Jehovasha itiurchatan katsuntrarat tusa itiur yainkratniuit?

1. a) Itiurchat katsuntratniusha urukamtai yupichuchichuit? b) Ya yainmakria katsuntramniaitiaj? (1 Pítiur 5:10).

Yamaiya juinkia ti itiurchatnum amunam pujaji mashiniu itiurchat wainiaji. Tsuamashtai sunkuran achimiakar pujuiniawai tura ni shuar ajakrar waitiainiawai nuya uunt anaikiamu turutskesha ni shuarkesha kajerainiamunam pujuiniawai (Mat. 10:​18, 36, 37). Ainis nankaamakrisha nekas Jehová katsuntratniun yainmaktatji tu enentaimiaji (1 Pítiur 5:10 aujsata).

2. Itiurchat wainkiursha urukamtai katsunniuitiaj?

² Itiurchat nankaamakrisha turutskesha kajertamainiakrincha tura tunaa turamnia nekapeakrisha Jehová umirkatniuitji tura ni takatrisha warasmajai najanki wetiniaitji. Iikkia itiurchat katsuntratin jeatsji antsu Jehová yainma asakrin katsunniuitji (2 Kur. 4:7). Ju unuimiateamunam itiurchat katsuntratniun Jehová itiura yainmaj nu nekaattaji.

YUUS SEAKUR

3. Jehovajai aujmattsatinkia urukamtai imia penkeraiti taji?

³ Tunaartiniaitkiursha itiurchat katsuntramij tusar Jehovajai aujmattsamniaitji (Heb. 4:16 TNM). Jehovajainkia urutainsha, wariniuksha, chikich chichamjaisha nijiai aujmattsamniaitji. Tura aintsan tuinsha pujusar iik pujakrisha turutskesha sepunam pujakrisha nijiai aujmattsamniaitji (Jns. 2:​1, 2; Tur. 16:​25, 26). Jakamnia itiurchat nekapea asar chichaktaj tukamar ajakrisha Jehovaka anturtameaji (Rom. 8:​26, 27 TNM). Jehovajai aujmattsatniuka imia penkeraiti.

4. Itiurchat katsuntratai tusar Jehová urukamtai seatniuitiaj?

⁴ Yuus papiinium Jehová junis turamji “Warinkish ni wakeramuri seamka, ni anturtamji” tu tawai (1 Juan 5:14 TNM). Itiurchat katsuntratai tusar ni seakrinkia Jehovaka ni wakeramu sea asakrin anturtamkattaji. Jehovaka iwianch yajauch chichareana nunaka ii itiurchat katsunteakrin ayamprumaktatui tura nuya ni waramtiksattaji Yuusa chichame ainis tawai (Neka. 27:11). Jehovaka nin umirainiana nuna ayampruktasa wakerawai Yuusa chichame tusha tawai (2 Crón. 16:9 TNM). Jehovaka nekas yainkratkattsa wakerawai (Is. 30:18 TNM; 41:10; Luc. 11:13 TNM).

5. Jehová seakur itiur nekapniuitiaj? (Isaías 26:3 TNM).

⁵ Jehovaka ni itiurchatrin ujakarat tusa wakerawai. Tuma asamtai ii itiurchatri Jehová ujakrikia shiir enentaimsattaji Yuus papiinium tu aujmateawai (Jir. 4:7). Nukap aents testigo de Jehová ainiatsna nu ni itiurchatrin kajinmatkittsar tura shiir nekaptiasar warinkisha turin ainiawai. Nukap aents ni itiurchatrin kajinmatkitiai tusar ninki wakerusar waat ajakiar jaka enentaimia juau ainiawai tumaitkiusha ainis turatniuka ti tsumainti. Ainis turuiniakui iwianchi suntari enkemtuawarminiaiti (Matéu 12:​43-45 nui tana nujai apatkam iista). Ainis turuiniaksha tukeka shiir enentaimsar pujuiniatsui antsu Jehová shiir enentaimsar pujustinian amajnia nuka tuke shiir enentaimsar pujustinian yainmaktatji (Isaías 26:3 TNM aujsata). Itiurchat nankaamakrin Yuus papii aujsaitiajnia nui enentaimsatniun Jehová yainmaktatji (YKan. 62:​1, 2).

6. Yuus seakur waritminiaitiaj? (Nakumkamusha iista).

⁶ Yuus seakur waritminiaitiaj. Itiurchat nankaamakur ii itiurchatri Jehová ujaktiniaitji nu turakrikia shiir nekaptiatji tura penker enentaimsar najanattsar Jehová nekatairi seatniuitji (YKan. 55:22; Neka. 2:​10, 11). Katsuntratin yainkiata tu seakrincha yainkratin asakmin yuminsajme tu titin kajinmatkishtiniaitji (Jir. 4:6). Aya ii itiurchatrin enentaimiu pujutsuk itiurchat nankaamakrin Jehová itiur yainmaj nui enentaimsar yuminsartai (YKan. 16:​5, 6).

