Iikkia pujatsji

1, 2. a) Itiurchat nankaamakur iikkia pujatsji urukamtai ainis timiniaitiaj? b) Ju unuimiateamunmasha wari nekaattaj?

Itiurchat nankaamakrikia kanu uchichiniam enkemprar entsa uuntnum iik katiamunam yumin nase nasejai shaka shaka ajamunam pujajnia ainis ii itiurchatrinkia aminiaiti. Tumaitkiusha iikkia pujatsji. Jehovaka itiurchat nankaamajnia nuna neka asa yainmaktatji. Jehovaka nin umirainiana nuna “tuke yáiṉtatjame” tu tawai (Isa. 41:10).

² Jehovasha itiura jintintrameaj tura ii utsumamuncha itiura amaj nuyasha itiura ayamprutmaj tura aintsan itiura ikiakatmaj nuka ju unuimiateamunam nekaattaji. Ninkia warinkish itiurchat wainiakrumnincha tuke yaintatajrume tu turameaji. Ainis asamtai iikkia pujatsji tu taji.

JEHOVÁ JINTINTRAMJI

3, 4. Jehovasha itiura jintintrameaj? (Salmo 48:14 TNM).

³ (Salmo 48:14 TNM aujsata). Iikkia ii iwiakmarin warinkisha timiatrusrik turatin jeatsujnia nuna neka asa Jehovaka ni chichamejai jintintramniuitji. Jehovaka penker enentaimsar warinkish turawarat tusa ni chichamejai yainmaji (YKan. 119:105). Nuyasha warasar pujuarat tusa penker atinian yainmaji tura ukunmataisha tuke iwiaku pujumniaitiajnia nunasha jintintramji.a Tsankukratin atin tura kajerkar pujushtinian nuyasha waitrichu atinian tura nekas enentaijiai mai anenai ajatniuncha jintintramji (YKan. 37:8; Heb. 13:18 TNM; 1 Ped. 1:22 TNM). Jehová ni chichamejai jintintrameajnia nu umireakrikia ii jeen pujuiniana nujai tura ii amikrijiaisha shiir amajnaisar pujuttaji.

⁴ Yaunchunia Yuusan umirin armiania nu iijiai metek itiurchatan wainkiar itiura enentaimsarmia nuna Jehová ni chichamen aamtikraiti (1 Kur. 10:13; San. 5:17). Ni itiur nankaamasarmia nu unuimiatkur yaunchunia aents Jehovan enentaimtiarmiania nusha iiya aintsan itiurchat nankaamainiakui Jehová katsuntratniun yainkiarmiania nu paant nekaattaji (1 Pit. 5:9). Nuyasha itiurchat wainkiar wari itiurkamniaitiaj nusha nekaamniaitji (Rum. 15:4).

5. Jehovasha yajaiya jintintramniuitiaj?

⁵ Ii yachi ii umaijiaisha Jehová jintintramji.b Wekas iikratin ainiana nuka iikrattsatai tusar taar Yuusa chichamejai jintinkratainiak ikiakakratin ainiawai. Nuna turuiniakui shiir iruntrar pujuwitji (Tur. 15:40–16:5). Uuntri anaikiamu ainiana nusha ni yachin ni umain chikichkimias warinmansha yain ainiawai (1 Pit. 5:​2, 3). Uchirtin ainiana nusha ni uchirisha Jehovan aneasarat tusar jintintin ainiawai tura aintsan penker enentaimias turatniun tura Yuusna nuna turatniuncha unuiniau ainiawai (Neka. 22:6). Tura aintsan ii umai Yuusnum katsuaru ainia nuka ni kai uchipiat ainiana nuna yain ainiawai tura aneasmajai jintintin ainiawai (Tit. 2:​3-5).

6. Jehová jintintramea asakrin wari turatniuitiaj?

⁶ Jehovaka jintintramea asakrin iisha ni yuminsatai tusar wari turatniuitiaj? Nekatai̱n Jintinkiartin 3:​5, 6 junis tawai: “Wikia ashí nékajai tú enentáimtumatsuk nekas enentáiji̱a̱i̱ Uunt Yus enentáimtusta”. “Túrakmiṉkia Niṉki naka ewekátmastatui” tu tawai. Jehovaka itiurchatnum enkemkashtinian yainmakrin warasar pujuttaji. Jehovaka anenma asakrin tura jintintramea asakrin ti yuminkiaji (YKan. 32:8).

