikiakakratin ainiawai. Yuus papiinmania aujsar turutskesha iijiai pujusar Yuusan seainiakka ikiakatmarminiaitji (Rum. 15:4).d Jehová itiur enentaimniuit nuna turamainiakrin ikiakatmarminiaitji turutskesha iin yainkratkat tusar yurumkancha amasarminiaitji nuyanchuka warinkish najanawarminiaiti.
Ii yachi ii umai Yuusnum katsuaru yainkratainiak ikiakakratin ainiawai. (Párrafo 15 nui iista).
16. Ii yachi ii umai yainkratkarat takurkia wari itiurkatniuitiaj?
16 Ii yachi ii umaisha yainkratkarat takurkia ii itiurchatri ujakarminiaitji. Ii yachi ii umai anenkratainia asar iin yainkratkattsar wakerin ainiawai (Neka. 17:17).Tumaitkiusha itiur nekapeam nuna tura wari utsumam nunasha nekainiachkunka yainmakcharminiaiti (Neka. 14:10). Majat nekapeakmeka ame amikrum esetran enentaimiainiana nujai aujmattsata. Itiur yainmakarminiait nu tiarminiaitme. Uuntri anairamu ainiana nujai yajaiya aujmattsatin wakeriniaitiam nujaisha aujmattsamniaitme. Ii umainkia ni kai Yuusnum katsuaru ainiana nujaisha aujmatin ainiawai.
17. Ii yachi ii umaijiaisha iruntrar nankaamastasar urukamtai kakartiniaitiaj?
17 Ti kuntuts nekapeakrisha ii yachijiai ii umaijiaisha iruntrar nankaamastasar ti kakartiniaitji. Nuyasha ninkia ii itiur nekapeaj nuna nekatniun tujinkiarminiaiti tura ni warinkish turamainiakrin kuntuts enentaimminiaitji (San. 3:2). Ainis nankaamakur majat enentaimsashtiniaitji ninkia ikiakatmarartasar wakerin ainiawai. Ii yachi uuntri anaikiamu Gavin naartin ti kuntuts enentaimtai sunkuran takakui. Ninkia junis tawai: Wiki pujustinian ti wakeru wemajai tu tawai. Ii yachi ainis pujustinian wakeraksha ni yachijiai ni umaijiaisha irunar nankaamastasa ti kakainiaiti. Nuna turak shiir enentaimniuiti. Ii umaisha Amy naartin junis tawai: Itiurchat nankaamasu asan yajainsha nawamnaikiatniun wakerichuitjiai, tumaitkiusha Jehová aintsan winia Yuusnumia umaijiai kaerjaisha nawamnaikiattsan tura aneasartasan ti kakainiaitjiai. Ainis turakun ti shiir enentaimniuitjiai tura Jehovancha ti waramtikiajai tu tawai.
UKUNAM ATATNA NUJAI JEHOVÁ IKIAKATMAWITJI
18. a) Jehovasha warinia turatta? b) Ameja wari itiurkatniuitiam?
18 Yamaiya jui jaa pujakrisha Jehová uruma nui tsuamartatji tura nuinkia itiurchat enentaimiamuka atsuttawai. Jehovaka waitiamun amuktatui nu neka asar waraji (Apu. 21:3, 4). Shiiram nunkanam yamai waitiajnia nuka kajinmatkittiaji (Isa. 65:17). Nu tsawan jeamam yamai unuimiarajnia aintsan ii waitiakrin Jehovaka penker waitmaji. Ninkia itiurkaria kakarminiaitiaj nuna turamniuitji. Tuma asamtai kakartaj tusar wari itiurkatniuitiaj nu turata. Jehová ti anenmawai (1 Pit. 5:7).
NAMPET 7 Jehová uwemtikramniuitji
a Nekas naarinchu ainiawai.
b Ameka Yuusjai iismaka penkeraitme tana nui iista.
c Jehová ii tunaari tsankurturat tusa seatniuitji tura ene enentaimia ajasar yajauch najanmasha iniaisatniuitji. Yajauchia nu najanarkia yainkiarat tusar uuntri anairamu ainiajai aujmattsatniuitji (Sant. 5:14, 15 TNM).
d Textos bíblicos para la vida cristiana tana nu papiinium Angustia; preocupación tura Consuelo tana nui enkemam Yuus papiinmaya aarma ana nu ikiakatmararminiaiti.