Jehová naari ti arantukma tura penker ujukamu ati tusa Jesussha itiurkamia?

1, 2. a) Jesús jasattuk ajas warinia turamia? b) Ju unuimiatnumsha wari nekaattaj?

33 uwitin jueves 14 de nisantin kashi ajatesai Jesuska waitkiasar maatniurinkia ishichik ajasmanum ni unuiniamuri armiania nujai irunar pujumiayi. Jesuska ni unuiniamurin armiania nuna pankan vinon susar amik ikiakararmiayi. Weartinkia ishichik ajasmanum Jehovan Jesuska seamiayi. Apóstol Juan Jesús Yuusan seamiania nuna akankamu 17 nui aarmiayi.

² Ju unuimiatnumka Jesús jasattuk ajas Yuusan seak timiania nu warinma ti enentaimkiua ainis seamia nu nekaattaji tura warinia imiankasha imia penker iimia nusha nekaattaji.

“AME NAARMIN NEKAMTIKIAWARUITJIAI”

3. Jesús ame naarmin nekamtikiawaruitjiai timiania nuna warinia takua timia? (Juaṉ 17:​6, 26).

³ Jesús Yuusan seak ame naarmin nekamtikiawaruitjiai timiayi, nuna timiania nuka Jehová naarinkia ti penker enentaimta asa ainis jimiara timiayi (Juaṉ 17:​6, 26 aujsata). Jesusan nemarin armiania nuna Jehová naarinkia nekamtikiawaruitjiai tusash timia? Atsaa, ashi Jesusan nemarin armiania nuka judío aents asar Yuusa chichamen nukape Jehová naarinkia aan nekarmiayi. Jehová itiur enentaimniuit, urukuit, warinia najanatta nuna nekaska nekamtikiawaruitjiai tusa aini timiayi. Jesuska Jehová urukuya nuna neka asa ni urukuit nuna imiatrusan jintiamiayi.

4, 5. a) Aentsu naari nekayatam amin yainmaku asamtai itiur enentaimtusminiaitiam nu apatkam aujmattsata. b) Jesusan nemariarmiania nu Jesús wari itiurakuiya Jehovancha penker nekaawarmia?

⁴ Watskea jui enentaimsatai: Iruntramunam ii yachi David naartin doctor ainti. Neachma carro shushunnamtai warichik ii yachi takakmamunam tsuarmarat tusa juramkiarminiaiti. Ninkia tsuakratin asa warik tsuarmarminiaiti. Ii yachi David wainkiumka aya ni naarin enentaimchattame antsu tsuaramniapi tu enentaimta asam shiir enentaimtitiame.

⁵ Aintsankete Jehová naarijiaisha, Jesusa nemarin armiania nu Jehová naarin nekainiaksha Jesús Jehová urukuit aintsan najaneakui jintinkratkui Jehová urukuit nuna paant nekaawarmiayi. Ainis aitkiakui Jehovanka ti shiir enentaimtiarmiayi (Juaṉ 14:9; 17:3).

AME NAARAM ANAITIUKMAMNA NUI ENENTAIMSAM WAINKIARTA

6. Jesús wari tajai tusa Jehová ni naarin anaitiukuiti timia? (Juan 17:​11, 12 TNM).

⁶ Jesús nin nemariarmiania nui enentaimias Yuusan seak junis timiayi: Ame naaram anaitiukmamna nui enentaimias wainkiarta tu seamiayi (Juan 17:​11, 12 TNM aujsata). Jesús Yuusan seak ame naaram timiayi, nuka Jehová naartiniaitjiai tusanka chichamiayi nu paant nekaamniaitji. Jesús wari tajai tusa Jehovan ame naaram anaitiukuitme timia? Jehovaka Jesusan ju nunkanam niniun etserkat tusa akupkamiayi. Jehovaka ni naarin Jesusnaka etserkat tura aentscha najanashminian najanat akupkamu asa ame naaram anaitiukuitme tu timiayi (Juaṉ 5:43; 10:25). Nuyasha Jesusa naarinkia Jehovaka uwemtikiartiniaiti tu tamaiti.

7. Urukamtai Jesús Jehová naarin chichaktiniuya nu apatkam aujmattsata.

⁷ Watskea uunt anaikiamu yanaksha ni naarin chichakat tusa anaikiainti. Nu anaikiamuka warinkish takunka uunt anaikiamu wari titia tusa akupea nunak tiniuiti. Aintsankete Jehovaka Jesusnaka ni naarin chichakat tusa anaikiaiti (Mat. 21:9; Ruk. 13:35).