YUUS PAPII AUJKUR

7. Yuusa chichamesha itiurchat katsuntratniuncha itiura yainmakminiaitiaj?

⁷ Jehovaka itiurchatan katsuntrarat tusa ni chichamen amasuitji. Yuus papiinmanka Jehová yainkratkattsa wakerana nuna aujmatu nukap irunui. Jesús ni aparin penker neka asa Matéu 6:8 nui junis timiayi: “Átumka seatsrumni̱ṉ Yus Apa átum atsumamun nékawai” tu timiayi. Tuma asamtai Jehovaka waitiakrincha ii wari utsumaj nuna neka asa yainmaktatji. Ukunmatai penker pujuttajnia nuna Yuusa chichame aujmatna nu neka asar kakaram ajasar katsuntramniaitji (YKan. 94:19).

8. Yuusa chichamesha itiurchat katsuntrattsar warinma enentaimsatniuitji ta?

⁸ Yuusa chichame jintintramkurin itiurchatsha katsuntramniaitji tura penker enentaimsar najanatniuncha yainmakminiaitji (Neka. 2:​6, 7). Ukunmatai wari nankaamasat tu enentaimiu pujutsuk yamai itiurchat wainjinia nu katsuntratai tusar kakartiniaitji Yuus papii ainis tawai (Mat. 6:34). Yuusa chichame tuke aujniuitkiurkia itiurchat wainiakrisha Yuusa chichame aujsaitiajnia nui enentaimsattaji.

9. Yaunchuk iiya ainis nankaamasaruana nu aujkur itiur enentaimniuitiaj?

⁹ Yuus papiinmanka iiya ainis itiurchat nankaamainian Jehová yainkiarmiania nuna aujmateawai (Isr. 11:​32-34; San. 5:17). Yaunchunia aents Jehová enentaimtu wearmiania nu ni itiur nankaamasarmia nui enentaimkiur “Iin ayamprutmak ikiakátmajnia nuka Yúsaiti. Itiurchat pujakrincha wárik yáintmaji” tu enentaimsattaji (YKan. 46:1). Itiurchat katsuntraruana nui enentaimkiur iisha niiya ainis katsuntrattaji (San. 5:​10, 11).

10. Yuus papii aujkur wari turamniaitiaj?

¹⁰ Yuus papii aujkur wari turamniaitiaj. Yuus papii tuke tsawan aujsatniuitji tura ii aujsamu yainmakminiaitiajnia nu papiichiniam aarar takusminiaitji. Ii yachi ii umai papii Examinemos las Escrituras todos los días tana nuna kashi kashinin aujainiak kakararuiti. Ii umai Maríaa Yuus papiin kashi kashinin aujeak urukamia nu nekaatai. Ni aparin tura ni nukurincha nuchamtaik doctor cáncer sunkuran takakainian nekaawarmiayi ainis asamtai ni aparin ni nukurin jaamam wainkiamiayi. María itiurchat katsuntrattsa junis turamiajai tusa aujmateawai: Tuke tsawan kashik nantakin kashi kashinin papii Examinemos las Escrituras todos los días tana nuna aujsan esetran enentaimniuyajai. Nu papiin kashi kashinin aujkun aya winia itiurchatrun enentaimiu pujushtinian yainkiamiayi (YKan. 61:2).

II YACHI II UMAIJIAI IRUNTRAR PUJAKUR KAKAAJI

11. Ii yachi ii umai itiurchatan katsuntainiana nu neka asar itiur enentaimsattaj?

¹¹ Jehovaka kakararat tusa ii yachi ii umaincha amasuitji, ii yachi ii umai chikich nunkanmaniasha iiya aintsan waitiainiana nu neka asar kakaaji (1 Pit. 5:9). Ii itiurchat achiakeajnia nu itiurchatan wainiainiaksha katsuntainiana nu neka asar iisha warinkish itiurchat akuisha katsuntramniaitji tu enentaimiaji (Tur. 14:22).

12. Urukamtainia mai ikiakanai ajatniuitiaj? (2 Kurintiunam 1:​3, 4).

¹² Ii yachi ii umainkia warinkish turawar ikiakatmararminiaitji. Apóstol Pablo ni jeenin sepunam pujumia nui Kristu aents armiania nuka yaintai tusar warinkisha turawarmiayi. Tuma asamtai apóstol Pablo papiin aarmiania nui yainkia asakrumin yuminsajrume tusa chikichkimias ni naarin pachis aarmiayi (Jir. 2:​25, 29, 30; Kurs. 4:​10, 11). Yamaiya juisha itiurchatan katsuntrat tusar ii yachi ii umai yainmainia asakrin iisha aitkiasrik turatniuitji (2 Kurintiunam 1:​3, 4 aujsata).

13. Ii umai Maya naartin itiura itiurchatnasha katsuntramia?

¹³ Ii umai Maya naartin nankaamasmiania nu nekaatai. 2020 uwitin policía ni jeen enkemawar warinkish ii iij amajsarmiayi tura nunianka chicham iwiartainiam ii umain Mayan jukiarmiayi, ni kai ni umaisha itiura yainkiarmia ni junis timiayi: Kakarmachu nekapea untsukarmiayi tura aneajme tusar aar akupturkarmiayi tu tawai tura junasha timiayi Jehová iruntramuri pachitkiajna nu nekamiajai tumaitkiusha 2020 uwitin Jehová iruntramurin pachitkiainiaka anenkratin ainiana nu paant nekamiajai tu tawai.