II UTSUMAJNIA NUNA JEHOVÁ AMAJI

7. Jiripiusnum 4:19 nui tana aintsan Jehovasha itiur yainmawitiaj?

⁷ (Jiripiusnum 4:19 aujsata). Jehovaka yurumatniun, pushincha tura ii pujustin waitmaktinniasha yainmawitji (Mat. 6:33; 2 Tes. 3:12 TNM). Ii utsumajnia nui enentaimsatniuka yajauchichuiti tumaitkiusha nuinki enentaimiu pujuirap Jehová tu turameaji (Matéu 6:25). Urukamtaiya nuinkia enentaimiu pujuschatniuitiaj? Jehová tuke yaintattajrume turameaji (Mat. 6:8; Isr. 13:5). Ninkia yaintattajrume tana nuna nekas umin asa ii utsumamun amastatji tu taji.

8. Jehová Davidniasha itiur yainmia?

⁸ Saúl mantuawain tusa uumak wekaimiania nui Jehová Davidtian yainmiayi. Iwiaku pujutniun utsumiarmiania nuna Jehová Davidtian tura ni aentsrincha susarmiayi. Jehová itiur yainmia nuna enentaimias David junis aarmiayi: “Natsa ámajai túrasha yamaikia weamprájai antsu Yusan enentáimtin ainia nuna ajapa iniaisámun wáinkiachuitjiai. Núnisan ní shuari̱sha yurumkan surusat tusa uwejé̱n iniakmá wekaanka wáinkiachuitjiai” tu timiayi (YKan. 37:25). Jehová amincha utsumamunam yainmakchashit tura aintsan ii yachi ii umai ainiana nuna itiur yainkiaruit nusha nekatsmeash?

9. Itiurchat nankaamasmatai nin enentaimtin ainiana nunasha Jehová itiur yainiait? (Nakumkamusha iista).

⁹ Itiurchat nankaamasmataisha Jehovaka nin enentaimtuiniana nunaka ni utsumainiamun suwiti. Yaunchunia Kristu aents armiania nuka Kristu aents Jerusalennum matsamiarmiania nu utsumainia asarmatai warinkisha akuptukarmiayi (Tur. 11:​27-30; Rum. 15:​25, 26). Yamaiya juisha Kristu aentstikia tsankaitji. Itiurchat nankaamasmanum pujuinian yurumatniun, pushincha tura tsuaknasha susarat tusa nin enentaimtuiniana nuna Jehová utsuwiti. Nuyasha itiurchat nankaamasmanum jea iwiarkatin tura iruntai jeasha iwiarkatniun ii yachi ii umai yaimin ainiawai. Itiurchat nankaamasmatai ni jee sanakmiatai turutskesha ni shuari jakamtai kuntuts pujuiniana nu ikiakartai tusar Yuusa chichamejaisha jintinkratniuitji .c

10, 11. Victor nankaamasmiania nuna wari nekaamniaitiaj?

¹⁰ Jehovaka tsanka asa nin enentaimtuiniatsna nunasha ni utsumainiamun suiniawai. Iisha Jehová aintsan Jehovan enentaimtuiniatsna nu aents warinmansha yainiaitji (Kar. 6:10). Ainis turakrin chikich aentscha ii penkera nu najaneamun nekaawartatui. Unuimiatai uuntri Ucranianmaya Victord naartin urukamia nuna nekaatai. Ninkia testigo de Jehovachuitiat uchi unuimiatainmaya testigo de Jehová ainianka aneasmajai tura arantamujai shiir amajniuyayi. Meset juarnakmiatai ninkia pisar chikich irutkamunam wemiania nui testigos de Jehová yainkiarmiayi. Tura arum Jesús jakamu enentaimtamunam pachinkiamiayi. Nin yaintaj tusar warinkish turawarmiania nui enentaimias Victor junis timiayi: Testigos de Jehovaka penker waitkiaru asarmatai ti yuminkiainiajai tu timiayi.