8. Jesús ju nunkanam taatsain urukamtai Jehová winia naarjai akupkattajai timia? (Jíinkiarma 23:​20, 21).

⁸ Yuusa chichamenka Jesusnaka chicham tawai. Nuka Jehová warinia wakera nuna nekaawar najanawarat tusa ni suntarin tura ashi aentsun ujau asamtai tu naartiniuyayi (Juaṉ 1:​1-3). Kampuntin atsuu nunkanam Israel aents wenakui Yuusa suntari jintiki penker wainki wemiania nuka Jesusash tumainti. Urukamtaiya nu Yuusa suntarincha umirkartiniuya? Jehová junis timiayi: “Antsu niṉkia Winia naarja̱i̱ akupeamu asa atumí yajauch túramurminkia tsaṉkurashtatui” timiayi (Jíinkiarma 23:​20, 21 aujsata).a Jehovasha urukamtaiya Jesusan winia naarjai akupeajai tu timia? Niniun aujmattsatin asamtai tura ayampruktin asamtai nuyasha ni naarin penker ujukatin asamtai ainis timiayi.

APARU AME NAARMIN SHIIR ENENTAIMTURMASARTI

9. Urukamtaiya Jesuska Jehová naarin penker ujukattsa wakeriniuyayi taji?

⁹ Jesús ju nunkanam tatsuk Jehová naarinkia penker ujukattsa wakeriniuyayi. Tura ju nunkanam taasha Jehová naarinkia ashi najanmajai penker ujukamiayi. Jesús jasattuk ajas juna timiayi: Aparu ame naarmin shiir enentaimturmasarti timiayi. Ainis takui nu chichamtaik apari junis timiayi: “ʻWinia náarun shiir awajsaitjiai tura ataksha shiir awajsattajaiʼ tímiayi” (Juaṉ 12:28).

10, 11. a) Jesussha warinia turakua Jehová naarin paant ujukamia? (Nakumkamusha iista). b) Jehová naarisha urukamtai ti arantuktiniaitiaj tura penker ujukatniuitiaj?

¹⁰ Jesús Jehová iniakmamtairisha urukuit, warinia najanait nuna etseruk ni naarinkia paant ujukamiayi. Jehová naarin ti arantukma tura penker ujukamu atiniuyania nuna nekamiayi. Nuna neka asa Jesús ni nemarin armiania nuna Yuus aujkuram junis titiniaitrume timiayi: “Ii apari nayaimpiniam pujamna nu, ame naaram penker ujukamu ati” tu seamiayi (Mat. 6:9 TNM).

¹¹ Adán Evajai Edén nunkanam pujuarmia nui iwianch Jehovaka waitriniaiti penkera nuna suritramarme tu tsanumpramiayi. Tuma asamtai Jehová naarinkia penker ujukamu atiniuyayi (Náṉ. 3:1-5). Ainis timiania nuka Jehovaka penkercha najanniuiti tusa timiayi. Job pujumiania nu tsawantincha iwianchkia aentska Yuus warinkisha suam ninkia umirainiawai tu timiayi. Iwianchkia waitrin asa aentska itiurchat nankaamainiakka Jehovanka enentaimtuscharminiaiti tu timiayi (Juup 1:​9-11; 2:4). Iwianch Jehovan tsanumpramiania nu nekasashia nu paant nekanatniuyayi.

WINIA IWIAKMARUN SUKARTUSTATJAI

12. Jesussha Jehovan anea asa urukamia?

¹² Jesuska ni aparin ti anea asa ni naari ti arantukma tura penker ujukamu ati tusa wakerimiayi. Tuma asa winia iwiakmarun sukartustatjai timiayi (Juaṉ 10:​17, 18). Jehová naari ti arantukma tura penker ujukamu ati tusa Jesuska jakamiayi.b Adán Evajainkia tunaartichu armiayi tumaitiat Jehovan nakitrar iwianch taman umirkarmiayi. Jesuska ju nunkanam tamiania nui Jehovan anea asa jaamam tuke umirkamiayi (Isr. 4:15; 5:​7-10; Heb. 12:2 TNM).

13. Iwianch waitriniana nuna urukamtaiya Jesussha nekamia? (Nakumkamusha iista).

¹³ Jesús najanamiania nujai Jehovaka waitrichuana nu antsu iwianch waitriniana nu paant nekanamiaiyi (Juaṉ 8:44). Jesuska yajainsha nankaamas niyaiti Jehovan imiankaska nekana nuka. Iwianch Jehovan tsanumpramiania nu nekasaitkiuinkia Jesussha neka ayi. Iwianch timiania nuka nekascha asamtai Jehová naarin penker ujukattsa wakerimiayi. Jesús Jehovaka winiak ikiurkichiash tu enentaimsamiania nuisha Jehovan nakittsuk jaamam tuke umirkatniun wakerimiayi (Mat. 27:46).c

“ASHÍ TÚRATNIUN AKUPTÚKMAMNA NUNA AMUKUITJIAI”