14. Ii yachi ii umainia aran ajasaij tusar itiurkatniuitiaj? (Nakumkamusha iista).

¹⁴ Ii yachi ii umainia aran ajasaij tusar itiurkamniaitiaj. Itiurchat nankaamakrisha ii yachi ii umainia aran ajaschartai. Itiurchat nankaamakrin uuntri ainiana nu yainmakarminiaiti (Is. 32:2 TNM). Ii yachi ii umai itiurchat nankaamainiakui iisha yayakrikia shiir enentaimsattaji ainis turakur ii itiurchat achiakeajnia nusha katsuntrattaji (Tur. 20:35).

UKUNMATAI WARI NAKAAMASTATA NU NEKA ASAR KATSUNTEAJI

15. a) Jesussha warinma enentaimias katsunniuya? b) Iisha warinma enentaimsar katsuntramniaitiaj? (Hebreos 12:2 TNM).

¹⁵ Jehovaka itiurchatan katsuntrarat tusa ukunmatai itiur pujustataj nuna ujatmakuitji (Rom. 15:13 TNM). Jesuska waitias jakatniuitkiusha ukunmatainkia warasan pujuttajapi tu enentaimias katsuntramiayi (Hebreos 12:2 TNM aujsata). Ninkia Jehovan umireakka Jehová naari penker ujukamu atiniuyania nuna nekamiayi. Nuya Jesuska ni apari nayaimpiniam pujamunam wetasa wakerimiayi tura 144 mil aents nayaimpiniam weartin armiania nujai uunt ajas ekemsatniun wakerus pujumiayi. Iisha aintsan ukunmatainkia tuke iwiaku pujustatjinia nu neka asar itiurchat wainkiursha katsuntrattaji.

16. a) Ukunmatai penker pujuttajnia nui enentaimias ii umai urukamia? b) Ii umai nankaamasminia nuna wari nekaamniaitiaj?

¹⁶ Ii umai Rusianmaya Ana naartin ukunmatai penker pujustatjinia nuna neka asa urukamia nu nekaatai. Ni aishrin sepunam jukiarmatai ni junis timiayi: Jehová seakun tura ukunmatai penker pujustatjinia nui enentaimkiun kakainiaitjai. Ukunmatainkia penker pujustatjinia nui enentaimsan Jehovaka tuke yainkratniuiti tu enentaimiajai.

17. Ukunmatai penker pujuttajnia nu neka asar wari turatniuitiaj? (Nakumkamusha iista).

¹⁷ Ukunmatai penker pujuttajnia nui enentaimsartai. Ukunmatai ti shiir pujuttarme Jehová turameajnia nui enentaimsatniuitji. Yamaiya jui itiurchat wainiakrisha tuke ainis waitiu pujushtatji tu enentaimsattaji. Nuyasha Yuusa chichame chikich aents ujakartai tusar kakartiniaitji (2 Kur. 4:17). Aents Jehovan nekainiatsna nuka itiurchat wainkiarsha Jehová ukunmatai wari turattana nuna nekainiachu asar waitiainiawai tuma asamtai yupichuch warik nekaamnia aujmatkurkia Jehovanu nekatniun wakerukarminiaiti.

18. Jehová turameajnia nuka nekasaiti urukamtai tu enentaimiaj?

¹⁸ Job itiurchatan katsuntra asa Jehovan junis timiayi: “Wikia nékajme, Ámeka ashí tujintkiachuitme. Tura Ame túrataj tamasha iikia itiurchat awajkachminiaitji” timiayi (Juup 42:2). Jehová ni chichakman umitskeka iniaichana nuna Job nekaamamiayi. Nu neka asar itiurchat wainiajnia nusha katsuntramniaitji. Watskea enentaimsartai nuwa jaa pujumniaiti tura nukap doctornumsha iimmiasha tsuamarcha asa kuntuts nekapminiaiti. Tuma wekas doctor wari sunkurnak achiakea nu nekaramniaiti tura tsuamartasa wari turamniait nuna ujakminiaiti. Nu nuwaka warik tsuamachkuisha tsuamartatjai tu enentaimiash shiir nekapminiaiti. Iisha nunisrik ukunmatai penker pujuttajnia nu neka asar itiurchat wainiakrisha katsunteaji.

19. Itiurchat katsuntratniuncha wari yainmakminiaitiaj?

¹⁹ Jehová seakur, Yuus papii aujkur tura ii yachi ii umaijiai iruntrar pujakur nuya ukunmatai penker pujuttajnia nui enentaimiakur Jehovaka itiurchat katsuntratniun yainmaji. Yamai unuimiarajnia ainis turakrinkia ukunmatai penker pujuttajnia nu tsawan jeamam Jehovaka itiurchat wainiakrisha katsuntratniun yainmaktatji (Filip. 4:13 TNM).