¹¹ Iisha testigos de Jehová ainiatsna nu warinmansha yayainiakur Jehová aintsan turamniaitji (Ruk. 6:​31, 36). Chikich aents anena asar warinkisha turakrinkia nu aents iijiai metek Jehovan enentaimtustasar wakeriarminiaiti (1 Ped. 2:12 TNM). Aents yayainiajnia nu Jehovan enentaimtin ajainiachkuisha iikia chikich aents yayainia asar shiir enentaimtiatji (Tur. 20:35).

JEHOVÁ AYAMPRUTMAJI

12. Jehová nin enentaimtuiniana nuna itiurkattajai tawa? (Yus Kanta 91:​1, 2, 14).

¹² (Yus Kanta 91:​1, 2, 14 aujsata). Jehová iruntramurin pachitkia asakrin iwianch wininia aran amajtamsairum tusan wi ayampruktatajrume Jehová turameaji (Juaṉ 17:15). Ti waitsatin tsawan juarnakui iwianch wininia aran amajtamsairum tusan tura itiurchat amajtamsairum tusan wi ayampruktatajrume Jehová tu turameaji (Apu. 7:​9, 14).

13. Jehová nin enentaimtuiniana nuna chikichkimsasha itiur ayampriniait?

¹³ Jehová nin enentaimtuiniana nuna chikichkimsasha itiur ayampriniait? Tuit penkera nu tura tuit yajauchia nusha nekaawarat tusa ni chichamen amasuitji (Isr. 5:14). Yuusa chichame jintinkrateana nu umiakrikia ii iwiakmarincha penker pujuttaji tura Yuusnumiasha kanakchattaji (YKan. 91:4). Nuyasha tuke umirtukarat tusa ii yachi ii umai ainiana nujaisha Jehová yainmaji (Is. 32:​1, 2 TNM). Ii yachi ii umainkia Jehovan anena asar tura umirainia asar yajauchia nuna turawain tusar yainmainiaji (Neka. 13:20).

14. a) Jehovasha urukamtaiya itiurchat nankaamasarat tusa iniaitiamsamniaitiaj? b) Yus Kanta 9:10 nuisha wari ta? (Nota tana nusha iista).

¹⁴ Yaunchuksha Jehová nin enentaimtin armiania nuna maawarain tusa warijiainsha awatiarain tusa ayampriniuyayi. Tumaitkiusha tukeka ainis turichuyayi. Urutainsha aya neachma itiurchat nankaamasminiaitji Yuusa chichame tu tawai (Ecl. 9:11 TNM). Yaunchuksha tura yamaiya juisha Jehovaka nin enentaimtin ainiana nuna waitkiasarat turutskesha maawarat tusa iniaisaiti. Jehová ainis tura asamtai iwianchkia waitriniana nu paant nekaji (Juup 2:​4-6; Mat. 23:34 TNM). Jehová yamaiya jui ii itiurchatrin emenkaachkusha ninkia penkesha iniaitiamsashtatji (YKan. 9:10).e

JEHOVÁ IKIAKATMAJI

15. Warijiaiya Jehová ikiakatmaj? (2 Kurintiunam 1:​3, 4).

¹⁵ (2 Kurintiunam 1:​3, 4 aujsata). Mashiniu urutainsha ti itiurchat nankaamawitji. Yamaisha ti itiurchat nankaama asar iik pujaya ainis nekapminiaitji. Ii itiur nankaamaj nuna imiatrus yaksha nekachkuisha Jehovaka nekartameaji. Nuyasha warinkish itiurchat nankaamajnia nui ikiakatmawitji. Ii seakrin Yuuska ikiakatmaji tura ni chichamejai nuyasha ii yachi ii umaijiaisha ikiakatmaji. Yuuska ni seamka shiir enentaimsatniun amasminiaitji (Jir. 4:​6, 7). Yuusa chichame aujeakur Yuuska anenmajnia tura ti penker jintintrameajnia nu neka asar shiir enentaimsattaji. Tura aintsan ii yachi ii umaijiai iruntramunam pujakrin aneasmajai warinkisha turamiartatji tura Yuusa chichamejaisha ikiakatmarartatji.