14. Jesús umikiu asamtai Jehovasha itiurkamia?

¹⁴ Jehovaka nin umirka asamtai uwemtikrurtatui Jesuska tu enentaimmiayi. Tuma asa mantamnatin ishichik ajas junis timiayi: “Ashí túratniun akuptúkmamna nuna amukuitjiai” (Juaṉ 17:​4, 5). Jehová Jesusnaka ni ayashinkia iwiarsarmiania nuin juakat tusa iniaisashmiayi (Tur. 2:​23, 24). Tuma asamtai Jehová Jesusnaka inianki nayaimpiniam uunt awajsamiayi (Filip. 2:​8, 9 TNM). Nukape uwi nankaamasu ai Yuus anaikiam uunt anaikiamu ajasmiayi. Yuusa anaikiamuri itiurkatniuya nuna Jesús Jehovan seak junis timiayi: “Juisha uuntri ajastatmena nu tsawan jeati. Nayaimpiniam nuya nunkasha ame wakeramna aintsan najannati” tu timiayi (Mat. 6:10 TNM).

15. Jesús mil uwi iikrattsattana nuisha warinia turat?

¹⁵ Jukerusan Jehovan kajerainiajai Jesús maniktatui tura yajauch aents ainiana nunaka Armagedontin amuktatui (Apoc. 16:​14, 16 TNM; 19:​11-16). Nuyasha iwianchniaka nankatkachu waanam epeni iniaisattawai tura iwianchkia nui puja asa yanaksha itiurchat amajsashtatui (Apu. 20:​1-3). Nuyanka mil uwi uunt ajas pujustinian juarkittiawai tura nuinkia ju nunkanam penker pujustin atatui nuyasha Jesuska aents tunaartincha ajasarat tusa yainkratkattawai. Jakaru ainiana nunasha iniankiartatui tura ashi nunka shiiram nunka ajastatui. Jehová wakerimiania nuka nu tsawantinkia mash uminkiattawai (Apu. 21:​1-4).

16. Jesús mil uwi uunt ajas pujuttana nu amukamtaisha itiurak pujuttaj?

¹⁶ Mil uwi Jesús uunt anaikiamu ajas pujuttana nu amukamtainkia tunaa tura tunaartiniaitiajnia nusha mash amukattawai. Aentska Jehovan seainiak Jesús ii tumashrin akikmaku asamtai tsankukratkata tuka seachartatui. 144 mil nui pachitkiainia Jesusjai tunaartincha atinian yainmakaru asakrin Jehová amikri ajastai tusarkia yaksha utsumchattaji. Jaataisha atsuttawai. Jakaru ainiana nu nantakiartatui. Tura ju nunkanam ashi aents tunaartincha ajasartatui (1 Kur. 15:​25, 26).

17, 18. a) Jesús mil uwi uunt ajas pujamun amukmatai warin turunat? b) Jesús mil uwi uunt ajas pujamun amuk itiurkatin? (1 Kurintiunam 15:​24, 28; Nakumkamusha iista).

¹⁷ Jesús mil uwi uunt ajas pujuttana nu amukamtai Jehová naarinkia ashi arantukma atatui. Edén nunkanam iwianchkia Jehovaka waitriniaiti tura aentsnaka aneachu asa penker wainkiachminiaiti tu timiayi. Ainis tiniu asamtaisha Jehovan enentaimtuiniaka yaunchunia juarki Jehová naarin ti arantukaruiti. Jesús mil uwi uunt ajas pujuttana nu amukamtainkia Jehová naarinkia penker ujukamu awajnastatui. Nu turunamtainkia Jehová ti anenmajnia nu paant nekaamu juaktatui.

¹⁸ Ainis turunamtainkia iwianch Jehovan tsanumpramiania nuka paant nekanattawai. Jesús mil uwi uunt ajas pujuttana nuna amuksha urukatin iwianch turamiania aintsan Jehovan kajerkatpiash? Atsaa, nunaka penke turashtatui (1 Kurintiunam 15:​24, 28 aujsata). Jehovan anea asa mil uwi uunt ajasman amuk aparin tuke uunt anaikiamu ati tusa susattawai tura nuyasha nin tuke umirkattawai.

19. Jehová naarincha Jesussha itiur enentaimtiniait?

¹⁹ Jehová Jesusnaka ni naarin chichakat tusa anaikiamiayi. Jehová urukuit nuna Jesús paant nekamtikiamiayi. Jehová naari ti arantukma tura penker ujukamu ati tusa mantamnamiayi. Nuyasha mil uwi amukamtaisha ni aparin uunt ajas pujusat tusa susattawai. Jesús aintsan turatai tusar wari itiurkamniaitiaj nuka chikich atsakamutin nekaattaji.