16. Nathan Priscillajai nankaamasarmiania nuna wari nekaam?

¹⁶ Jehová ni chichamejai itiur ikiakatmaj nu nekaatai tusar Priscilla Nathanjai nankaamasarmiania nuna nekaatai. Ninkia Estados Unidosnum pujuiniawai. Yuusa chichame etserkatai tusar ni pujuarmiania nuyainia aran wearmiayi. Jehová yainmaktatji ainis enentaimmiaji Nathan tu tawai. Tumaitkiusha tui wearmia nui jeawar sunkurmakarmiayi tura kuitchajai pujuarmiayi. Ainis nankaamainiak tunia tarmia nuin ataksha waketkiarmiayi. Nui jeawarsha kuitian waitmaktinian tujinkiarmiayi. Yuussha urukamtain yainmatsuj yajauch najanashitiaj tu enentaimmiajai Nathan ainis tawai. Yuuska ajapa iniaisacharuyania nuna tsawan nankaamaki weakui nekaamawarmiayi. Yuusa chichamen aujkun amikiur ikiakatea tura jintintrana ainis nekapramiajai Nathan tu tawai. Nuyasha ii itiurchatrin tikia enentaimsachtinian antsu Jehová katsuntratniun yainmajnia nui enentaimsatin nekaamamiaji. Ainis enentaimkiur uruma nui chikich itiurchat wainkiar katsuntratai tusar iwiarnaji Nathan tu timiayi.

17. Ii umai Hilda naartinniasha itiura ikiakararmia? (Nakumkamusha iista).

¹⁷ Ii yachi ii umaisha ikiakatmararminiaitji. Ii umai Hilda nankaamasmiania nuna nekaatai. Ninkia Hungrianam pujawai. Nukape uwi ti waitsamiayi tura imiancha ainis enentaimmiayi. Ii umainkia itiur nankaamasmia nui enentaimiuk Jehová nin enentaimtin ainiana nujai ikiakarmiania nuna nekaamaiti. Takakmastinian, uchirun wainkiatniun tura chikich itiurchatnasha katsuntratniun Jehovaka tuke yainkiaiti ii umai ainis tawai. Junasha tawai: Jehovaka tuke tsawan ikiakateawai. Umar kaer ainiana nu aneasmajai turutainiakui shiir enentaimniuitjiai. Jehová ainisha ikiakateana nuna nekaamaitjiai. Itiurchat nankaamai umar, kaer ikiakatrartasa celularnumanisha mensajen akuptur wearmiayi tura papiincha aatru wearmiayi turutskesha aneasmajai warinkisha turut wearmiayi ii umai tu tawai.

18. Chikich aents ikiakartai tusar itiurkatniuitiaj?

¹⁸ Ii yachi ii umai amamkesar anturainiakur tura ikiakainiakur nuyasha warinmansha yayainiakur Jehová aintsan najanji (Neka. 3:27). Aya ii yachi ii umaijiain ainis turichuitji antsu ashi aents itiurchat nankaamainiana nujai ainis turiniaitji. Jaa pujuiniakui, ni shuarinkish ajakrarmatai amamkesar anturkar Yuusa chichamejai ikiakarartai tusar ni jeen werir iiniaitji. Jehová aintsan ii yachi ii umai itiurchatan katsuntrarat tusar yayaji tura chikich aents itiurchat nankaamainiakui yayainiamka nisha Jehovan nekaattsar wakeriarminiaiti (Mat. 5:16).

JEHOVAKA TUKE YAINMAKTATJI

19. a) Jehovasha itiur waitmaj? b) Iisha Jehová aintsan turatai tusar wari turatniuitiaj?

¹⁹ Apa ni uchirin penker wainiana ainis Jehovasha itiurchat nankaamakrin penker waitmawitji tura penkesha iniaitiamchaitji. Tura aintsan Jehovaka jintintrameaji nuya ii utsumamuncha amaji tura iwianch itiurchat amajsarain tusasha ayamprutmaji tura ikiakatmaji. Iisha itiurchat nankaamainiana nu yayainiakur tura ikiakainiakur Jehová turiniana aitkiasrik turamniaitji. Warinkish itiurchat nankaamakrisha Jehová nekas yainmaktatji tu enentaimiaji. Ninkia junis turameaji: “Sapijmiakaip. Warí Wi ámiji̱a̱i̱ pujajai” (Isa. 41:10). Jehová tuke yainmaktatajnia nu neka asar ti shiir enentaimiaji.